親子好去處@【2017 聖誕】同學生日會 + 6299 聖誕派對

24/12/2017 (5Y3M5D + 3Y9M3D)

又係南瓜仔同學生日會，一年去左 n 個！哈！哈！

呢個生日會足足玩左4小時，只係有一個大型波波池，已經滿足一大班小朋友，真係超級放電！哈！哈！

 ↑連南瓜妹都玩得好開心！


玩完再去6299 家，仲有堂哥/姐、表姐(妹)，6個小朋友一齊玩，咩都玩一餐！哈！哈！

雖然佢地不是同年，最大已是小三，最細就係南瓜妹，但佢地一齊玩得好開心！！

不過最開心唔係班小朋友，係 6299 ..........


↑ 晚餐

我地今日再無每人買禮物一份禮物，變左一個小朋友買一份 (我絕對同意，小朋友太多禮物係唔會珍惜，但又想「應下節」)，之後就抽獎 ........

可惜，南瓜仔抽中一份「女仔禮物」，抽中後 ........ 眼中有淚水，我地都明白抽獎未必一定抽中心水，不過都要俾佢知道無野一定係「如意」，等佢自己慢慢接受一下！

而南瓜妹就抽中 frozen，佢當然好開心啦！！

抽完獎都十點了，所以就快快回家！！

親子好去處@【2017 聖誕】文化博物館 + 新城巿廣場

22/12/2017 (5Y3M3D + 3Y1D)

是日，我同 hd 都放早 (做冬)，所以就帶佢地出街玩！！

一早就想去睇 Sadness，南瓜妹至愛...........(我地估呢日唔會有咁多人)

南瓜妹一見到，就雙眼發光 (其實我唔明點解會鐘意！？)

↑ 去睇左「彼思動畫30年」，順道睇埋「國際海報展」！

再去埋新城巿廣場睇「粉紅夢樂園」，呢度又真係幾靚，仲有4個搖搖板俾小朋友玩，南瓜兄妹玩都唔捨得走添！！

之後就回家食晚飯啦！！

1220 結婚8周年

20/12/2017 (5Y3M1D) + (3Y8M30D)

不經不覺又一年了！！


↑ 多謝老公既花！！

1) 南瓜妹 - 學校聖誕派對 (不是親子，只係送係學校門口)

係我第一次送南瓜妹返學 (因學校提早要回校，校巴又未能配合)

一去到學校門口，南瓜妹就同佢既同學仔手拖手，就知道佢地係好朋友，希望佢地友情長存！！

亦慶幸遇上好班主任，因為南瓜妹有「恐懼聖誕老人症」(上年，pn 時見到聖誕老人後，當時只係等南瓜妹慢慢「淡化」，但事實上，係南瓜妹深處仲係恐懼)

所以我係三日前已同班主任講，但有經驗既班主任，叫我地不是「淡化」聖誕老人，而係令南瓜妹不再害怕，當然我地做家長要配合 .........

結果，南瓜妹不再害怕聖誕老人，感恩遇上一位有經驗既老師！

因，要送南瓜妹返學，當我送佢南瓜妹入門口後，我就立刻「飛」回公司，估唔到 ........ 我無遲到喎，做了阿媽，真係乜都做到！哈！哈！


2) 聖堂 - 聖誕派對

沒有特別慶祝，啱啱遇上聖堂攪既聖誕派對，所以就黎參加，對於我地來說，只要大家一齊，就已足夠，去邊度慶祝都是一樣的！！

 ↑ hd 就整左煙三文魚法包 ........ (好彩唔駛我整！哈！)

我地食完野，就係小朋友玩遊戲，仲有神父同小朋友一齊唱歌，估唔到 ....... 南瓜兄妹咁鐘意神父唱歌，仲做了小 fans 添！哈！哈！

南瓜仔@2017 Winter Show

16/12/2017 (5Y2M28D)

又黎到一年一度既表演啦 .........

