親子好去處@沙田馬場(開季試閘樂滿FUN 季前嘉年華)

暑期完左，我就不會在返學前一日「玩盡」去，一來我唔想佢地太攰，二來怕佢地唔想返學。

但會在星期六及長假期，玩得「盡」少少，佢地仲係細，應該玩多一點，去到小學就無得玩得咁多！

而有私心既我，都知道小朋友越大就不會跟住我，我會好好珍惜呢幾年既時光。

29/08/2015 (35M10D) + (17M8D)

要一早買票入場券 ($60，3歲以下免費  - 包 $40遊戲券 + $10 飲食券)，而且仲係要指定投注站買，雖然係麻煩左少少，但都決定去玩！！

目的地：沙田馬場(開季試閘樂滿FUN 季前嘉年華)

是日南瓜仔原本要學游水，但因某原因已延期左，所以我地就可以早點出發，去到時只係10點半，人流不算多！！

 
原本係11點先入場，但開場前10分鐘就落雨，大會就早左5分鐘俾我地入場，太好啦！！

不得不讚今次既活動，大部份既活動都係室內或有蓋地方進行 (即馬場港鐵站)，加上落住雨一d都唔熱，我最初中怕會中暑添！哈！哈！

入到去，第一件事就係同與雪特蘭小馬影相 (現金$20)，可惜南瓜兄妹唔多合作，影都勁差囉！！

可能早去，地方又夠大，人流都分都好散，每個遊戲都係等數分鐘，勁正！


↑ TVB Fun (免費)，只係將舊野推去指定既線度！


↑ 考考你眼界 ($10 遊戲券)，係hd幫南瓜仔，所以一take過！


↑ 考考你眼界 ($10 遊戲券)，中哂5個，勁  (當然係hd協助)！


 ↑ 小馬愛射籃 ($10 遊戲券)，頭7個波都唔中，hd 唯有抱南瓜仔係籃前面 ........當然最後 3個都中啦！！


↑ 尋找小馬的失物 ($10 遊戲券)，南瓜妹一見到波就話要玩，而南瓜仔就係"釣"d 小馬配件，然後貼係塊板緊！


↑ 大型波波池 ($20 遊戲券)，波波池又點會放過呢！？呢2個小朋友勁 like ......

之後就上左去平台玩 M4 「軌馬」迷你四驅嘉年華，南瓜仔一見到四驅車就開心都暈，差點不想走添！！


↑ 寄給自己的名信片(免郵費)，兩個一齊 (其實係大人寫)寫名信片，做個紀念都唔錯！


↑ 幼兒小天地 (免費)，遊樂場佢地又點會放呢！？

玩到呢度差就係會場買左 d 小食，估唔到南瓜仔食好多野，我諗佢好餓喎！

食完就去下一站玩，此時，南瓜妹已經好累，抱左唔夠5分鐘就瞓左 ......


↑ 南瓜仔就去玩巨型吹氣彈床 ($20 遊戲券) ，呢度大部份彈床都係 6 歲或以上，好彩有1個係 3 歲以下！

 
↑ 水上單車 ($30 遊戲券)，呢個差不多等左半小時 (人潮高峰期)，南瓜仔雙眼已跌哂落黎，不過一落去玩，成個人都醒哂！！


↑ 最後就俾南瓜妹扮騎師 ($10 遊戲券)！

我地玩到差不多四點，就去娘家食晚飯，南瓜仔上車唔夠5分鐘就瞓左！

地點：沙田馬場

南瓜妹@PN大作戰 (序)

又黎大作戰，可能有南瓜仔既經驗，南瓜妹又係大b，又唔係龍年 (馬年有6萬個bb，其中3萬係單非)，早前講過南瓜妹會讀18個月班 (南瓜妹係16個月多就返學)，基本上可以原校升PN、K1，所以相對無咁擔心.......

現有2個計劃 .....

1) K1 報龍校，原校(18個月班)升PN！

2) PN 報心儀幼稚園，可以直升 K1， 唔再考其他幼稚園！

所以計劃報5間幼稚園 (上當年南瓜仔報左14間) ........

 
↑ 證件相 (屋企自己影，然後用software 整證件相，再拎去哂！)

其他物資：信封、郵票 (屋企仲有存貨)，仲有係出世紙同針咭影印本！

有一間PN係我超心儀，但係EK睇係超超超難入，不過都係平常心啦，幼稚園點收生真係無人知，in 得好未必收，in 唔好可能會收！！

親子好去處@mega box (表哥生日)

22/08/2015 (35M3D) + (17M1D)

目的地：mega box 

Frozen 係表妹最愛，咁就約埋一齊去影下相 ......

↑ 南瓜兄妹對 Frozen 一般，所以佢地見到都無乜大興趣！！唔知南瓜妹將來會否「中毒」呢！？

而今次去 mega box 既重點係去IKEA，屋企真係好多雜物 (主因屋企太細)，最煩係南瓜仔無寫字枱，因為黎緊 K1 就要做功課，點到要諗下辦法，唉！


↑ 南瓜仔真係好鐘意去IKEA玩，最鐘意玩轉轉椅，仲要拖住南瓜妹玩......

