南瓜仔@32個月

19/05/2015 (32M)

我見bloggers友們都寫得好詳細， 攪到我好hea咁，等我寫多少少......

食

咩菜都唔食，唯有食水果，起碼都有纖維......

肉都ok，但會今餐無雞就話食雞、無牛就要食牛。

明明前幾日好鐘意食蛋，下次又唔食......

好難捉到佢鐘意食乜餸！

現在會自己用筷子夾餸(費時夾左俾佢話唔食)，不過佢一係唔夾，一夾就夾好多 (係多到一定食唔哂)，仲講：「唔俾爸爸 / 姐姐食，我食哂！」(

早夜仲飲配方奶，南瓜仔偏細粒，到有一日佢同我講唔再飲，我先會停！

瞓

返學：早上07:25起床(叫醒佢)，放學會係校巴瞓(1 小時)，晚上就21:30 上床，約15分鐘就瞓著。

但如果回家再午睡(我已下令唔好再俾南瓜仔午睡)，佢夜晚就一定好夜瞓，一時又話要vee vee，一時又話要poo poo，好啦，帶佢去poo poo (都知道無)，仲話：「呢......點解無poo poo既！？」=.="！

放假：朝早自己醒 (08:30 - 09:00)，午睡就睇去街既情況，平均瞓1-2小時。

發展

1) 說話

最近都見有bloggers分享小朋友發音不正確，我都發現呢個問題 .......

南瓜仔講野我九成都明白，但當南瓜仔同其他人講野時，對方未必明白，我應該再點教佢呢！？

有時，南瓜仔對既對答，係我意想不到的.......

我：「你快點瞓，明天叫公公帶你去冒險樂園玩！？」
南瓜仔：「公公無錢喎！」 (點解佢會知去冒險樂園玩要錢！？)
我：「點解公公無錢！？」
南瓜仔：「公公無返工嘛，要睇(照顧)住我！」(點解佢又知公公無返工！？)
我：「咁邊個有錢！？」
南瓜仔：「媽媽囉，媽媽有返工嘛！」

南瓜仔正在午膳：「媽媽你走啦，我睇住妹妹！」
我：「咁你要睇住妹妹喎！」
南瓜仔：「得啦，我食完飯同妹妹睇書！」
攪笑！

有次南瓜妹食玩具......
我：「叫左你唔好食，你又食！」
南瓜妹咁就喊.....
南瓜仔就行去妹妹：「妹妹唔好喊！」
南瓜仔對住我講：「無下次！媽媽，唔好話妹妹啦！」
我繼續話南瓜妹：「媽咪講左唔好食玩具，妹妹唔聽！」
南瓜妹當然係仲喊啦！
南瓜仔抱住妹妹：「妹妹，我抱住你啦，你唔好喊啦！」
南瓜仔就去拎紙巾幫妹妹抺眼淚........
不過妹妹唔領情，自己拎番紙巾自己抺！哈！哈！

2) 自理能力

- 如廁：南瓜仔除左夜晚瞓覺外，都再無著尿片啦！！

poo poo 會自己講。上個月既 vee vee 我會定時定候帶南瓜仔去，今個月就等佢自己講 (除臨瞓前)，不過時間隔得太耐(2小時以上)，我都問下佢去唔去vee vee。

結果：1次失手vee vee，2次失手poo poo。

自己會企係凳仔，然後自己除褲，拎起自己既衫，不過仲未識自己拎起JJ去vee vee。(是否太多野做呢！？)

poo poo 就要抱佢上去(大人廁所+小朋友廁板)坐，不過佢都會坐好耐，成日要玩門，問佢屙完未，佢一定話未。(唔知真定假！？) 同佢講屙完先叫媽媽，行走唔夠2秒就叫我，但仲係話未屙完！！=.="

夜片，全個月1次失手 (半夜無端端起身，我都估到會失手)，但就係呢1次，攪到我唔敢唔同佢著片，萬一濕左就好麻煩，或者睇多一個月先！！(我覺得要戒夜片，最重要係瞓得好)

- 其他：南瓜仔自理能力好一般，其實好多野係做到，只係佢太懶，好似早上自己換校服(去街 / 沖涼就等佢自己做)就要我幫佢 (我係唔係要再提早叫佢起床！？)、食飯去到中尾段又要我餵！

3) 小肌肉能力

有次見到表妹V 字手勢，我先知南瓜仔唔識做。所以今個月用包、剪、揼形式教佢，用左幾日，南瓜仔終於做到。

4) 自制能力

平時我俾佢鐘意既零食，佢會二話不說放入口！

我就同南瓜仔做了個測試......

我拎住2粒佢鐘意食既糖，拎住1粒糖同佢講：「我現在俾1粒你，如果媽咪完換衫、去埋洗手間同洗埋毛巾後(約5分鐘)，若你仲未食呢粒糖，我就俾多1粒你！」，之後就俾左1粒糖佢！

結果，一直拎住係手，原來南瓜仔既自制能力都不錯。

5) 管、教

是非、黑白就無得錯(當然有些係灰色位)，但點教就無一定「標準」，個個小朋友性格不同，朋友用A方法，唔代表我用A方法 work ......

我唔鐘意別人係我教小朋友時"插嘴" (可以事後分享)，當然我用既方法未必最好，但若我教緊小朋友時，旁人加意見，南瓜仔就會覺得「原來媽媽唔啱！」，咁對我之後教佢就會更困難，所以hd教南瓜仔時，我唔會出聲，即使我覺得佢咁教既方法不太合適，最多係事後再講番！！

南瓜仔麻煩既地方.......

- 唔肯拖：睇心情，有時會拖到你實一實，可以全程唔放手，但又時會自己走來走去，要同佢講一大堆說話先肯拖。

 - 唔肯行要抱：返學真係無太多時間，我多數會話行到某某地點(唔可以太遠，要佢望到目標)就抱，出街就會氹下/講下道理，佢通常都會肯行一段距離。

- 唔肯食飯：用過好多唔同方法，都唔係work ......><

- 唔聽指令：叫佢影相，十張有九張都企唔定！

- 推小朋友：南瓜仔會推妹妹 / 表妹，當然我會立刻停止佢，但佢既目標好清晰，來來去去既目標都係幾個，佢唔會推表哥 / 表弟。

- 唔肯分享玩具：叫佢俾妹妹玩，佢點到唔俾！

以上既野，學校無發生過，結論係南瓜仔成日都蝦我呢個媽咪 ><

返學

上個月尾有家長日，老師既評價好正面 ................

第一學期：4個 Satisfactory，9個Still Developing，0個 Improving
第二學期：9個 Satisfactory，4個Still Developing，0個 Improving

- 學校會同老師英文對話，同學與同學之間應該就以廣東話為多 (NET老師，佢話唔知佢地講乜，所以我地估係廣東話)
- 主動同老師傾計 (之前係唔肯講野)

- 好nice，會分享玩具，會同同學仔地玩

- 好乖，聽老師指令，唔會走圍走

其他
- 24磅
- 16隻牙