南瓜仔@戒片大作戰(上)

day 1 (19/02/2015 - 29M) - day 43 (南瓜仔@戒片大作戰(前夕))

仲係著尿片，而我係定時定候帶南瓜仔去vee vee，除左出街，95%都係乾片(包括早上起床)。

不過天氣未回暖，所以未正式戒。

待天氣回暖，又係長(復活)假期，咁我就開始「戒片大作戰」.......

特別多謝表哥，南瓜仔係學表哥去vee vee (真人示範)，如果唔係，我相信無咁快戒。

南瓜仔無用尿兜了，直接企係大人坐廁，不過南瓜仔仲未自己拎起 JJ 去，要幫佢.......

↑ 戒片第一部就係著底褲 (戒片底褲) ........

day 44 (3/4/2015 - 30M15D) - day 51 (南瓜仔學校假期中)

屋企著底褲，出街同瞓就著尿片。

出街我都係照同佢去vee vee，因為商場既洗手間大部份都唔夠高，所以我就叫南瓜仔踏住我大腿去vee vee，我家姐話咁做好辛苦(我)，教我用"遮袋"(即係每逢落雨，商場放出來既"遮袋")，之後我就開始用"遮袋"，男仔戒完片出街真方便！！

結果：底褲濕過1次(南瓜仔係濕左先同我講要vee vee)，我同佢出街全部乾片。(有天hd同佢出街，hd話同佢出街前去左vee vee，之後話南瓜仔無飲過水，所以唔駛同佢去vee vee(去左大半天)，這是乜道理！？當然最後南瓜仔係濕片啦！)

day 52 - day 54  (南瓜仔學校假期中)

進展十分良好，所以我同佢出街就試著底褲。

初次著底褲出街，我就去屋企樓下會所同去母親大人屋企。而我竟然係無驚過 ........

結果：成功，無濕過。

day 55 - day 56

見南瓜仔戒片順利，咁返學都要戒埋。同老師商量後，只係返學/放學搭校巴時用尿片，學校著底褲。

結果：成功，學校無濕過。

南瓜仔屋企午睡，失手，張床濕左。><

day 57 - day 58

老師話南瓜仔進展良好，雖然未主動講去vee vee，但帶佢去，佢會去vee vee，所以唔駛再著尿片上校巴，全程都著底褲。

結果：成功，無濕過。

day 59 - day 60

呢兩日都有去「長途街」，無失手！

結果：成功，無濕過。

day 61 - day 62 (21/4/2015 - 31M2D)

正常返學，無失手！

南瓜仔好攪笑，同佢去poo poo，佢會數自己疴左幾多舊poo poo，數完要自己沖左去！

結果：成功，無濕過。

--------------------------------------------------------------------------------------------

這次「戒片大作戰」，都十分順利，過去既兩星期多，屋企只係濕過2次 (第一次係啱啱著底褲、第二次係午睡時)，出街同返學係0次。

自從用底褲後.......

南瓜仔再無疴poo poo係片度，只係1次失手(屋企，hd掛住同佢玩 ><)，仲會主動講poo poo。而vee vee 方面，雖然我仲有定時定候帶佢去，但南瓜仔亦會主動同我講！

瞓覺夜片就著，南瓜仔臨瞓前30分鐘飲奶(南瓜仔太瘦，除非佢主動話唔再飲，否則我會照俾)，雖然瞓前會去vee vee，早上亦乾片多， 但南瓜仔現在係同我地一齊瞓，都怕有乜意外，咁我地全部都無得瞓 ........

南瓜仔會同我講：「媽咪，我大個仔，唔著尿片，要著底褲。」 、又會show條底褲俾人睇：「我著底褲，無著尿片！」，只要小朋友ready，戒片不是想像中咁難！！ 

我既戒片方法係慢慢來(要夾埋我既長假又要天氣回暖)，成個過程只係瀨濕過2次，都算好叻仔。

我既戒片方法：
1) 願意及成功去vee vee (定時定候帶佢去)
2) 當習慣了，就係屋企唔用尿片，轉用底褲
3) 若成功，出街就用底褲
4) 得左！

最初帶佢成功去vee vee時，我就有獎勵俾南瓜仔，例如：誇張地讚佢、送貼紙 (反斗車王) ，以示鼓勵！

尷尬後話：
有次同南瓜仔去緊vee vee中，突然南瓜仔失平衡向後跌(南瓜仔係企矮凳去大人坐廁， 咁我當然有立刻扶住佢) ，但奇就奇左 .........明明佢去緊vee vee，但佢可以停止 vee，待我扶好佢後，佢又可以繼續vee vee喎！！(乜原來可以去去下停！？？)

下一個目標：自行如廁