南瓜仔：「你去入玩，我轉你啦！」

南瓜妹好開心咁玩，而南瓜仔又好開心咁轉 .......

等 hd 買完傢俬後，我地就出發去食晚餐！！

表哥揀左 Ruby Tuesday 預祝生日，但南瓜仔不斷講：「我要食薯條、我要食薯條！」，當薯條黎到時，又二話不說將薯條放係自己既隻碟度.....

我：「你唔可以拎哂d薯條，其他人要食！」

南瓜仔：「我驚佢地食哂我d薯條！」

有無咁鐘意食呀！？？仲要一拎走佢薯條就大叫，真係好煩呀，好不容易先攪得掂佢！！


↑ 食埋生日蛋糕， 不過要成八百幾蚊，我就唔捨得買！！

南瓜仔@牙痛！？？

18/08/2015 (34M31D)

南瓜仔食午餐時已經話牙痛，晚餐仲一啖都無食，好彩肯飲奶。

我諗，應該係出牙！！

19/08/2015 (35M)

學校肯食午餐，但返到屋企就話牙痛，晚餐都係一啖都無食，但好彩肯飲奶。

叫南瓜仔開口俾我睇，可惜南瓜仔唔多肯開口俾我睇，我又唔見唔到有"白色"既牙出喎！？？咁點解會牙痛呢！？

20/08/2015 (35M01D)

我一直以為南瓜仔未出哂牙，點知原來佢已經出齊牙(粗心大意既媽咪 ><)，咁即係唔係出牙啦，唔通係蛀牙！？？？ ><

咁細個就蛀牙，咪好慘！？點睇牙醫！？南瓜仔一定唔肯開口俾醫生睇啦，點算呀！？

南瓜仔20個月就戒左奶樽、早晚刷牙 (hd 話我幫佢刷得唔夠乾淨！)、又見唔到佢d牙有黑點 ........ (一連串既問題係我腦海中！)

到晚飯時，南瓜仔一啖都唔食，一放入口就喊住講：「牙仔痛！」，要我抱住佢，仲抱抱下瞓埋添，當時未到八點！

見佢好似好攰咁，所以連奶都無叫醒佢飲，等佢好好休息，但南瓜仔瞓瞓下，突然大叫：「媽咪，我唔刷牙，我牙好痛！」，咁我就立刻抱起，安慰一陣，佢又瞓番！(這一刻，心都痛埋！)

21/08/2015 (35M02D)

7點起床，就話要 Poo Poo，點知Poo Poo唔到，仲嘔埋，嘔完個咀仲白哂 ......

南瓜仔：「媽咪，點解我會嘔！？」(好驚既聲)

等佢休息一陣，就俾奶佢飲，點知飲到一半就唔肯飲 (但尋晚乜都無食喎！？？)，仲瞓係地下都唔肯郁，見到佢咁，當然同佢請假睇醫生！！

但不知為何，南瓜仔去到8點就好精神，仲跑來跑去，一d都唔似病，但都係帶佢睇普通家庭醫生！！

去到睇醫生，講番南瓜仔呢幾日既情況俾醫生知 .....

醫生就幫南瓜仔check，奇怪既事又發生，南瓜仔好乖自己張開口俾醫生睇佢既牙喎！？平時同佢睇醫生，佢點都要大叫幾下先俾醫生睇個口 ........

醫生：「佢牙肉發炎，應該係過濾性病毒感染！」

我：「咁佢係唔係蛀牙！」

醫生：「我唔係專科，但咁睇佢既牙無黑點，我現在開消炎藥止痛藥俾佢食，若佢再痛，就要帶佢睇牙醫！」

睇完醫生返屋企，南瓜仔：「媽咪，我地去買包俾妹妹食！」

之後去到包舖，自己就二話不說拎左2個包：「我食架！妹妹食其他包 ......」，扮哂要買俾妹妹，其實係自己想食。

返到屋企仲成個包都食哂，可能佢真係好餓！！

食左1日藥之後，南瓜仔再無講牙痛啦，好彩唔係蛀牙！！

南瓜妹@17個月

21/08/2015 (17M)

今個月最大分別係南瓜妹返學啦！！

學校係有一段適應期俾小朋友，由返1小時、2小時、3小時、食飯、午睡，之後就可以返全日，暫時南瓜妹去到留校食飯 .....