↑ 見到南瓜仔表演，又知道佢又大個仔左，跳得一次比一次好，最重要係全程都係帶住「笑容」！！

又或者南瓜仔太細粒，咁多次表演都係排前排，今次仲係中間位添！哈！哈！

不過，我就無感動既感覺 (點解啲人會感動到喊呢！？)，表演咋 ....... 而且學校有練習，又唔係第一次係台上，做到都係「正常」(sorry，係太冷血！哈！哈！)


每班表演完，就全級一齊表演唱歌，又好幸運地 ........ 南瓜仔又係企係前面 (前面又另一班小朋友，但佢地係坐低)。

表演就係係場地同其他朋友玩一陣才離開！！

南瓜妹@2017 溫馨家庭聖誕樂

原本 hd 自己簽通告話幫學校做表演，點知 ....... 原來當天佢要返工，結果就由我負責 =.="

但問題就黎，因我要去做義工(表演跳舞！哈！哈！)，咁邊個睇住南瓜兄妹呢！？唯有叫 e ma 黎幫手！！


10/12/2017 (5Y2M22D + 3Y8M20D)

晨咁早就要起床！！

我係負責 9:00 - 10:15，我係要表演俾 k2 小朋友睇，但當我表演完後，我覺得好特別、好開心，仲幾好玩添！有機會的話 ...... 下年再參加！！

所以呢段(9:00 - 10:15)時間就由 e ma 睇住南瓜兄妹！！(好彩，南瓜兄妹都叫聽話小朋友)

我表演完就去接回南瓜兄妹！！

↑ 今次係由 k3 家長表演俾 k1小朋友睇 ........

睇完表演就去玩攤位遊戲，仲有抽獎添！(南瓜仔無得抽獎，有點失落)

之後就去食午餐！！(多謝 e ma 幫忙嘛)

帶住2個小朋友出街唔難，不過我都要快快回家，因為已過了午睡時間...........而且我真的好攰，因為我跳了兩場舞！哈！哈！


晚上，仲去埋表妹既生日會，好彩我午睡左2小時！哈！哈！

2017 My Birthday

03/12/2017 (5Y2M14D + 3Y8M12D)

都係提早慶祝 (有了小朋友，你地會明 .......)

hd 揀左 Mr. Steak Buffet a la minute！！

今次約埋婆婆、公公一齊去，順便多謝佢地一路以來幫手照顧南瓜兄妹！

 ↑ 呢間食物質素真的不錯，而且價錢又合理，可以搵佢做「飯堂」！哈！哈！

↑ 呢間「最特色」係可以自己諗寫乜事，之後交俾職員，職員就會幫你寫上，再加埋心太軟！！


07/12/2017 (5Y2M18D + 3Y8M16D)

正日啦！！

都係留在家食蛋糕就算 ........

都一把年紀，最開心都係一家人齊齊整整！！



↑ 當然唔少得既生日蛋糕同生日咭啦！！

明明係我生日，支蠟燭都唔係由我吹！哈！哈！

有了小朋友，生日願望都係只有一個，希望呢個願望年年都達成！！

南瓜兄妹@2017/2018 流感針(四價流感疫苗)

26/11/2017 (5Y2M8D + 3M8M6D)

流感針，年年都打 ......... 始終「預防勝於治療」

今年係樓下會所打，南瓜兄妹都係免費！！

而我，我都有打，hd 就話唔打，佢唔打我都無理佢啦........

一早已同南瓜兄妹講要打針，佢兩個都話唔打，我地當然同佢講左「打針」既重要性，不過我有我講，佢地有佢地唔想打！！


打針當天，由我打先，希望佢地知道打針唔係好痛既事，我已經話唔痛，但到南瓜妹時，南瓜妹喊到唔停 ........... 打完幾分鐘仲係喊！=.=

南瓜仔呢！？都係喊，仲話好痛、好痛、好痛 (心諗，有幾痛呀！？=.=)

打完針，就出發同南瓜仔前班主任影碩士畢業相！！

親子好去處@親子旅行(曹公潭戶外康樂中心)

南瓜仔，K3 旅行啦！！！


22/11/2017 (5Y2M3D)

目的地：曹公潭戶外康樂中心

今年，最特別係 hd 一齊去，真係可一不可再！！

當天，南瓜仔早上突然微燒 (37.6)，呢一刻，帶唔帶佢去旅行呢！？

最後，決定照去。

因為呢一日南瓜仔等左好耐，亦係最後一年親子旅行(仲要咁啱hd 放假)，而且我同 hd 都在旁，萬一有無唔舒服，我地都可以立刻帶佢回家！！ (最後，再無發燒，點解會咁呢！？)

↑  呢個場地都幾好玩，有單車場、攀石場、遊樂場、遊戲室等等

對於小朋友來說，去邊度旅行並不重要，最重要係有班同學仔， 有佢地玩乜都好開心！！


回程時(14:30)，南瓜仔已熟睡了！！

2017 HD's Birthday

29/10/2017 (5Y1M9D) + (3Y7M7D)

都係提早慶祝！！

呢個懶媽咪，是是但但係屋企樓下揀間食「放題」.........

