親子好去處@香港單車館公園

13/06/2015 (32M25D)+(14M23D)

目的地：香港單車館公園

又黎香港單車館既草地，今次係約左南瓜仔既同學仔 ^^

南瓜仔成日提住 M (男)同學，成日話要同M玩車 .....有一天，我有事要問班主任，問完之後順便問埋南瓜仔是否成日同M同學玩，原來佢兩個真係好friend，而且班主任仲話M同學(超大B)好照顧南瓜仔添 ......

我就膽粗粗約M同學既媽咪，原來M同學都成日提住南瓜仔 (果然好 friend 喎)！！

原本諗住係草地玩踏單車、足球、泡泡，但天氣真係熱到暈，所以只係草地/遊樂場玩左一陣，就轉去室內！！

↑ 香港單車館入面有個兒童遊戲室(極限運動)，不過我地去到時啱啱滿額，所以我地就係出面一路玩一路等，南瓜仔見到M同學既單車，兩眼發哂光，成日都要玩人地架車，而呢個車又係M同學既心肝寶貝，所以都好不容易叫佢地一齊分享！！

輪到佢地入到去，佢兩個都玩到癲哂，不停跳、不停走、不停上上落落，由於這個場都好安全(仲要有冷氣)，所以我就同M媽咪企埋一邊傾計 ......

↑ 玩到中途，因為hd要下午返工，所以就帶南瓜妹回家先 (佢地兩個無理過南瓜妹，好彩南瓜妹都有入去玩！)，我就繼續留下，等佢地再玩多一陣 .......

去到12點多，佢兩個已經好累，係時候要休息一下，我地仲一齊食埋午飯，之後就回家......

返到屋企已經2點，南瓜仔唔駛5分鐘就瞓左 ~~~~

地址：將軍澳寶康路105-107號


目的地：屋苑會所

當南瓜仔瞓左後，我就帶南瓜妹落會所玩 (雖然我好累，但我都想同南瓜妹玩，又怕佢嘈醒南瓜仔)

我係第一次單獨帶過南瓜妹落街玩，次次都係同埋南瓜仔一齊，所以我好珍惜呢個時光！！


↑ 波波池

玩1小時後就回家，返到屋企南瓜仔就醒左，佢兩個又一齊玩過！！

之後就餵南瓜妹食粥，食完我就要同南瓜仔沖涼，但南瓜妹又樹熊上身，唔肯同工人姐姐玩，我呢個「24孝」媽咪，就帶埋南瓜妹一齊，南瓜妹就坐係椅子度，我就同南瓜仔沖涼 ......

同南瓜仔食飯，又係用了九牛二虎之力，先攪得掂佢食飯！！(真係煩死人！)

到同南瓜妹沖涼，南瓜仔無端端入埋黎洗手間，話要睇細妹沖涼喎 ><

正當我同南瓜妹著衫時，hd 才回家，唔好以為今日叫攰，第二日既活動我仲攰 ..........