07:15  奶 (6安) + 小食
07:45  換校服 + 刷牙 + 洗面 + 換片
08:20  上校巴
08:25  到校
12:00  學校午膳
12:45  放學 (放學要自己接，要返左全日制先有校巴)
13:05  返到屋企 +補午餐
14:00  午睡
16:30  遊戲時間
18:45  晚餐 + 水果
17:35  遊戲時間
20:00  洗白白
20:15  遊戲時間
21:00  奶 (6安)
21:30  瞓

食
食哂都係一時時，一時食得勁多，一時乜都唔食，睇佢心情！

晚餐，轉左食大人飯，一來配合學校食飯，二來希望轉左會食得多d，但好似都係差不多！

大便
1 -2次。

瞓
因返學關係，要佢早點瞓！

南瓜妹想瞓就會指住房(示意要瞓)，佢唔想瞓再放佢入房，佢就會喊爆！

發展 
語言能力：
1) 講到句子：「我要睇」、「我要開」

2) 問：「你係唔係要 XX！？」
若，唔埋佢心水，南瓜妹就會講：「唔啱！」
啱佢心水就會講：「係！」 或者「啱！」

3) 我拎住包裝食物，南瓜妹會講：「開！開！開！」(南瓜妹成日話要食，但俾佢食又食得一啖，之後又唔食)

4) 最鐘意同我講：「拖住！」，之後就拖住我行！

5) 上個月跟我口水尾數數字，今個月自己數1, 2, 3

6) 食飯，只係食左兩啖，就講：「飽」(閂埋口)
hd 話：「食飯！」
南瓜妹：「飽....飽....飽....」(閂埋口)
hd 再講：「食飯！」
南瓜妹：「唔食！」(推開匙)
hd 大惡：「要食！」
南瓜妹就喊，仲一路喊，一路食 (睇到我好肉痛！><)

7) 有次南瓜妹唔小心打到我，我就同南瓜妹講：「你打到我喎！？」
南瓜妹：「sorry！」
之後就走左去第二度玩 ><

8) 會自己指住自己既眼、耳、鼻，仲會講埋「眼、耳、鼻」，唔知點解唔識講「口」！？

活動能力：
- 成功戒奶樽 (學校要佢用杯飲水)
- 好鐘意行樓梯
- 間唔中要自己拎匙食飯 (其實係玩，唔係食)

返學
老師評價：
- 理解/表達能力(比同年)高
- 坐定定
- 聽指令
- 跟住音樂跳舞 (我估係郁來郁去掛！？) 
- 間唔中會喊 
- 自己會飯 (一半啦，另一半老師餵)

公公話南瓜妹返到屋企後，會自己除鞋除襪！

但每日送上校巴仲係喊 ><

其他
-  10隻牙
-  18.9磅(8.6 KG)

↑ 17個月！！

南瓜仔@35個月

19/08/2015 (35M)

食
除左煩，無野可以講！！又係果句，睇下返左全日制會否有進步......

瞓
啱啱放暑假時，晚上唔肯瞓，有時攪左1小時都唔瞓！！

之後就減少佢午睡時間，咁佢又係用左15分鐘就瞓著 ........

發展
自理能力
- 上次講過要係呢個暑假「訓練」佢，但都無做到！>< 

說話能力
有時候，都唔知好嬲定好笑！？

1) 南瓜仔同我講要同妹妹瞓！
我：「你地一齊瞓左掛住玩！？唔可以一齊瞓！」
南瓜仔就拖住妹妹，一路行一路講：「妹妹，我地一齊瞓，唔好理媽咪！」
我聽到佢咁講 O 哂咀，都唔知邊度學！？

2) 晚上睇書，我拎了一本佢不太鐘意既書.....
南瓜仔：「是但啦，就呢本！」
是但！？佢又識！？？

3) 南瓜仔將氣球拋左上窗台，佢唔夠高拎，就爬上梳化，但都唔夠高，之後佢落地。
南瓜仔：「我數1、2、3，你好落黎！」(我忍唔住笑)
當然氣球唔會落黎......
之後佢走入房拎左張椅，搬去窗台邊，拎番個氣球落黎！

4) 南瓜仔去poo poo，南瓜仔同我講：「5分鐘就有」(亂咁用分鐘)，就數「1、2....5」，之後poo poo 就屙左出黎！

5) 我隻腳瘀左，南瓜仔：「媽咪點解你整襯！？」
我話：「媽咪唔小心囉！」
南瓜仔就掂我瘀左既地方，我就扮痛：「你唔好掂啦，好痛！」
南瓜仔：「我呵番你，唔痛架！」

返學

17/08/2015 (day 1) - 34M30D

是日返1小時，家長接送，家長不可陪同！

同佢著新校服，南瓜仔：「呢套校服唔係我！」
我：「呢套係你新校服！」(好彩好快著左)
出門口就拎書包，南瓜仔：「呢個書包唔係我！」(走番入房搵舊書包，但舊書包已經收埋左)
南瓜仔：「我既書包係黃色、紫色！」
我：「你升左班，用新書包啦！」

去到學校門口，南瓜仔：「呢度唔係我學校，我學校係呢度！」(指住舊學校方向)
我：「你升左班，呢度係你新學校呀！」

好彩最後都順利送左佢入校舍！

放學接佢時，班主任話佢無喊，有食茶點！


18/08/2015 (day 2) - 34M31D

是日返2小時，家長接送，家長不可陪同！

我想佢已經接受左新校服、新書包、新校舍，所以再無講番尋日講既說話 ......

