親子好去處@【2016 暑假】Hello Kitty 中菜軒

【2016 暑假】爸爸單拖系列：三

27/07/2016 (46M8D) + (28M6D)

目的地： Hello Kitty 中菜軒

南瓜妹係 "Hello Kitty 迷"，所以 hd 就帶左南瓜兄妹去食 ........ 可憐既媽媽就要返工！！


↑ 據 hd 所講，南瓜仔唔俾南瓜妹食 Hello Kitty 包，連影相都唔多想影 .....

而南瓜妹就全程四萬咁口，不知幾開心！！

最乖係佢地不忘我呢個媽媽，打包左個 Hello Kitty 包俾我 (媽媽真係好開心，開心係佢地仲記得我，記得同我分享！)

回到家，南瓜妹已經係屋企門口等緊我，仲拎住個包：「媽咪，俾你食架！？」(真係心到甜埋)

當我食緊時，南瓜妹：「媽咪，我餵你食，好唔好！？」

我：「好啦！」

原本係餵緊我，但餵餵下 ......但南瓜妹就一路"偷食"囉 ~~~~~~~

親子好去處@【2016 暑假】黃泥涌水塘花園

25/07/2016 (46M6D)+ (28M4D)

目的地：黃泥涌水塘花園

尋日玩唔到水上單車，所以是日決定要去玩 ........

是日天氣好好，不太曬，仲有點風，都算好舒服！！

小朋友就要著上救生衣，大人就唔駛 (但 hd 話上次大人都要着喎！？？)

四人水上單車：$120 (平日)

麵包：$10

hd 同我就踏去無咁曬地方俾佢地餵下魚！


 

↑ 呢兩個小朋友好鐘意餵魚，南瓜妹連抱都唔駛我抱住，自己行去水上單車前餵魚 (其實我有點怕佢會跌落水)，但佢地係大大件麵包咁餵 (叫住佢地細件d)，加上夏天既魚又比較多 (一放包落去，d 魚就好快食哂)，所以好快就餵一包 .......

見到佢地咁鐘意餵，所以買多一包，當時我地仲係水上單車上，hd 就大叫同職員講：「要一包麵包！」

職員就將麵包拋俾我地 (咁當然我地架單車係泊近左)，都幾方便喎！哈！哈！

南瓜兄妹又餵一大輪，當佢地餵完後，咁就玩完啦 ~~~~~

之後就去食午餐，而我食完午餐後就返工啦！！

最攪笑係我回家後，我扮拋麵包，南瓜兄妹扮魚跳起來食包.......哈！哈！

親子好去處@【2016 暑假】西貢

24/07/2016 (46M5D)+ (28M3D)

目的地：西貢

原本諗住去玩水上單車，點知去到先知無得玩好耐 ><

唯有轉去西貢巿中心行下，既然去左西貢，就去食海鮮啦！！

我地揀左「六福菜館」！

↑ 雖然我地係四個人，但其實都係食二人份量，所以都幾難叫海鮮 ><

叫左佢地出名既菜，又真係幾好味喎，價錢 $770

今次輪到南瓜妹食得好好，但不停咁添食喎！！


↑ 食完就係巿中心行下，四周圍都有好多野睇、好多野玩 .......

最攪笑係南瓜仔：「d 牛大隻過狗架！！」(呢樣我一早就知啦！哈！)

之後就回家啦！！

去到屋企家樓下，南瓜兄妹不約而同要 hd 抱，而hd 一口就答應！？？我話：「你得唔得架！？」hd：「點解唔得！？」

原本我諗住幫 hd 揹背囊，但 hd 話唔駛！？？ 就係咁，hd 由屋企樓下抱到返屋企，雖然路程唔算好遠，但都要行 8分鐘 ><，都唔明點解可以咁好力！？？

親子好去處@【2016 暑假】愉景灣

23/07/2016 (46M4D)+ (28M2D)

目的地：愉景灣 (大白灣沙灘 - 「全港最長75米沙灘充氣迷宮」 )

未出發，南瓜仔就話要玩沙，仲話要帶埋沙灘用品去 .......

