親子好去處@2015 復活節 (day 1-2) - 香港單車館公園

連續五天假期，我想大家都累透，不過我相信又會好開心，可以日日親子樂........

我地日日唔係見表哥就係表妹，好似我無朋友咁！哈！哈！

03/04/2015 (30M15D) + (12M13D) - DAY 1

首先係「換季大行動」，南瓜仔/妹仲係著緊長衫，但天氣開始熱，唔可以再懶。

南瓜仔聽我指示後，就幫手將D唔要既衫放一邊，要既衫放另一邊.......

而南瓜仔一見到鐘意既衫，就放入衣櫃 (但係冬天衫)，話要著囉！ ><

最後用左3小時先完成「換季大行動」！！

午餐，表妹黎我家食飯同玩，食完飯表妹就返屋企午睡，而南瓜仔/妹都係午睡時間了！

到晚上，就約埋表哥、表妹去食晚飯！

揀左北角既素食‧ 分子，現在既素食真係唔似齋囉，味道都不錯架。

↑ 試埋分子雪糕(石板街)，味道一般，而且都幾貴，要$44一杯！

04/04/2015 (30M16D) + (12M14D) - DAY 2

目的地：香港單車館公園

待南瓜妹食完粥就出發，去到就大約11點半！

係搭緊港鐵時，我先記得南瓜仔係著左底褲，無換尿片，雖然出發前都去左vee vee，但都係有點擔心，所以去到目的地時，就快快換番尿片！！ (現時南瓜仔除左poo poo會係片外，即使屋企(著底褲)、出街、瞓醒全部都係乾片，不過出街同瞓覺都會換番尿片先！而南瓜仔係企係坐廁去vee vee，無用尿兜了！)

呢度有個草地，雖然唔夠佐敦谷大，但勝左係港鐵站附近(坑口或將軍澳)，又有商場，小朋友去洗手間都方便！！

我地帶埋帳篷、小食(士多啤梨、蘋果汁、餅乾)去.......

↑ 玩滑板車、吹泡泡、玩波(南瓜仔話要玩籃球，但當足球踢)、周圍走

hd就帶南瓜仔去埋遊樂場玩！ (此時南瓜妹已瞓著左)

呢一日都幾曬，南瓜仔曬都紅哂 ><

玩到1點就去食午餐，再等埋妹妹醒食奶，就行一陣商場......

↑ 去market place，南瓜仔見到細架既購物車勁開心，自己可以推住架車行 (唔俾我幫手)，買完野就回家午睡啦....... 

到了5點左右，爺爺嫲嫲就黎睇兩個孫！！

原本叫埋佢地留係我屋企食飯，但佢地話係屋企煮左飯，不留我家了！！


http://www.lcsd.gov.hk/tc/parks/ktp/index.html