因南瓜仔可能出牙，所以同定班主任講佢可能唔食飯，咁班主任都講了少少呢2日既事俾我知！

班主任：「小朋友可能比較細粒，所以坐緊張椅有少少吊腳，但佢都坐到！」(我都叫南瓜仔食多d飯 ><)

班主任：「上堂專心，今日上普通話同英文堂。」

19/08/2015 (day 3) - 35M

是日返全日，搭校巴！

我之前已經同南瓜仔講要係學校瞓，南瓜仔笑住講：「學校無床，傻豬！」(攪笑！)

原本呢日送佢返學都無乜感覺，但去到十二點，自己個心突然擔心起來 ........

唔知南瓜仔學校有無瞓！？(應該唔會瞓！)有無食飯！？(牙痛中，應該唔會食！)

好不容易先等到佢放學返屋企，點知係cam度就見到佢狂喊，待5分鐘後，見佢停左喊，就立刻打電話俾 hd問佢乜事！？？

hd：「原本落校巴都無野，ee 仲話佢好乖，但架校巴一走就喊，就話牙仔痛，之後一直痛到宜家！」 (心到痛埋！)

唔理智既我，都知道開學初期唔好打電話俾班主任，但南瓜仔喊成咁，真係好想知發生乜事！？？

我首先講左南瓜仔放學後屋企狂喊話牙痛先 .........

我：「 咁佢學校有無喊！？」

班主任：「咁又無， 佢好乖.........今日午餐預備份量唔多，但佢又自己食哂什菌天使麵！」

我：「吓！佢有食，平時佢屋企唔肯食什菌！？佢嚴重偏食同厭食！」(事實證明讀全日制係無錯！)

班主任：「可能學校見同學食，佢有跟住食！」

班主任：「我有問佢有無牙痛，佢又話牙唔痛........」

我：「咁佢有無瞓呀！？」

班主任：「佢有瞓！」

呢隻仔，係學校真係另一個樣！

而返全日制就要帶好多野，牙刷、牙刷杯、梳、飯衣、餐具、餐盒、乾濕毛巾、水樽 (加水)、口罩、文件套，另一星期一次帶被同枕頭，仲未計書添！！><

其他

南瓜仔已經連續2餐晚飯都無食，一食就話牙痛，現在擔心係蛀牙定出牙！？

我又唔見到佢既牙有黑，現在諗住等多2日見下佢點，再痛就要帶佢睇牙醫，但小朋友咁細，點肯去睇牙醫！？？？

親子好去處@海港城 (BMW兒童交通安全城)

18/08/2015 (34M30D)

目的地：海港城 (BMW兒童交通安全城)

南瓜仔係一個超級車迷，呢個活動啱哂佢，但當我知道有呢個活動時，已經FULL哂 ........
 
南瓜仔又好好彩喎，咁啱 TareBaby 媽有入場券去唔到 (多謝哂呀！)，又咁啱呢一日南瓜仔返半日學，而我又請了全日假陪佢！！

又有一樣又咁啱，就係我地啱啱相識既同學，佢又同南瓜仔同一時段去玩，又咁橋喎！？ 所以放學就一齊去 .......

午餐時，南瓜仔一放食物入口，就大喊，仲指住隻牙講：「好痛！」 (前幾日已經放手指入口，尋晚刷牙又喊痛，我估佢應該出大牙)，當時都唔知點算好，唯有叫杯菠蘿冰俾佢飯，等佢無咁痛，最後只係食了1粒牛丸咁大把 >< (晚餐仲一啖都無食，好彩肯飲奶)

南瓜仔仲無端端想瞓覺添，但我地仲有20分鐘就入場玩，點都唔俾佢瞓啦！！ 唯有同佢講有車車玩啦，唔好瞓 .......

我就快快去登記，再帶佢去個車場，南瓜仔一去到見到個車場，就醒哂，仲講明要坐邊架車，勁開心！

↑ 上堂，教交通安全知識，都唔知明幾多！？？


↑ 扮司機 (9秒9揀佢心愛既顏色車)，教佢地紅燈要停車、綠橙先可開車！


↑ 扮行人，教佢地紅燈要停過馬路、綠橙先可行過馬路！

最攪笑係職員問我地小朋友叫乜名，hd 好快答南瓜仔既名 ........

明明係用人地名登記，邊有我地既名喎 ><

拎埋TareBaby既證書，下次見面時俾番佢先啦！

呢2個小朋友一上車就瞓左，佢地真係太攰了！！

親子好去處@屋企(2015 暑假)

南瓜仔連續五星期(14/7/2015 - 16/8/2015)既暑期已經完結，唔知返左學會否習慣呢！？

成個暑期都去左好多地方：山頂、警隊博物館、香港玩具展、香港文化博物館、兒童探知館、望道號、海洋公園、數碼港、playhouse、荔園、香港海事博物館、啟德郵輪碼頭、挪亞方舟、稻鄉飲食文化博物館、公園及各大商場.......

朋友們話：「你地既小朋友一定好開心！」，其實唔只佢地開心，我倆公婆一樣咁開心！！

但無論外面世界又幾吸引，都不及屋企好！！

目的地：屋企

南瓜仔放暑假，留係屋企既時間就多左，hd 放埋假陪佢地兩個，而我亦好佩服hd，佢真係一個好有心機既爸爸，除左日常既餵粥、沖涼、買餸、煮飯(工人姐姐放假)外，仲會陪佢倆個一齊玩 ........