↑ 食物質素不過不失！

不過有小朋友陪住佢，佢個心都係甜！哈！



29/10/2017 (5Y1M11D) + (3Y7M9D)

正日生日，老公已經不用我陪，佢搵左佢「小情人」同佢一齊去海洋公園！=.=

不過，我地係唔會俾小朋友無端端就請假，所以都係等南瓜妹放學後才去！！

接完南瓜妹放學，佢地就法海洋公園........

我千叮萬囑叫佢地唔好咁遲回家，最後係點！？我估大家都估到 ........... 不過算啦，佢生日，就算！！

等埋佢地回家，我地先一齊食晚飯！


↑ 生日蛋糕是不可少！(呢個蛋糖係妹妹揀，hd 仲好驚係 「poo poo 蛋糕」！哈！)，當然仲有生日咭啦！

親子好去處@2017 慈善行

29/10/2017 (5Y1M10D) + (3Y7M8D)

因某些原因， hd 同妹妹就無去慈善行 .........

2017年，終於第一次同南瓜仔行上山啦！！！

足足行左 2.5 小時，南瓜仔全程無停過，亦無扭過計 (真係大個仔了)

沿途，有南瓜仔最想見既野  -- 馬騮！！

佢又要睇、但又驚！！

所以我死拖位佢，我自己都怕有危險...........

回程時，南瓜仔話要食雪條，我就話：「你唔怕馬騮搶咩！？」

南瓜仔：「唔驚！」(我估計馬騮無咁快會出黎，所以照俾佢)

行行下(食剩少許)，馬騮出現啦，南瓜仔立刻收埋佢支雪條，快快腳走.........

但馬騮就越來越多，南瓜仔用左唔夠3秒，食埋餘下既雪條，仲將支雪條棒拋左地上 (因友人叫佢拋，佢話拎住好危險)，估唔到 ...... 啲馬騮去搶「垃圾」！！

不過，係我唔啱，我應該叫南瓜仔食完先行，萬一馬騮黎搶，真係好危險！

行完啦！！


最後，係我超攰，所以打的回家！！

南瓜仔@2017 角色日

又黎一年一度既「角色日」！！

最後一年啦，南瓜仔當然揀自己鐘意既「公仔」-- Gekko 啦 ~~~~~


27/10/2017 (5Y1M5D)

一上校巴，車上既小朋友已經好開心，個個都睇下係乜造型！！

南瓜仔一聽到叫：「Gekko」，佢個樣笑得不知幾開心！！

小朋友，就係咁簡單......

↑ PJ mask - Gekko

呢件衫，係 hd 淘寶買，但買完回來 ........ 發現係去唔到 vee vee，咁點算呢！？？？

hd 就係去 vee vee 住加左條拉鏈俾南瓜仔 (都話 hd 無敵，我話拎出去整，佢話自己整就得！)

南瓜仔@高度跟進(5) - 醫院

10/10/2017 (60M22D)

今次唯一唔同係由 hd 帶佢去，早上南瓜仔照返學，睇完醫生再回校 (都唔知點解今次唔駛點等，30分鐘完成哂)！

去到醫院都就係度高/磅重 .........

度高：99.5cm (6個月 + 4cm)
體重：15.15kg

11/04/2017 (55M22D)：95.5cm (6個月 +3.3cm)
11/10/2016 (48M23D)：92.2cm (4個月 + 3.1cm )
06/06/2016 (44M17D)：89.1cm (3個月 + 1.3cm )
15/03/2016 (41M25D)：87.8cm (0.5個月+ 0.9cm)
23/02/2016 (41M04D)：86.9cm

見醫生啦........

