親子好去處@香港足球會 (同學仔生日會) + 皇室堡 + 調景嶺體育館(兒童遊戲室)

 是日行程好豐富 ........

10/01/2016 (39M22D) + (21M20D)

去南瓜仔既Alicia (同學)生日會，我呢個懶媽咪去到當日先去買禮物 ..........

所以我地就係屋企樓下食完早餐，就出發去銅鑼灣啦！！

目的地：皇室堡


↑ 見到有 peppa pig，就同南瓜兄妹影下相，要影佢兩個合照，真係好難 ><

之後就去左玩具反斗城買禮物，買完就出發去生日會啦！！


目的地：香港足球會 (生日會)



Alicia 媽媽安排兩個吹氣彈床同小型波波池，仲有「特別嘉賓」！！

只係兩個吹泡跳床，南瓜仔而且玩到唔停，連食都唔駛食 ........

而南瓜妹就唔夠膽玩，不過就不停咁食野，仲食左2件蛋糕添 (唔好俾 hd 知，一定俾佢話我！)

臨走前，南瓜妹先肯玩小型波波池喎 .......

南瓜兄妹一上車，就瞓左啦！！

事後，我先知有個女同學主動錫南瓜仔塊面 (個家長仲影埋相俾我睇！)，睇到我眼凸凸 .........最攪笑係我俾南瓜仔睇番張相，南瓜仔流露著滿足既眼神，仲要睇幾次張相添！！


目的地：元氣壽司

回家休息一陣後，我地就出發去食晚飯 (17:30) .......

無錯，我地未到六點就去元氣壽司食晚飯 (價錢一般又好味既餐廳，一定要好早搵位)！！

去到時我地唔駛等就可以入坐，但未到六點，出面已經有好多人等緊位！！

最開心就係南瓜仔，佢好「享受」拎壽司既動作，每次拎完都好滿足，而我都好想去試下「高速線壽司」，南瓜仔一定好開心.........

食完大約 18:30 (真係好早 ><)，餐聽只係叫緊 15x 號，而籌號已經拎到 19x，係唔係好誇張！？


目的地：調景嶺體育館 (兒童遊戲室)


↑ 時間尚早，所以去調景嶺體育館 - 兒童遊戲室 玩( hd 話已經玩左成日！？點解仲去玩！？因南瓜仔講左成個星期，而我地平日又帶唔到佢去，現在有時間咪去囉！！)，我地仲諗住呢段係食飯時間，應該無乜人去，點知 FULL 哂喎！？？

原本諗住走人 (都無得玩)，職員就叫我地等下，睇下有無小朋友走，有小朋友走就可以入去玩！我心諗 .......邊有可能有小朋友走架！？但南瓜仔話要等，咁就等下啦 .......

南瓜仔就真的好乖，自己企定定等有小朋友走，點知，真係有小朋友只係玩左 15分鐘就走人！？？

南瓜兄妹玩得勁開心，聽到佢地既笑聲，連自己都開心埋！！

返到屋企我已經好累，南瓜妹上床無耐就瞓左，原本我都諗住南瓜仔都好快瞓著，點知係張張好耐仲未瞓著喎！？？最後差不多11點先瞓著 (是否太興奮呢！？)。而第二朝起床後，南瓜仔第一次同我講：「我好眼瞓！」......