1) 畫畫，我帶過南瓜仔去學畫畫，但南瓜仔話：「唔鐘意去學畫畫，我要同爸爸畫。」

而 hd 亦對畫畫有點認識，所以就由 hd 自己教南瓜仔畫！(一邊係hd畫，另一邊係南瓜仔畫)

2) 睇書，hd 會帶南瓜仔去圖書館借書，之後係屋企同南瓜兄妹慢慢睇！

3) 游水，南瓜仔除左逢星期六學游水外，仲會係星期二、四再同佢練習。


↑ 4) 玩遊戲，hd 唔鐘意「放羊」，所以會諗活動陪南瓜兄妹玩。

5) 親子廚房，整pizza、jelly 

南瓜妹@歲半班返學了(DAY 1-8)

係臨開學前幾日，我個心開始忐忑不安，不斷諗.......

- 南瓜妹會習慣嗎！？
- 第一天返學會喊嗎！？
- 幾時可以返全日！？ (學校話要睇小朋友個別情況，最快 DAY 4 返全日)
- 點安排佢同南瓜仔返學！？

一個個問題，不斷浮現我既腦海中！！

頭3日只係返1小時，家長不可陪同，但我請了全日假！！而母親大人亦一早去左我屋企，當然係有個「儀式」，就係放蔥係書包，算了吧，老人家鐘意就俾佢做啦！！

05/08/2015 (16M15D) - DAY 1


↑ 返學：入到學校，安頓左南瓜好一陣，我靜靜雞放下南瓜妹就走左 ......

我就約左佢同班同學一齊食早餐，傾下計！！

放學：1小時後就接南瓜妹，未入房室已經聽到南瓜妹喊！！

老師評語：喊下停下，再喊下停下
 

06/08/2015 (16M16D) - DAY 2


↑ 返學：是日，公公 (之後既日子都係由公公帶南瓜妹上校巴)、hd、南瓜仔，一齊送南瓜妹返學，但一落車，南瓜妹已喊，死抱住我唔放手，不停喊住叫「媽咪、媽咪」，但我都無法，都要放低佢走人。

放學：由我接，一見到我就喊！

老師評語：喊下停下，再喊下停下，但喊少左。老師仲話南瓜妹聽得明我地講乜，問南瓜妹野，南瓜妹會點頭或扭頭示意！


07/08/2015 (16M17D) - DAY 3

返學：又係一落車就喊，又係抱住我唔放手，都係要忍心放低佢！

放學：無喊，但雙眼有淚光！

老師評語：喊下停下，再喊下停下，但話喊少左！


10/08/2015 (16M20D) - DAY 4

返學：今日開始返2小時 + 搭校車，由 hd 同公公帶南瓜妹上校巴，但係屋企，我一行開，南瓜妹就狂喊，hd 唯有抱住佢走！！

放學：由hd接，一見到hd就喊！

老師評語：落校巴時有喊，喊左一陣就無喊，但隔了1小時再喊，再停左，到見到 hd時又喊。

老師話南瓜妹未適合返3小時，要繼續返2小時！


11/08/2015 (16M21D) - DAY 5

返學： hd 同公公帶南瓜妹上校巴，但南瓜妹一見到公公就喊，要抱住我，今次我無理佢，由得佢喊，之後hd就抱住佢出問口！

上到校巴，南瓜妹仲喊到嘔 ><

放學：hd接，hd 話有到南瓜妹雙睇有眼水 ....... 

老師評語：與前一日差不多。
 

12/08/2015 (16M22D) - DAY 6


返學：都係 hd 同公公帶南瓜妹上校巴，見到公公又喊，不過出左門口無耐就停左喊！

放學：hd 接，而南瓜妹一見到佢，佢就喊！

老師評語：仲未適合返全日制。
 

13/08/2015 (16M23D) - DAY 7

早上已喊不停，都唔知佢喊乜！？hd 話佢出牙，所以咁扭計！？

返學：都係由hd同公公帶上校巴，hd 話南瓜妹喊下停下喎！

放學：公公接，公公話南瓜妹見到佢無喊！

老師評語：教南瓜妹用杯飲水、係學校都係喊下停下，等南瓜妹慢慢習慣。


14/08/2015 (16M24D) - DAY 8

返學：由我、hd、南瓜仔、公公一齊送南瓜妹上校巴。

我一直都無送南瓜妹上校巴，係因為南瓜妹一見到我就要我抱，而黎緊既日子，我要送南瓜仔上校巴(不同上校巴地點！)，不能分身，而 hd 係一個唔會同其他家長傾計既人，而我係一個好多野想知既人，求人不如求己，我自己走去問好過 ......

我就去問下家長：(1) 上校巴後，5分鐘左右就到學校，good。 (2) 校巴唔會等人，亦唔會打電話俾家長。

講返南瓜妹，一上校巴就喊，但好彩係校巴未開車前，佢已經停左喊！

放學：由公公接，無喊！ 

老師評語：今日乜都無講！
_____________________________________________________________________

唉，見到佢日日喊，自己個心都有點不開心 ......