不過我地都估佢未必玩，所以都無帶去！！(好彩無帶咋！)

我地去左欣澳，再轉巴士入去！

去到，當然去 大白灣沙灘 - 「全港最長75米沙灘充氣迷宮」啦！

南瓜兄妹一見到沙都唔肯落地 ><

我地都無理南瓜仔點叫，只係拖住佢，佢一路行一路講：「D 沙好拮.......」X n 次！

我就抱住南瓜妹......

南瓜仔就同 hd 一pair，我就同南瓜妹一pair，入去到，南瓜兄妹玩到不知幾興奮(真係超興奮)，南瓜仔完全唔記得d 沙拮到佢，我遠遠就聽到佢既既笑聲，而南瓜妹就好鐘意俾人(職員)射水，仲不停咁笑，仲要我來回幾次(俾人射水)添！

話明係迷宮，我真係迷失左路 ><

出到去時，南瓜仔已經到左終點 ......

佢地玩一次仲未夠，仲要玩多一次，咁就陪佢地玩多一次啦！！

南瓜妹真係好鐘意俾水射，明明全身濕哂都繼續係咁笑.........

我又一次迷失路，我好不容易先搵到出口，係呢個時候 ........ 南瓜好竟然用水搶射我地喎！？？真係大膽！！哈哈！

玩完，就同佢地行下沙灘，當我拖住南瓜仔行時，我覺得好浪漫！哈！哈！！



之後就去清洗同換衫，跟往就去左 ZAKS 係食午餐，佢地既食物又幾好味，價錢 $3XX。

可能南瓜仔好肚餓，不如食得幾好，不過南瓜妹都係唔多食 ><

食完後，就去玩下鞦韆，再搭巴士去愉景灣(北) .......

去到啱啱係泡泡表演，而南瓜兄妹無懼太陽，係陽光下企住睇人表演 (我真熱到暈！)，但我真係太熱，所以我好快帶佢地走人 .......

之後當然去影下相啦，海濱白教堂、鐘樓！！

最後，就回家啦！！

親子好去處@【2016 暑假】2016 書展 + 美荷樓生活館

未寫南瓜兄妹暑假活動前，寫埋又係 hd 同南瓜仔既親子時間先 (我要返工、南瓜妹返學)........

【2016 暑假】爸爸單拖系列：二

21/07/2016 (46M2D)

目的地：2016 書展

hd 係一個愛書之人，佢又點會放過書展呢！？？

不過，就不能好似以前咁，去自己鐘意既攤位睇書，而去小朋友攤位睇書 ......

詳情我都唔清楚，hd 只係話小朋友攤位也可以睇全日。

↑ 有講故事、試玩益智遊戲、有義工教綁鞋帶

而 hd 最後買左兩套益智遊戲俾南瓜兄妹玩 ........

佢地睇到差不多四點，之後 hd 就抱住南瓜仔 (瞓著左) + 拎住益智遊戲，就黎接我放工，再接妹妹放學！


22/07/2016 (46M3D)

目的地：美荷樓生活館

時代不斷咁變，但人既基本需要係沒有改變！！



當南瓜仔見到舊式家具時，他竟然知道係乜東東！？

計劃@【2016 暑假】

暑假啦 .......

南瓜仔 (暑假：15/7/2016 - 15/8/2016 )

2015年，報左游水班！

2016年，除左恆常興趣班外，仲報乜好呢！？我既要求得一個 --- 近屋企，唔想山長水遠搭車！！

小童群益會：要抽籤，hd 好似報左3個(只得幾個啱年齡)，最後抽中左「閱讀繪本創作園地」($150，5堂，1小時)！

馬會：足球班，網上報名，先到先得，$50，10堂 (仲送球衣 + 足球)，我地當然唔夠人快手，報唔到 ><  ....... 明年，一定要報到！！

其實我係想南瓜仔學畫畫，但問過 n 次，南瓜仔都係一口就推絕 ><

咁就算啦，就報一個啦！！


南瓜妹  (暑假：23/7/2016 - 15/8/2016)

2015年，無報

2016年，都乜都無報 (咁細個，無乜好報喎！哈！哈！)


暑假，都係多 d 親子時間，對嗎！？所以我同 hd 都係會輪住請假，希望好好陪住佢地！！

有乜計劃！？暫時只係安排左澳門三天遊咋！哈！哈！

我相信，只要有父母陪住小朋友，只係落樓下公園都好開心 .......