今次高多左，而且只差 0.5cm 就到 3% 生長線，我真係好開心呀！！

只要南瓜仔繼續 keep 住做運動同食多啲野，佢應該好快掂到生長線 ~~~~ yeah！

媽咪唔駛你好高，只要「正常」就得，不過最想係你身體健康，無野比健康更重要！

呢半年，你只係發過一次燒，就無病過，希望你 keep 住個健康既身體！！

南瓜妹@K1 開學

01/09/2017 - 30/9/2017 （29M11D - 30M11D)

南瓜妹升K1啦！！(已經講第三間學校，希望呢間可以讀到中學啦)

開學第 1-2 日由家長陪同 ......

第一日 (01/09/2017)
見到校舍就好鐘意，我都係鐘意有戶外既學校 ........ 送左南瓜妹上課室，睇到佢坐邊個位，之後同其他家長去食早餐，然後回校聽講座，再接南瓜妹返學。

第二日 (04/09/2017)
打風........ 不用返學！！

第三日 (05/09/2017)
開始搭校巴！！

我就帶南瓜妹上校巴，之前因為係屋企附近返學，係由公公帶 ....... 現在我可以朝朝送佢上校巴啦，再由 hd 帶南瓜仔落黎，送埋哥哥返學先返工，而且我仲可以接埋南瓜妹放學添！yeah ........


不經不覺，南瓜妹已返了一個月學，校園生活一早就適應，唯一唔適應係要搭長途校巴 ......

去到開學兩星期後，校巴 ee 話南瓜妹係校巴喊 (已經成個星期，不過就係喊下停下)，話好掛住媽咪，咁我咪同佢傾下，點知第二朝仲衰，未上校巴已喊，校巴ee話佢喊足全程，最擔心係影響其他係車既小朋友 (但返到學校又無事)

到第三朝，南瓜妹又係未上校巴又喊，咁都要佢上車架！？無理由自己送佢返學？送得一次，咁以後點！？我就好灰咁問校巴ee，仲問佢喊左幾耐！？校巴ee：「佢無喊，我安排左個大姐姐同佢坐，佢不知幾開心！」

原來車上既大姐姐無唔鐘意南瓜妹 (日日咁喊，我仲以為啲人會唔鐘意佢)，而且仲好細心、開解南瓜妹，結果全程都好開心搭校巴.........

呢一刻，我就覺得我無揀錯學校，學術係重要，但小朋友既德育(愛心)更重要，南瓜妹仲講啲大姐姐好錫佢！！


而校園生活點！？老師只係打過一次電話俾我，只係話佢有些鼻水，叫我多加注意 ....... 既然老師打俾我，我當然問下佢情況 .....當然係「無問題」啦，否則老師一早就打左俾我！哈！哈！
 

而我都有問佢鐘唔鐘意新學校，南瓜妹：「鐘意」，只希望南瓜妹讀書開開心心，又係好老土一句「無最好學校、只有最適合學校」！！

南瓜仔@60個月 + 生日會

19/09/2017 (60M)

時間真係過得好快，南瓜仔5歲啦！！

升左 k3，變左大哥哥，生活上沒有太大分別。

↑ 都係同我屋企人攪小型生日會 (我唔太鐘意攪大型生日會)，簡簡單單就算係樓下會所攪！ (呢個媽咪真係好鬼懶！哈！哈！)


↑ 正日，就係屋企食生日蛋糕！


媽咪祝你「身體健康」、「快高長大」、「開開心心」 ，亦希望你入到一間適合你既小學！！

親子好去處@【2017 暑假】大樹先生

10/08/2017 (4Y10M22D + 3Y4M10D)

好多人已經「朝聖」左，都知道佢地收費貴、食物質素麻麻，但 hd 又 book 到 ........

唔...... 個波波池比我相像中細，不過對南瓜兄妹來說已經好好玩！！

兩個小朋友就好快投入波波池中 ........