我有問南瓜妹：「鐘唔鐘意返學！？」

南瓜妹：「鐘意！」(我唔只問過一次，問左幾次，佢既答案都係一樣，咁點解佢又喊呢！？)

唯有等佢慢慢習慣啦！！

題外話：

我對住南瓜妹講：「妹妹，返學唔駛喊，有好多同學同你玩！」
南瓜仔：「妹妹返學喊！？」
我：「係呀！」
南瓜仔：「咁老師有無抱住佢呀！？」
我：「有呀，有老師抱住佢！」
南瓜仔：「哦！」
我：「咁你返學有無喊！？」 (南瓜仔返學同搭校巴無喊過)
南瓜仔：「無喊過！」
我：「咁你點解唔喊！？」
南瓜仔：「因為我係 super xxx (英文名)！」

笑死我！！

親子好去處@寶康公園

12/08/2015 (34M24D) + (16M22D)

目的地：寶康公園

寶康公園係全港大型兒童遊樂場之一，分別有8套兒童遊樂場，適合唔同年紀小朋友玩！！

是日，我同 hd 帶左南瓜兄妹，挑戰左5套兒童遊樂場，呢兩個小朋友當然玩得好開心啦！！

↑ 兩兄妹都好鐘意玩鞦韆！！

有時候，佢地兩個又幾好感情，例如：

1) 南瓜妹玩緊平行既設施 (hd 扶緊佢)，南瓜仔一見到，就飛奔過去，仲一路跑一路講：「妹妹，我黎扶你！你小心d呀！」

2) 南瓜妹玩緊鞦韆，我同南瓜仔行左另一個兒童遊樂場，hd 話妹妹不停叫住：「哥哥！哥哥！」

3) 南瓜仔即使玩緊，都會跑去望一望妹妹，亦會講：「妹妹呢度玩！」
 

地址：將軍澳運隆路10號 

設施：七人硬地足球兼手球場、籃球兼排球場、門球場、滾軸溜冰場、八套兒童遊樂設施、緩跑徑、兩套長者健體設備

親子好去處@Party Duck + 稻鄉飲食文化博物館

09/08/2015 (34M21D) + (16M19D)

目的地：Party Duck

又約南瓜仔既同學(11個)出黎玩啦，今次仲有埋南瓜仔既 best friend (M 同學)添 .......

所以南瓜仔好期待，有時佢唔肯食飯，我就話：「咁我打俾 M 媽咪，話你唔去！」，之後我就拎起電話 .......

南瓜仔：「唔好呀！我食飯啦！」，之後仲拎走我電話，講：「我收埋你電話先！」，都唔知佢邊度學！？

由於hd早上有野做，所以我地遲左1小時先到！！


↑ 大型吹氣滑梯、波波池、馬仔、小型桌等

南瓜仔 warm up 左一陣，就投入同佢既同學玩，而南瓜妹就「樹熊上身」抱住我唔肯放手，但南瓜妹見到哥哥係波波池玩得好開心，又話要玩，但又死拉住我唔放手.......

好不容易先可以放低妹妹自己玩，我就可以同d媽媽傾下計！！

Playhouse 既好處係全部人都識得，而且年紀相若，所以我自己就好放心俾南瓜仔自己一個玩！！

地點：火炭坳背灣街2-12號  威力工業中心5樓 V室
費用：$2000 (20人以下，包20包飲品)

玩完哂，我地就諗住返屋企，但南瓜仔唔捨得 M 同學，喊住話要同佢一齊，而 M 既家長都好樂意同我地一齊食 tea，就諗住去附近既稻香飲茶，順便睇埋佢地既博物館！


目的地：稻鄉飲食文化博物館

不過去到先知係會員先可以飲茶 ><，所以我地只係去左博物館睇 .......

↑  滿漢全席、雞蛋仔、牛雜、大排檔等

呢個館都不錯，可以睇到「食」既文化，但可惜呢3個小朋友以為係遊樂場，四周圍走，都唔係睇 ><

地址：火炭坳背灣街13號1樓
入場費：免費  


因 M同學都係住同一區，所以我地就決定返去我地住既區食 tea！！

食完就行左一陣街，之後就要同 M 同學講 BYE BYE 啦！！

親子好去處@挪亞方舟

08/08/2015 (34M20D) + (16M28D)

目的地：挪亞方舟

是日主題係慶祝母親大人生日，一行16人(11大人5小朋友)！！

去馬灣一定要搭佢地既專車，所以我地就係青衣集合，再轉巴士入去。

由於天氣好熱，我地就係室內玩先！

↑ 方舟博物館，南瓜仔對d動物好有興趣，而南瓜妹一放低佢就喊，全程都要我抱！


↑ 彈床，呢班小朋友一見到就話要玩 ($10@10分鐘)，但玩唔夠10分鐘就話唔玩 @.@

公園，玩得勁開心，幾個小朋友追來追去，但若只玩公園，我地就唔駛去咁遠啦，所以我忍唔住叫佢地走！！ (好彩係天橋底，所以唔曬，但佢地都變左「濕水雞仔」！！)

- DIY 襟章 (消防車、警車)，南瓜仔當然可以做到大部份，但南瓜妹全程係破壞多囉！
(後記：是日南瓜仔瞓瞓下彈左起身，問我：「妹妹警車呢！？」我話：「妹妹無警車！」南瓜仔：「唔係喎，妹妹係警車，我係消防車」，哦，原來佢講緊襟章.......)