而我，當然會無懼太陽 (因為已經曬黑哂)，期待這個暑假！！

南瓜妹@歲半班完結

22/07/2016 (28M1D)

最後一天返學啦，真係真係好唔捨得啦 ~~~~~~


歲半班 = 18 個月班，香港並不多幼兒園會開辦。

幸運地，南瓜妹就係16個月開始入讀 (只收8個小朋友)。

對於南瓜妹讀歲半班，朋友一二三、路人甲乙丙，甚至家人都有不同意見，最常聽到 ......「咁細個就返學，好慘，不過俾佢玩下」

我地係在職父母，不在家時，只能交給工人同公公 .....

雖然工人姐姐已經在我家工作一段長時間，但我從來未放心過 (工人姐姐係 OK，但我唔知點解係放心唔落)，所以要公公幫手，但公公年紀不輕，我不想加重公公工作量！

南瓜兄妹返左學，我係放心好多 (我相信學校多過工人姐姐) .......

在南瓜兄妹不用返學，我地又要返工時，我係 cam 度大部份時間都係睇佢地自己同自己玩，工人去左邊！？做家務掛！？但公公話都唔知佢做乜！？日日都係左搬右搬，都唔知佢搬乜。而公公呢！？公公會坐係梳化望住。

對小朋友來說，自己同自己玩都係樂事，但若果日日都係自己同自己玩，就不是 (我自己覺得)！返學，起碼有老師、同學一齊玩 / 學習！

南瓜妹一向都係公公送佢上校巴(因我要送南瓜仔上校巴)，若南瓜仔不用返學，我定必送南瓜妹上校巴，但每次我送南瓜妹，南瓜妹一定會喊住叫我唔好走 ........

但最近送南瓜妹上校巴(因南瓜仔放緊暑假)，南瓜妹再沒有喊，仲同我揮手講bye bye，最攪笑係當天放學接佢時，南瓜妹：「媽媽，我今日(上校巴)無喊呀！」


自己心聲

由頭1-2星期返學有喊，到現在講俾我知學校既事，真係覺得南瓜妹成長不少！

有時見到南瓜妹識某一樣野/講，我問點解會識！？南瓜妹：「Ms Li 教！」

又成日同我講邊個病左無返學！(無返學就一定係病！哈！)


(一) 係開學頭半年，除左知南瓜妹識唱好多歌 + 自理能力不錯外，仲知道南瓜妹識認中文字 (唔......我無諗過未夠2歲就識到中文字)。

直至今年3月，南瓜妹 PN 面試，我諗住教佢顏色，我先知道南瓜妹已經識得分顏色  ><

再後期，更發現南瓜妹識得數 1-20、形狀、唱英文/中文/普通話歌、動物、物件等。(我係無教過南瓜妹。)

而令我最驚訝係南瓜妹係21個月，就識得回家分享學校事，每次南瓜妹分享時，我就覺得南瓜妹又大個左 .....

自理能力：用杯飲水 + 食飯 / 除(著)外套 + 鞋 + 襪 / 摺毛巾(入埋盒)+衫 / 自己揹書包

(二) 南瓜妹去完學校旅行(星期六)後，隔二日(星期一)既下午五時多，就收到其中一媽媽既 whatsApp 講佢女女中左手足口，當時真係晴天pig pig，因為南瓜妹旅行當天，全程都有同佢玩 ........

