南瓜仔@40個月

19/01/2016 (40M)

咁就40個月啦，呢篇係南瓜仔第39篇生長日誌 (13M，因 yahoo 搬遷停左一個月).........

食
都係唔飲湯、唔食菜 .......

無再剪食物 (除非佢要求)，等佢自己食！

瞓
晚上，15分鐘內就會瞓著。

發展方面
對話：
我正在洗白白時，南瓜仔敲洗手間門：「媽咪！媽咪！」
我：「咩事呀！？」(唔通 vee vee！？)
南瓜仔：「爸爸係你銀包拎你既錢呀 ......爸爸係你銀包拎你既錢呀......」
我：「吓！爸爸係我銀抱拎錢！？？」
南瓜仔：「係呀！ 」
我：「哦！唔該哂你呀！」
爸爸：「爸爸拎錢俾姐姐買餸！」
(我真係覺得好好笑 .....哈！哈！哈！)

南瓜仔食完晚飯，我見佢鬼鬼祟祟 ........
原來佢拎住盒 tic tac 糖，仲俾我見到佢口中有 "白色既野"！！
我：「你係唔係食 tic tac 糖！？」
南瓜仔：「無呀！」
我：「你個口有糖喎！？」
南瓜仔：「飯黎架！」
我：「飯！？你開個口俾我睇！」
南瓜仔二話不說就食左落肚，仲好堅持係飯 .......
我就立刻放下自己碗飯，抱住南瓜仔：「如果你食左 tic tac 糖，媽咪唔會鬧你，但如果你講大話，媽媽就會唔開心！咁你有無食 tic tac 糖！？」(重覆左3次)
南瓜仔就望住hd：「爸爸，你唔好望住我！」
hd 就無望佢。
南瓜仔就係我耳邊 (細細聲)講：「我食左 tic tac 糖！」
我：「咁你下次食就要同我或者爸爸講，唔可以自己再拎黎食！」
南瓜仔：「ok！」
(唉！咁細個就識講大話.........><)

南瓜妹好怕 big bad wolf ......
南瓜妹唔肯食飯，南瓜仔就打電話 (用自己隻手扮電話)：「喂！ big bad wolf，妹妹唔食飯，你黎捉佢啦！」之後就"收線"。
南瓜仔就對南瓜妹講：「 big bad wolf 係出面啦！」(指住屋企門口)
南瓜妹就會扁住咀：「唔好呀！」之後南瓜妹就乖乖食飯 .......
南瓜仔又再打電話(用自己隻手扮電話)：「 big bad wolf ，你唔好黎啦，妹妹食緊飯！」
南瓜仔對南瓜妹：「 big bad wolf 走左啦！」
南瓜妹又會笑番！！
(我又覺得呢兩兄妹好攪笑......)

打(真)電話：
南瓜仔會自己打電話俾我  .......
有次送佢上校巴，臨上車前我同南瓜仔：「不如你放學返屋企俾我，話你已經返左屋企！但唔駛公公或者姐姐幫你喎 ........」
南瓜仔：「好！」
到放學時間，我係cam度已經知道佢返到屋企 .......
隔了一陣，我既電話響起，傳來南瓜仔既聲：「媽咪，我返到屋企！」(真係幾 sweet)

打俾我：「媽咪，我可唔可以食香蕉！？」
我：「可以！」
南瓜仔：「好野，可以食香蕉！」 

返學
無乜大分別！

情感方面
都係鐘意同妹妹玩！

但間唔中對住妹妹講：「我以後唔同你玩！」

健康
- 無端端又會發燒，但無鼻水、無咳，帶去睇醫生都係無講到原因！？d 人話係發骨節！？但我又唔覺南瓜仔高左喎！？
- 體重： 27.4磅 (重左喎！？？)