南瓜仔@33個月

19/06/2015 (33M)


↑ 每日放工後，我同hd (若hd早放)都會帶南瓜仔去屋苑會所/公園/泳池、公園、商場 (冒險樂園/書局/超巿)、公共圖書館等.......

食
乜都話唔食、又扭來扭去 (都坐係椅上)、無端端話要食菠蘿牛肉，但都無煮！？死都話要食.......

抱入房「訓話」又試過、溫柔教佢又試過、大聲話佢又試過、唔俾佢食又試過、利誘又試過(只係未打過 ><)，雖然之後都肯食 (餵住)，但第二日又黎過，真係好鬼煩......

唯有寄望8月份返左全日制會有進步！

瞓
晚上，上床後，約15分鐘就瞓著。(有時我會諗，係唔係佢太攰，所以先扭唔食飯呢！？我有問佢想唔想瞓，佢又話唔攰！)

發展
1) 說話

上次提過話南瓜仔講野，對方未必明白......

咁啱我朋友既朋友係中大做言語治療師，所以我就搵左佢幫忙，經她初步評估，南瓜仔應該無問題，叫我再睇耐少少，再有問題先再聯絡佢！

亦多謝小檬媽提供既發音表。

- 有次我買完衫，南瓜仔就幫我拎住紙袋.......
我：「重唔重呀！？駛唔駛媽媽拎！？」
南瓜仔：「我拎到，好輕咋！」(之前會佢答「唔重」)

基本上南瓜仔表達能力都OK！

2) 自理能力

南瓜仔自理能力麻麻，深究都係自己縱容佢，自己俾藉口幫佢，例如.....

- 餵佢食飯(藉口：佢太細粒)
- 幫佢著/除衫(藉口：要趕返學)
- 拎書包 (藉口：書包重，有書2本、體溫表、水樽(裝了一半水)、毛巾連盒、食物盒、濕紙巾、口罩、密實袋，若放假仲有1-2本功課同手冊)
- 唔肯行 (藉口：(1) 可以抱得幾耐！？(2) 趕時間返/放學)
- 刷牙 (藉口：怕佢自己刷唔乾淨)

黎緊既暑假，我決定黎個大作戰，希望成功！！

- 如廁：之前一直都係著戒片底褲，可能底底太焗身，所以 JJ 都會痴住係身，我就幫佢哂普通底褲，但都要我幫 ....... 但老師同我講，話佢全程所有動作自己做哂，唔駛人幫！！

夜片戒埋，0 失手，不過就會著戒片底褲，萬一濕左，都有少少幫助！！有媽媽問我點戒！？是否無再食夜奶！？南瓜仔臨瞓前30分鐘會飲奶，可能南瓜仔瞓得好掛！？咁就戒左啦......

3) 其他 

↑ 行石礐，是日南瓜仔話要行，見唔太危險，我都無理佢，只係同佢講：「小心跌」，話口未完，南瓜仔就跌左地上，仲講：「好痛！」，我無扶佢起身，等佢自己起 (當時我仲諗佢會不會再行)，南瓜仔再行，行了幾步又失平衡，南瓜仔又再行........ 行行下又再失平衡，仲要pat pat 落低，講：「pat pat 好痛！」，不過佢自己又起返身，再行！(我俾佢咁行，第一是學平衡、第二係唔好怕失敗，從遊戲中學習)

經過N次既練習後，佢越行就越好，終於有一次行足全程無跌過，佢個樣仲好似好滿足！！

- 終於用花灑沖涼同洗頭。

返學
有個whatapps群組，有媽媽會接送學校，所以會知道學校發生咩事，亦會係群組分享......

- 有一排成日講要用八達通搭車，我都無特別留意，原來老師教用八達通搭交通工具。
- 同我講佢整啫喱，要用熱水、之後要放入雪櫃，原來老師教整啫喱。

與同學相處.......

- 經過某屋苑，南瓜仔話M(男)同學住呢度，之後我問果家長，原來真係住某屋苑。
- 搭港鐵時，用左右手指扮閂門(仲發埋嘟嘟聲)，話係M同學教佢，我又問M家長，原來佢阿囝成日都係咁玩！！

見南瓜仔返學有好朋友，我都好開心，希望南瓜仔日日返學都咁開心！！

又係因為有呢個group，更知道男仔女仔/大細b既差異，但我暫無意俾南瓜仔做超大b，或者睇埋今年K1讀成點先！！

其他
- 24.5磅 (11.2kg) - 點解長期都無乜重過！？？
- 16隻牙