而當天晚上六時左右，就收到班主任打來既電話，叫我地小心留意自己小朋友。

係咁短時間就通知家長，真係值得一讚！

(三) 若有兄姐讀緊或讀過，基本上係必收。(超 like)

(四) 班主任 / ee 好有愛心 (我係問南瓜妹，南瓜妹：「好錫我架！」)

(五) 配合在職父母需要 (除左紅日 + 年初四五放假外，其餘日子都要返學)，學校旅行 / 家長日都會在假日(好多幼稚園都係平日攪)

(六) 全校既職工都識得南瓜妹 (我真係覺得幼稚園d職工好勁，個個小朋友都記得叫咩名，連南瓜妹既表姐都知係邊個，勁！)


好唔捨得這間學校，當知道佢地 PN 重開全日制時，真係想過唔轉校，但無奈 hd 最後都決定轉去學術性較高既學校。


學費：$6,566 (2015/2016，全日制)
學校：比華利中英文幼稚園 

南瓜妹@28個月

21/07/2016 (28M)

食
除左零食外，乜都唔想食， 已經唔想再講 ......

如廁
同上個月既進展差不多，都係屋企8-9成時間都係乾片！

最攪笑係佢vee vee 完要自己抺 pat pat (學校教) ....... 

瞓
都係晨早七點就起床，妹妹，你可不可以放假瞓耐少少呀！？？

發展 
說話能力：
- 有時聽到南瓜妹對話，真係笑了出來 ......
我：「妹妹，我唔舒服！」
妹妹：「媽咪你唔舒服！？」
我：「係呀！」
妹妹：「咁我今日自己瞓，唔駛陪我啦！」
妹妹：「媽咪，你瞓低 (指playmat)！」
之後我就瞓係 playmat 度
妹妹：「我拿個 pillow 俾你，好唔好！？」
妹妹就拎左cushion俾我 (未分到 pillow 同 cushion)
妹妹：「你要唔要水，我拎水俾你，好唔好！？」
真係好可愛呀！！


返學
臨離校前，我主動打俾班主任，問一問南瓜妹既情況 .......

班主任都答得好正面，會教同學野 (哈！識少少就扮代表) / 分享玩具 (係屋企唔會囉 ><) / 主動學習 / 聽音樂 / 說話能力佳，不過就話南瓜妹「有性格」(硬頸)，要多D指導佢，唔可以俾佢完全話哂事。


其他

-  16隻牙
-  23.1磅(10.5kg) 
-  同南瓜仔成日爭野，一爭唔到就出手(打)，出手唔得就喊同大叫，教左 N 次都係咁，唯有不斷不斷咁提佢地！！

親子好去處@【2016 暑假】香港科學館

19/07/2016 (46M)

目的地：香港科學館

hd 又獨自帶南瓜仔去玩啦 ~~~~~

首先去左睇「古怪動物園」，再係科學園館內遊........

聽 hd 講，南瓜仔又大個左啦，上次帶佢去 (27M)仲係一舊飯，現在樣樣野都走去玩、走去睇、走去八！！

hd 仲話南瓜仔玩到唔想走添 ><

之後就去左玫瑰堂 >> 食街邊食狗仔粉 ( hd 話佢食左好多喎！) >> 去佳佳食甜品

咁就回家午睡！！

南瓜仔可能太累，去到四點多仲醒，hd 竟然帶住瞓緊既南瓜仔黎接我放工喎！？？然後再去接妺妹放學........ 其實，我自已返屋企都得，唔駛黎接我喎！！

親子好去處@【2016 暑假】香港迪士尼

當大家都去過 N 次迪士尼時，南瓜兄妹先第一次去 ........

hd 一直都不贊成去，佢覺得去迪士尼唔可以好似去公園咁，要係 "奬勵" 情況下先可以去，而我一直都搵唔到藉口去.......

