南瓜妹@PN大作戰(5) - 國際英文幼稚園

23/01/2016 (22M2D)

由我同南瓜妹面試，而 hd 就同南瓜仔係出面等我地 .......

登記完，就入學校既 playgroup 玩，佢地既地方真係好大呀！！

玩左一輪就去佢地既幼稚園校舍，老師安排左 6 個小朋友一張枱，枱面有d玩具俾佢地玩，但南瓜妹無興趣，仲四圍走去其他枱拎玩具 ><

好不容易先等到叫我地去面試室，係 group in，有2排椅子 (圍半圓)，小朋友坐前面，家長坐後面！

老師事先講明唔好幫小朋友，仲俾左份問卷我填，我都知份問卷唔係重要，所以都係 hea 填！

1) 老師一個個問小朋友叫咩名，南瓜妹無答。

2) 行出去老師枱，將指定物件(提子)放入指定顏色籃，南瓜妹無做，不過就返埋位拖住我手行出去，之後好好慢好慢先放將提子係指定既(黃色)籃。

3) 講出動物名，南瓜妹無答。

4) 將花放入花瓶，做到。

5) 同老師圍圈跑，無做，呆企。

面完試，我真係有唔開心，我仲問南瓜妹：「點解唔答老師問題！？」

南瓜仔 in PN 時已經 in 得麻麻，但話哂都係細b (12-18M) 唔識答問題(上當年仲未識講野)都正常，不過南瓜仔都會做哂指令，又唔會喊又唔會扭，更唔駛我抱 ........ 而南瓜妹無論說話能力、表達能力都比南瓜仔好好多，為何面試比南瓜仔更差呢！？？？

隔了多天，心情先平伏左，或者我對南瓜妹有較高期望，所以就失望越大！！