玩玩下，南瓜妹就走出去玩「煮飯仔」，而南瓜仔當然係玩「車」啦！！

又偷入去「 0-24個月 遊戲區」，hd 話有職員叫走左1個三歲既小朋友  ....... 但無人叫走南瓜兄妹，可能佢地都係似 24個月以下 =="

對於「沙池」，佢地都無乜興趣，都玩唔夠 3分鐘就話唔玩！！

食午餐啦，有最低消費，而且佢地既食物都唔平，所以只係食2 個主餐都要 $400 ><

食完，兩位小朋友又去玩過。

去完呢一次，應該無下一次，不太值！哈！哈！

費用：$5xx (除左大人有最低消費外，仲要俾小朋友清潔費)

而我，又要返下午工 ......... 不過咁放法，就可以同南瓜兄妹玩多啲，所以我覺得呢個放假安排都不錯！哈！哈！

親子好去處@【2017 暑假】Ryze Hong Kong

09/08/2017 (4Y10M21D + 3Y4M19D)

我又係請半天假陪佢地玩！ yeah ~~~~~

兩個小朋友又係好期待.........

未入去，佢地已雙眼發光 ( hd 正左登記緊，話乜「生死狀」喎)！！

好彩佢地唔係太活躍，所以都安全既！！

妹妹，就好細膽，所以唔係好敢跳落海棉度！

哥哥，就越玩越大膽，所以時時刻刻都要睇實佢，始終都有危險性！

我個人覺得啲海棉好 dirty，所以都唔係好想小朋友玩 .........

玩完就去親子餐廳食野！！




↑ Butcher & Baker HK，有個小朋友免費任食甜品區(爆谷、軟雪糕、糖)，而且仲有個小型遊樂區添！！

食完午餐，我就要返工啦，而南瓜兄妹就回家午睡！

親子好去處@【2017 暑假】生日會 + 海港城

07/08/2017 (4Y10M16D + 3Y4M17D)

等了又等，終於到呢日啦！！

第一場

慶祝婆婆生日，南瓜兄妹整左條手鏈俾婆婆，佢地開頭好投入去做，但整整下就放棄，唯有我同hd整埋落去........

去左 Hyatt Regency Hong Kong 食午餐自助餐，南瓜兄妹最期待就係可以食糖，無錯，係食糖 =.="

揀呢間係六歲以下免費，啱哂我地家族有咁多小朋友！哈！哈！

隨著南瓜兄妹大個左，我同 hd 都可以輕鬆左，起碼都有足夠時間去拎食物，不過南瓜兄妹就不停要去拎食物囉 (都叫佢地拎多少少 ><)

食物質素麻麻，不過價錢都合理，都算值得既！


第二場

南瓜仔同學生日會，南瓜兄妹不知玩得幾開心，又估唔到連南瓜妹都好投入！

不過，正當我同妹妹去完洗手間回來，南瓜仔已抱住 hd，原來佢跌親 .......... 塊面瘀左！！

而南瓜仔仲話最開心係今日，因為可以同同學仔玩！！


第三場


↑ 海港城睇泡泡，話有成千萬既泡泡喎，無小朋友唔鐘意. ........

不過佢地已經玩左大半日，其實都無乜電，加上天氣真的好熱，好彩泡泡都吸引，所以都可以睇完先走人！！


一上車，兩個小朋友斷哂電！

親子好去處@【2017 暑假】J PLUS

02/08/2017 (4Y10M14D + 3Y4M12D)

係 J Plus (冒險樂園) 攪既 Misulo，呢個活動係約左南瓜妹既同學一齊去玩，點知活動前一天，南瓜妹發燒，所以就去唔到 ......

原本諗住俾左既試堂費會無左，點知佢地又俾補堂喎！？太好了 ........

慳住大假既我，就book 左 17:00，hd 就帶佢地去，我就放工飛奔過去！


頭活動30分鐘，只有南瓜兄妹玩(得佢兩個試堂)，大人就要出面等 .......

當我地入去時，南瓜兄妹既面已變成「花面貓」！！！

玩完，我地就出去玩下機動遊戲，一玩，就玩左2小時 ~~~~~~

親子好去處@【2017 暑假】智樂萬象館

02/08/2017 (4Y10M14D + 3Y4M12D)

由於我既大假唔太夠，但有想同小朋友去玩，所以我就請了上半天假 (因南瓜兄妹要午睡，所以佢地瞓緊時，我就返工，慳得就慳)

目的地： 智樂萬象館

南瓜仔一見到繩網就帶埋妹妹衝左上去玩，點知南瓜妹一上到去就喊，最後就由我抱住佢。

南瓜妹就去玩其他野，扮煮野食。

而南瓜仔繼續挑戰個繩網 ..........