不過咁啱公司送左2張免費門票俾我 (指定日期)，所以南瓜兄妹有先得去，唔係的話都唔知等到幾時！哈！哈！

天氣咁熱 + 星期日兼暑假+ 二拖二去迪士尼，唯有出動手推車 (對上一次用已經係1年前了！)，原本我諗過帶2部，但屋企人話帶2部仲麻煩，若其中1個話要落地行， hd 一個人點推2架車呢！？ ><


17/07/2016 (45M28D) + (27M26D)

目的地：香港迪士尼



10:15 到達樂園

估唔到，原來我架bb手推車可以坐2個人，勁呀！唔駛抱 ~~~~ yeah！


10:30 明日世界 - 巴斯光年星際歷險

排到唔駛排都玩得，南瓜仔不知玩得幾開心，但妹妹一上車就喊住話要走 (可能未有心理準備！？)，但喊左一陣又無事喎！

之後我就去左「小熊維尼歷險之旅」拎 fast pass，11:25 - 12:25 就有得玩~~~~


11:00 幻想世界 -  小飛象旋轉世界

啱啱南瓜妹先喊完，hd 話妹妹實喊喎，所以臨上去前，我問南瓜妹玩唔玩，佢話要話，咁就俾佢玩下啦 .....

結果南瓜妹勁鐘意玩，完全無驚過！


11:20 幻想世界 -  灰姑娘旋轉木馬

南瓜妹一上馬已經話唔玩，但已經上左木馬，我就同佢講：「你放心啦，媽咪會捉住你架！」

當木馬開始轉時，南瓜妹立即停左喊，又無事喎 .......有無咁快呀！？攪笑！


11:35 幻想世界 - 小熊維尼歷險之旅

因為拎左 fast pass，唔駛點排隊.......

今次我同南瓜仔一齊坐，可能南瓜妹太掛住我，話要我陪佢 .......但當時已經上左車，無得再轉，不過南瓜妹都係喊左幾聲，又無事喎！！


11:50 幻想世界 - 皇室宴會廳 (午膳)

遇見朋友仔添！！

好彩我地早去，唔駛等位，亦不會點排隊買食物 .......


↑ 入到樂園，都知佢地食物唔會平，所以都係叫左兩個餐，咁就成為 $228 ...... 仲要唔好食！

南瓜仔都肯食，不過南瓜妹食左幾啖就話飽 ><


12:45 幻想世界 - 米奇幻想曲

見到唔駛排隊，就快快入左去睇添！

我仲擔心緊.....南瓜兄妹會帶住3D眼鏡呢！？全程無除過3D眼鏡，仲睇得好入神添！

最攪笑佢地真係諗住"捉"住 3D有野拋出來既畫面！哈！哈！


13:10 幻想世界 - 夢想花園 (影相時間)

hd 話點到要影番張相喎！我地揀左 mickey 黎影 ......

未影前，南瓜仔仲同妹妹講：「妹妹唔駛驚架！」

點知到我地時，南瓜仔唔肯單獨同 mickey 影喎，一定要 hd 陪佢，咁佢又叫妹妹唔駛驚！？

而南瓜妹真係有點怕，所以我就抱住佢影相！！


13:40 幻想世界 - 瘋帽子旋轉杯

hd 話玩，我話又玩！？ hd 就問南瓜妹，南瓜妹話要玩 ......

咁唯有玩啦 ~~~~ 

hd 轉得太快，攪到我有點暈 ><

但南瓜兄妹竟然無事，仲玩到笑到出聲添！！

(可能我有點暈，所以忘了拎風扇仔 ....... 結果就唔見左啦！)


14:00 幻想世界 - 「小小世界」

南瓜仔一路睇一路指住佢識既野，而南瓜妹仲跟住d音樂唱歌添！！


14: 20 影相時間 + 食雪糕 

hd 話一定要影下城堡，  不過呢兩個小朋友都唔多合作，攪左好耐都影唔到靚相 ><

之後我見到有人食 mickey 雪條後，立刻就要買俾南瓜兄妹食，佢地當然好好鐘意啦！可惜天氣太熱了 ......支雪條溶得太快，攪到佢地成身都係雪糕 ><

好彩我一早就預備左每人2件後備衫，所以就同佢地換埋衫 .......



