南瓜仔@42個月

19/03/2016 (42M)

3歲半啦 ~~~~~

食
終於肯飲湯，但又要氹、最初要餵佢(因為係半迫佢飲湯)，現在都肯自己飲 (茄蕃湯 only)，都算叫有進步！

食飯就自己食，不過就要"提"住佢「食飯」。

瞓
早上，從不會扭計唔起身，只係唔會自己換校服 (未瞓醒mode)。有次同校巴ee傾開計，佢話南瓜仔好多時都會瞓左 (原來南瓜仔仲係好累)。

仲有午睡。

晚上，15分鐘內就會瞓著。

發展方面

打電話：
有次妹妹早上唔肯換校服(死都話要將校服放係書包 ><)，南瓜仔就打電話俾hd：「爸爸，妹妹唔肯換校服呀！」

對話：
我：「若媽媽無錢俾的士錢，司機叔叔搵警察，你會點做！？」
南瓜仔：「喊！」
我：「喊係解決唔到問題！」
南瓜仔：「我會"boom"佢，"boom"死佢囉！」(都唔知邊度學？？)
我：「我地唔用可以用暴力，而且係媽咪唔啱，無錢俾，你再諗下點做！」
南瓜仔：「我搵巴斯光年 "boom"佢」
(都係用暴力....><)
我：「咁媽咪無錢，你可以搵邊個！？」
南瓜仔：「爸爸！」
我：「咁你點搵爸爸！？」
南瓜仔：「打電話俾爸爸！」
我：「無錯，喊同用暴力都解決唔到問題架！」
(睇黎真係要多教育下南瓜仔 ......)

我：「如果媽咪接唔到你放學咁點！？」
南瓜仔：「搵爸爸！」
我：「咁爸爸唔得閒呢！？」
南瓜仔：「咁公公！」
我：「公公都唔得呢！？」
南瓜仔：「搵(工人)姐姐！」
我：「咁(工人)姐姐都唔得呢！？」
南瓜仔(開始無奈)：「咁姨媽！」
我：「 姨媽都唔呢！？」
南瓜仔：「咁 xx (表哥)！」
我：「 xx 都唔得喎！」
南瓜仔：「咁我自己返屋企！」(聽完，我笑左出黎)
我：「咁你識唔識返屋企！」
南瓜仔：「都識既......」
(其實係我太無聊，問d咁無聊問題！哈！哈！)

因為我既抵抗力低，生了唇瘡，個咀就損左......好醜樣 ><
我：「媽咪係唔係好醜樣！？」
南瓜仔：「唔係呀！媽咪好靚！」
我：「媽咪唔開心，個咀損左......」
南瓜仔：「唔好唔開心啦！」
我：「咁你可唔可以錫媽咪！？」
南瓜仔：「可以！」
我：「但會傳染俾你喎！？」
南瓜仔：「遠d錫咪得(離開左2呎，錫左我一啖)！」

畫畫：
南瓜仔之前係跟住 hd 畫畫 (即係 copy cat)，而 hd 隔離指導佢 .....
有天，我好無聊同南瓜仔講：「你可唔可以畫爸爸！？」
南瓜仔二話不說就畫出來，有頭、有眼、有身、有手仲有腳添！！(雖然唔靚，但係我心目中南瓜仔己做得好好！)
之後我又同南瓜仔講：「咁媽媽呢！？」
南瓜仔：「哦，咁媽媽要細d，媽媽矮過爸爸！」
南瓜仔就畫左我.....
我：「咁你同妹妹呢！？」
南瓜仔又畫埋，仲講：「妹妹最矮！」

其他：
 今個月，最明顯係多左「幻想」......

- 話枱底係佢屋企，之後用張椅當門，仲叫妺妹一齊入佢屋企。
- 被當梳化，面向住牆，話塊牆係電視，仲同妹妹一齊睇 frozen。
- 拎住"空氣"俾我，話係蘋果，仲問我想食乜！？我話香蕉，之後行左一個圈，又拎"空氣"俾我，話係香蕉。
- elmo 被佢拋左落地，我問：「elmo 有無受傷！？」
南瓜仔：「有，佢流血！」
我：「咁點算呀！？」
南瓜仔就拎左張紙巾，同elmo "止血"，再幫elmo 打針：「媽媽，elmo無事啦！」

返學
呢個月學校有評核，hd 都有同南瓜仔溫習！(我既要求同hd不一，所以都係由 hd 跟)
- 寫字進步(起碼有力寫)，但仲有好大既進步空間。

南瓜妹面試日，見到班主任，都傾了幾句，班主任話南瓜仔多左講野，唔知好事定壞事呢！？(詳情都係留係下次家長日傾吧！)


** 呢篇係南瓜仔最後一篇成長日誌，原本我無諗過停，不過最近睇左報章，講要保障小朋友既私穩(寫blog係公開)，將來可能影響佢地(可能南瓜仔將來做特首！？？俾人知道佢唔食野！哈！哈！)