南瓜仔@Variety Show

前言

係3月時，學校已通知有Variety Show，我仲問南瓜仔表演乜，當時佢未答我！

大約個多月前，南瓜仔無端端係屋企唱「Mickey Mouse，Mickey Mouse......(其他我聽唔清楚佢唱乜)」，跳埋舞仲要有節拍添，再係家長whatppas group 知道佢地係表演呢隻舞......

我係有點期待，不過我都係預左佢係「零」反應 (應該唔會喊掛！？有家長話擔心會喊....)，事關上次games day 同 學校旅行，學校都有安排佢地跳早操舞，但佢兩次都係無跳，但佢成日係屋企跳早操舞囉！><

今次仲要係大舞台表演(學校係book左出面既場做表演)，咪話唔驚！！

09/05/2015 (31M20D)

原本南瓜仔係車上仲好好地，點知......

南瓜仔：「媽咪，我唔去表演，我要返屋企！」

我 (吓！發生咩事！？點解咁講！？)：「老師等緊我地喎，我地要去架！」

之後又講：「媽媽，我肚仔痛！」(唔通肚仔痛，要返屋企poo poo！？)

我：「你係唔係要poo poo！？」

南瓜仔：「係呀！我要poo poo......」

當時係車上，唯有幫佢著住尿片先，同佢講屙係尿片度 ........

我：「屙左未呀！？」

南瓜仔：「未呀，媽咪抱住屙！」

咁唯有抱住佢屙啦！

結果，佢係無屙度 (南瓜仔次次話屙一定會屙到，唔通佢太緊張！？)，不過我擔心表演時突然要 poo poo，所以都無幫佢換返底褲。(因為佢著埋表演衫褲，萬一有乜意外，我無後備衫褲俾佢換！)

去到目的地既大門口，南瓜仔：「媽咪，我唔入去！」

咁我都係要帶佢入去架，去地課室門口，南瓜仔都係唔肯入去，拖實我！

幸好，入到課室，佢見到班主任/同學仔，班主任應見到佢果樣有點不開心，主動抱住佢，佢又無野喎，咁我就快快出番課室門口.......

之後我就同hd入去禮堂等睇表演！！

由其他班表演先，我見到校長係台下一齊跳，我想校長應該7班pn班都去過睇彩排，如果唔係.....佢又點會識得跳呢！？

南瓜仔果班安排左第4班表演，心怕南瓜仔見到我會無反應(學校安排左影相區)，所以我用手提電話遮住自己既樣 (加上我要錄南瓜仔表演)，hd 就後坐位度用相機影相！

表演開始啦........

↑ 南瓜仔排第二行左邊第一個位(通常第一排係跳得好既同學，所以我預左南瓜仔排後排，好彩係台上最左邊，所以錄/影足全程)，全程都有跳，跟足舞步(拎住啦啦球向上/向下/打圈、自己原地轉圈/蹲低等舞步)，雖然跳跳下離哂隊，但完全超出我預期！！

最令我驚訝，係佢地全班既小朋友都有跳足全程，係一個怕生環境(唔係學校表演)，仲要係台上見到一大班觀眾(估計有300名家長)，無怯場，老師既教導真係不能不讚！！

↑ 表演完畢，學校仲安排小朋友們送禮物俾媽媽 (母親節嘛！)

返到屋企，南瓜仔睇了10多次表演短片，我想佢自己都滿意自己既表演！哈！哈！

不過，我呢個媽咪睇左30多次以上！ 哈！哈！哈！哈！哈！哈！哈！哈！哈！哈！