14:55 探險世界 - 森林河流之旅

唔知點解南瓜仔竟然知d動物係假！？仲講：「有乜好驚，全部都係假！？」，乜d動物好假咩！？我唔覺得太假喎.......

原本想去「迪士尼魔法書房」，可惜去到時已滿左，無得去睇添 ><


15:20 迪士尼巡遊

只係路過，啱啱睇到南瓜仔最愛既 toy story ~~~~


15:50 反斗奇兵大本營  - 轉轉彈弓狗

南瓜仔話要玩！？我：「吓！」，心諗南瓜妹玩唔玩到架！？

我當然又問下南瓜妹玩唔玩啦，但南瓜妹答要玩喎 ....... 係唔係真係唔驚架！？

又係諗唔到南瓜妹玩得超開心！

呢個小朋友真係幾大膽喎 ~~~~~

原本 hd 「玩具兵團跳降傘」，但呢個既離心力太強啦，我一口就拒絕左 (其實唔知南瓜兄妹鐘唔鐘意玩呢！？)


16:30 探險世界 - 「獅子王慶典」  

因為睇唔到 「迪士尼魔法書房」，所以我地提早15分鐘到，唔想再錯失無得睇！

啱啱開場，南瓜兄妹睇得好投入，仲跟住拍手 .....

但當正式開始時，南瓜妹就有睡意，我就抱住佢瞓，可能d 音樂太嘈，南瓜妹瞓得不太好，瞓下又醒下 ......

我本人就覺得麻麻，但 hd 話好好睇喎><


17:30  離開樂園 

由於妹妹第二日要返(我要返工)，所以都唔好玩得太攰，唯有下次有機會先睇煙花啦！！

未出到樂園，南瓜妹就醒左！

而南瓜仔一上車唔夠3秒就瞓左 ~~~~~~


後記：

今次「旅程」好順利，排隊唔叫耐 (平均20分鐘)、又唔太曬 (大部有地方都有瓦遮頭，而且亦有地方 "嘆冷氣")、唔駛抱 (因為佢地坐哂係 bb 車)，其實我覺得幾爽！哈！哈！

親子好去處@【2016 暑假】小學母校 + 將軍澳中心

15/07/2016 (45M26D)

南瓜仔放暑期啦 ........

是日，請了半天假陪南瓜仔！！

第一件事係去我小學母校，點解會去！？因為要拎番「在學證明」(我張畢業證書已經唔知放在係邊了 ><)，因為自行分配可能會揀我母校(或者會揀hd母校，但hd既母校真的太遠，暫時未有定案)，希望可以成功入讀，咁就唔駛大抽獎 (等運到！)

原本我諗住叫 hd 幫我拎，但 hd 話不如帶埋南瓜仔去啦，咁佢又講得啱，帶南瓜仔去望一望，睇下佢鐘唔鐘意先 ~~~~~


目的地：小學母校

重遊母校，真係有好大既分別........


小學時，我記得學校條樓梯好長，但今日再見，e........ 點解短左咁多既！？哈！哈！

而學校方面都好好，都俾我帶南瓜仔影下相，而我仲一路行一路介紹俾南瓜仔聽！！

我：「呢間係媽咪細個讀書既學校，你鐘唔鐘意呀！？」

南瓜仔：「鐘意！」

我：「點解！？」

南瓜仔：「因為好大囉！」 (咁簡單就滿足左佢！？)

拎完入學證明後，就去將軍澳中心啦，而 hd 就要返工........


目的地：將軍澳中心 (巴西夏日熱浪充氣嘉年華)


黎呢度目的得一個 --- 玩吹氣遊樂場！！

呢度有2個吹氣遊樂場 (10米巴西亞馬遜充氣冒險區 / 20米運動狂熱充氣競技場)，每個 $50，每次 8分鐘 (係唔係好貴呢！？) .......