↑  暑假特工大聯萌：智勇消防體驗營 
我個人覺得幾好玩，又有教育意義，我相信南瓜仔/妹再大少少更適合 .....

1) 著消防衫
2) (假)消防員用活動教育方式教防火
3) 扮入火場，然後救屋企人
4) 扮救火


↑ 方舟花園，黃昏時分，無咁熱，所以出去影下相，睇下假動物！

係呢個時候，南瓜妹就瞓左.......

↑ 繽紛廊，海鮮燒烤目助晚餐
由於南瓜妹瞓左，我抱住佢睇，所以 hd 就好忙，要拎南瓜仔食物，又要幫我拎食物，仲要睇埋南瓜仔食野......

但我就係「零」胃口，待南瓜妹醒左先可鬆一鬆，但又要餵佢食野，結果我係無乜食野！！

食完晚飯，就要搭巴士出返去青衣。

地址：馬灣珀欣路33號
入場費： $168 (成人)，小童及長者 ($138)，3歲以下免費
自助餐：$3xx 

親子好去處@amp + 太古城

07/08/2015 (34M19D) + (16M27D)

經過前2日既「活動」，我已經得半條人命，原本諗住留係屋企，但南瓜仔唔肯午睡，南瓜妹又醒左，hd 話不如去商場行下，我心諗，行商場應該唔太辛苦......

南瓜仔上車無耐就瞓哂，我仲以為佢唔會瞓添，平時南瓜仔一落車就即醒，但今次落車後仲瞓緊，可能佢真係好累！

目的地：apm

咁我地就行一田，行行下南瓜仔就醒左，咁就去食下野先 ........

↑ 去 Kumamoto Cafe 食下午茶，估唔到呢2個小朋友食唔停，可能太吸引佢地啦！

食完野就影下相，影完相就去太古城 ~~~~


目的地：太古城 (諴品)

去到太古，就輪到南瓜妹瞓，所以我就抱埋一邊等南瓜妹瞓得好一點！


↑ hd 原本諗住去睇書，但南瓜仔見到個滑梯就只掛住玩，完全無睇書，都慘hd要睇住佢，hd 無書睇！哈！哈！

原本諗住行商場無咁累，但南瓜妹全程都要我抱，唉，咁我未仲辛苦 ........><

親子好去處@將軍澳游泳池

06/08/2015 (34M18D) +(16M16D)

目的地：將軍澳游泳池

上次去過西貢游泳池，今次就試下去將軍澳游泳池玩 .....

一入到更衣室，嘩！好大尿味！！

所以就快快幫南瓜妹換衫，快快出返去 .......

hd 就係出門等我地！！


↑ 嬉水池 (上網搵既相)，南瓜仔、南瓜妹玩得好開心，特別係玩滑梯，佢兩個滑左都唔知幾多次，而我只係剩下半條人命......

原本南瓜仔唔敢自己滑，要我抱住，但我抱住南瓜妹喎，唯有用勁多口水，終於肯自己滑，yeah！！

玩左一大輪，hd要南瓜仔游水，可能嬉水池既魔力太大，南瓜仔唔肯游 ~~~~~

玩玩下就玩左1.5小時，玩完又要入返去臭臭既更衣室！！><

將軍澳游泳池比西貢游泳池更好玩更大，人流都唔算多，但更衣室真係好唔掂，我令願去西貢游泳池囉！

親子好去處@荔園 2015 Super Summer 2015 + 海事博物館

05/08/2015 (34M17D) + (16M15D)

是日南瓜妹開始返學，但只係返1小時，所以放完學就帶佢地去玩！！

目的地：荔園 2015 Super Summer 2015

除左用熱爆之外，我諗唔到有乜形容詞 .......

唔駛入場費，平日入場大人有玩機動遊戲半價優惠！！

南瓜仔話想玩恐龍屋(滑梯)，但職員話3歲以上，hd又話危險，所以無得玩！！

唯有玩跳彈床(唯一有冷氣既地方)，原本只係諗住只係俾南瓜仔玩，但見唔多人玩，就俾埋南瓜妹玩得啦！！ ($40，5分鐘)


玩埋船，但未夠1.1米就要成人陪，咁就要俾3個人錢 ($20@1人)，但幾貴，轉得幾個圈，不過一場黎到，咁就玩埋啦！！

是日人流不多，好多都唔駛點排隊，但天氣真的太熱，所以都係快快走人！！

地址：中環海濱


目的地：香港海事博物館

呢度上幾次都想去，但次次都係去唔成，今日可以去埋.......