但若在商場電子消費 $100以上，就可以 $50 玩哂兩個！(正！)

又若果無乜人玩，職員都不會計時，可以任玩！(正！正！正！)

時間：12:00 - 21:00
日期：2016年6月30日 - 8月31日

我去到時只係10點，仲有大把時間，所以同南瓜仔四圍行下，食下雪糕，再食埋午(早)餐，咁就12點啦 (hd 就放埋工) ~~~~~

由於我去既時候唔多人，所以南瓜仔玩左45分鐘，係玩到南瓜仔唔想再玩，超正！！

玩完，我就要返工，南瓜仔同 hd 就回家，南瓜仔唔駛5分鐘，就瞓著左啦！哈！哈！

南瓜仔@K1完結

14/07/2016 (45M25D)

話咁快，K1就完結啦，真係有點捨不得 ........

呢一年真大轉變係返全日制！

小朋友適應快，所以無難度，哈！哈！ 

返了全日制 + 大了1年，當然有進步啦 ~~~

自理方面：自行食飯、自己去vee vee、著衫/換衫等

學習方面：一年三次考試 (要做卷)，南瓜仔竟然考第4名，最重要係見到各方面都有進步(學術、操行)，加上南瓜仔係細b，我真係無諗過呀！！

(派成績表當天，只係返半日，我同 hd 一齊接佢落校巴........南瓜仔見到我地當然好開心啦，仲立刻放低書包，係書包拎左成績表俾我 ......

呢一刻，唔通南瓜仔有獎囉！？？(個心真係"離一離")

但南瓜仔拎完成績表俾我後，仲繼續摷書包，咁好明顯佢唔係想俾成績表我啦！！><

最後，南瓜仔拎左架玩具車出來，同我講：「校巴 ee 送架！」 

我覺得自己好傻，生仔唔知仔心肝咩 .......

不過竟然俾左成績表俾我，我當然會睇啦 (因為一早就知道學校頭5名係有名次........)

睇左幾秒，見唔到有名次！？？心諗，都正常既，南瓜仔係細b，又係男仔，班上亦有好多小朋友叻過佢 ......... 但再細心睇睇(真係睇左3分鐘以上)，e ......... 原來考第四喎！哈！哈！)

升上 K2 後，就不像 K1 咁輕鬆 (K1 好簡單)，K2 課程會較深、多、教得快，所以聽d前輩家長講，真係要跟功課，唔 ....... 呢個 "任務" 就交俾 hd！哈！哈！

其他方面：多左講學校野，亦覺得南瓜仔是專心聽書既小朋友，點解咁講！？因為老師會同小朋友講要做乜，之後回家就要同家長講...... (例如：要帶圖書返學、不用帶書、不淮帶糖果 (生日會)、放假、返半日)，南瓜仔都能一一講俾我知，唔駛等 whatsapp 群組 (自己班)通知我！

希望南瓜仔會升上K2後會學業會繼續進步，亦會繼續開開心心！！

親子好去處@獅子會自然教育中心(西貢)

hd 係一個鐘意帶小朋友出街既爸爸！

我記得第一次係 fb 分享(單獨帶小朋友出街玩)時，身邊好多朋友都讚 hd 係好爸爸，我當時心諗「有乜好讚！？帶出街玩咋！？我都有啦 ......」，後來先知道原來並不是所有爸爸會咁做！！

是日，早上我要返工，我同 hd講 帶落 clubhouse 玩咪得，但hd 話要去西貢！？？咁遠！？仲要一拖二去添，不過竟然佢話可以，我都不會阻止佢！！(我平時一拖二只會帶落樓下會所 / 公園 /  商場！)

【2016 暑假】爸爸單拖系列：一


02/07/2016 (45M13D) + (27M11D)

目的地：獅子會自然教育中心(西貢)



唔.....詳情我都唔清楚，只知帶了南瓜兄妹睇提子樹，同埋去左展覽館！

之後就帶左佢地去食野！

最後，hd 就帶埋小朋友黎接我放工，原本諗住一齊午餐，但我見南瓜兄妹好疲倦咁，加上佢地都食左野，我就話不如回家午睡，而我就返屋企食麵 .......

親子好去處@MCL (海底奇兵2)

我地屋企係基本上唔開電視，而南瓜仔間唔中都有睇卡通片，但都係15-40分鐘左右 。(即係1-2 集：peppa pig、ben and holly little kingdom)

而南瓜仔第一次全套卡通片(1.5小時)睇哂(係屋企睇)係3歲之後 ..........

現在南瓜仔都差不多4歲，可以俾佢入戲院睇戲，而第一套睇既電影係「海底奇兵2」，而呢套卡通片，我地係半年前已經話帶佢去睇！！

南瓜妹就留在屋企，待3歲左右，我地先考慮帶佢去啦！！


09/07/2016 (45M20D)

目的地：MCL (海底奇兵2)

可能早上去完玩太累，好不容易先叫到佢起床，好彩去到戲院就精神哂！！

約埋表哥、表妹一齊去睇！

而醒目既媽咪們，一早就入戲院，拎定小朋友加高墊(椅)，南瓜仔太細粒，所以拎左2個墊俾佢，fit 哂！ 

去戲院睇戲點少得食爆谷呢！？南瓜仔仲好開心拎住，仲話要開場先食 ........

點知，南瓜仔太投入睇戲，竟然話唔食喎！？？

有些情節，南瓜仔有點怕，會用雙手遮住對眼，但係又係手指中間偷望喎！？呢d係乜心態呢！？

而表妹就一路睇一路講：「我唔想睇！」、「媽咪，我想走！」

對小朋友來說，呢套戲太多緊張位、內容不易明 (dory 有短暫失憶、回想以前片段，唔同第一集容易明白)，下次再入戲院，都係揀清楚d ~~~~~

親子好去處@烏溪沙海之心

09/07/2016 (45M20D)+(27M18D)

目的地：烏溪沙海之心

沿路有個好靚既海景，不過我就太熱，無心欣賞！！


而 hd 都估到南瓜仔會唔想行，所以就拎滑板車俾佢，呢兩個小朋友又爭一大餐 ><

好不容易先到左目的地 .........

呢度係有個有心伯伯，建立兩個「心型小島」，由於係海邊所以會受潮漲潮退既影響，潮漲時就 D 水太深，行唔到入去，潮退就變左無乜海中係中間 (變左唔似島)！！




呢度水深至大人膝頭 (上午11點左右)，不過d 沙石都好 "拮" ，所以真好著膠鞋.......

南瓜仔就係海中間，好開心咁影相！

而南瓜妹呢！？未入去已經喊住話唔入去，不過最後都俾 hd 抱入去！！

影完相，南瓜妹已經好急想走，結果.......對鞋濕哂！！！！

平時只會帶後備衫、襪，而鞋就無後備，最後全程只可抱住佢 .........

原本諗住睇完就去公園玩，但我已經半死 (我真係熱到得半條命，好彩唔駛我抱住南瓜妹咋) ><

所以就去左商場休息一下，再去圖書館借書，南瓜兄妹不斷自己拎書，本本都話要借，借完書就回家休息！！！

好彩可以回家午睡一下，充下電咋 ..........

而 hd 就無得休息，因為佢要去南瓜妹新校既入學簡介會 ><

親子好去處@中環夏誌

01/07/2016 (45M11D) + (27M9D)

目的地：中環夏誌

約了 6299 去金鐘飲茶，所以 hd 就安排去中環海濱公園一趟 ......

不過，天氣真的好熱、好熱、好熱，雖然小朋友係要多d戶外活動，但小朋友未有事，我就有事 ><

睇完就去左 IFC，再搭港鐵去金鐘！！


目的地：名都酒家


↑ 現在好少有既"推車"了

南瓜妹全程都要我抱住，一抱就2小時，佢仲要飲到一半就瞓著左，其實我都好累，連食都無得食！！

返到屋企我已經得半條人命，南瓜妹就醒左，我再無力陪佢玩，所以我就同南瓜仔一齊午瞓，hd 就同南瓜妹玩！！