佢地有1個展廳係免費入場，另15個展廳係要入場費 ($15)，一米以下免費！

我地就揀左俾錢入去睇！！

↑ 南瓜仔對睇船都 ok (車係最鐘意)，所以佢都無亂咁走，都有睇下！！

地址： 中環8號碼頭



↑ 睇完就差不多1點，就去海運食飯，但點知佢兩個未去到就瞓著左，好彩餐廳職員安排左梳化位俾我地，我地四個先可以瞓/坐得舒舒服服！！



↑ Al Molo，半自助餐，一直都想試，但次次都係某些原因去唔到，今次又順利去埋！！

hd 大讚佢地既食物！！而我就累到九彩，食龍肉都無味 ........

親子好去處@啟德郵輪碼頭公園

02/08/2015 (34M14D) + (16M12D)

目的地：啟德郵輪碼頭公園

又可以同一大班小朋友玩啦！！

約左一大班 bloggers 去玩，有燒腩仔、龍bb、一仔、肚b、小寶、anki、小b、Little K、寶品、包包、妹豬、妹豬妹、巨龍、TareBaby，仲有南瓜仔、南瓜妹啦。

上次去寨城公園迷左路，今次去都係迷左路，不過今次有小寶同龍bb一齊！哈！哈！

去到已經有幾個 bloggers 到左，我地就係空地玩左一陣，等多 d bloggers 到左我地就去今日既主題  - 「噴泉廣場」！！

↑ 南瓜妹比南瓜仔大膽，南瓜妹好快走左入去玩，但南瓜仔要隔左一陣先肯入去玩！！

最初佢兩個都要拖住我行，玩玩下佢地就自己投入左！！

由於南瓜妹仲細，我都唔夠膽俾佢玩咁耐，加上南瓜妹都話「唔玩」，咁就幫佢換衫，點知南瓜仔見南瓜妹換衫，又話唔玩喎！！

咁就俾佢地休息一下！！

之後佢地就玩下氣球，d氣球好吸引(特別多謝肚b媽預備咁多大大既氣球)，引到d 小朋友四周圍追！！

當然唔少得有合照啦，呢張合照出其合作，大家都知道影1個小朋友都難，更可況十多個小朋友！！(可惜無左妹豬姐妹 ><)

玩完就同肚b媽、小b媽，龍bb一家，一齊食晚飯，之後就回家了！

地址：九龍承豐道33號
網址：http://www.lcsd.gov.hk/parks/ktctp/b5/index.php

親好好去處@Sun mama's Garden

01/08/2015 (34M13D) + (16M11D)

目的地：Sun mama's Garden

呢個假期，好多時都係帶佢2個出去玩，但我個人比較鐘意南瓜兄妹同一大班小朋友玩，一來可以俾佢地學習與別人相處，二來自己可以同其他家長傾下計！！(但hd覺得我好無聊，不過我係唔會理佢！哈！)

約左南瓜仔同學一齊玩，由於要安排南瓜兄妹午睡，所以遲左1小時先到 ><

因為我地人數不多(9位小朋友)，所以book左細房，雖然唔係好大地方玩，但勝左容易控制場面！！

↑ 南瓜仔一去到只玩車，無理其他同學仔，玩玩下就開始投入，一投入都玩到"癲"左！！


↑ 南瓜妹比哥哥大膽，一去到就玩波波池，一抱佢出黎就喊住要入番去！！

去到最後要拖住J同學一齊行！！

我問南瓜仔：「鐘意去海洋公園定係playhouse玩！？」(我無諗過佢會咁答)

南瓜仔：「我鐘意去playhouse玩！」

其實小朋友鐘意同小朋友玩多過去海洋公園喎！(老公，你明白嗎！？)

地點：觀塘鴻圖道45號宏光工業大廈7字樓E-F室
電話：3998 4634 
費用：$78@1位 (3歲以下免費) - 3小時，包飲品

親子好去處@數碼港 (Wise Kids Toys Road Show 2015 + 數碼港海濱公園)

31/07/2015 (34M12D) + (16M10D)

目的地：數碼港 (Wise Kids Toys Road Show 2015) -  31/7 - 02/08/2015


去到，我地揀左 El Charro Mexican Cantina 食午餐，hd 話要食墨西哥菜喎，南瓜仔完全無興趣食，仲不停咁問：「有無白飯！？」平時又唔見佢話要食白飯喎 ><

食完飯就入場玩，以45分鐘為一節，入到去就任玩，入場費 $30 (大小同價)！！

我就睇住南瓜妹，hd 就睇住南瓜仔 .......


↑ 車迷就係車迷，玩車玩到唔想走！！

↑ 好不容易先可以叫南瓜仔玩其他野，但都係同"車"有關 ><


↑ 南瓜妹就四圍玩！！

最後係一大班小朋友一齊唱歌、玩遊戲，我又估唔到南瓜兄妹玩得咁興奮喎！！

玩完就去食麥當奴(因為之前南瓜仔無乜食野)......

↑ 最後去埋數碼港海濱公園，環境真的一流，但周圍都寫住「小心有蛇」，咁又點放心俾小朋友玩呢！？？