過左不久，南瓜仔又叫妹妹玩繩網，妹妹又跟住佢，上到去，南瓜妹又喊過，南瓜仔：「唔駛驚，我拖住你，好好玩！」，就係咁，妹妹就愛上左玩，一玩就唔停！！(有個哥哥真係好！)

佢地玩左 n 咁多次，由跟住佢地玩，到我坐係地上睇住佢地玩！！(都幾爽！哈！)

玩左一輪，再玩其他野 ........ 如畫畫係牆上等！

由於我要返工，所以玩到 11點半左右就要走人！！

費用：$80 (一大一小，平日)

親子好去處@【2017 暑假】佐治五世公園 + 西寶城

【2017暑假】爸爸單拖系列：一

27/07/2017 (4Y10M8D + 3Y4M6D)

hd 自細玩到大，當然公園變化也很大，一場黎到公園，當然係要玩啦！！


山長水遠帶小朋友黎呢度，就係去西寶城睇《Paw Patrol》(南瓜仔俾同學"傳染)，但去到時原來係唔放開，要假日先開放 ><

hd 係一個好堅既人，一個男人帶住兩個小朋友，加埋2個小朋友「渴望既眼神」，我相信不得不溶化職員，職員最後俾小朋友係入面影下幾張相，真係多謝呢位職員，否則小朋友一定好失望！！

親子好去處@【2017 暑假】書展

24/07/2017 (4Y10M5D + 3Y4M3D)

一年一度既書展又黎啦！！

前幾年，hd 都會帶南瓜仔去書展，今年就帶埋南瓜妹，為左避開人潮，所以我就請左星期一假期。

我只是跟住hd行，我不知為何點解咁行去，總之最後係唔駛排隊就入到會場！！

我地只去了「兒童」部(三樓)，但已足夠行2-3小時！！

去書展買練習！？？？幼稚園喎，當然無去買啦！

但，的確有好多家長拎住10本、8本練習係手(聽聞書展係最齊練習) ........... 我不知南瓜兄妹升上小學後會否一樣，現階段不急就這樣做！！right！？

咁我地黎書展做乜！？？

↑ 我地並沒有買書，而係睇「玩」書展上既攤位 ^^

不過，我地都係玩，並沒有買到黎玩，因為真係幾貴，一幅港鐵棋要$298 ><

今年，大熱係《未來兒童》，係獲獎書雜誌 ......... 但 hd 話太深，不太適合南瓜仔，結果訂了《小行星》。

南瓜妹@PN完結

未讀 PN 時，我就一心考龍校，所以今次南瓜妹離校，無一種「難捨難離」既感覺(但都有不捨既感覺，特別臨到學校尾時)。
而南瓜妹對於自己要轉校，亦無任何野，仲話鐘意新校多啲！不過南瓜妹就有唔捨得同學仔，問：「點解 XX 唔同我讀同一間！？」「我想同 XX 一齊返學！」(阿女，你知唔知 XX 考到另一間龍校，只係你考唔到 =.=')


講番呢一年.........南瓜妹好快就習慣校園生活。

喜歡回家分享學校事(特別係是非 ><)，但每次佢同我講，我都會細心聆聽，雖然唔知有幾多成真，不過佢肯主動講，已經足夠。


自理能力：

食飯/著鞋 - 退步左(應該係懶左，當然做家長都有責任！)

其他野都有進步，只係進步得唔多。(呢啲就係惰性 ><)

學習方面：

由於係 PN 關係，所以基本上無跟進過佢任何學習上既野 (咩理論呢！？)，而且每次評估表都不錯(可能其他小朋友係滿分)，咁就由得佢。


故事爸媽 (14/07/2017)

第三次做了，原本只安排 hd 去 (因為南瓜妹想爸爸去)，但南瓜妹無端端要我一齊去！？好吧！就請埋呢日假，去做「故事爸媽」！！

南瓜妹都係無乜反應，算了吧！哈！哈！


19/07/2017 (3Y3M28D)

最後一天返學啦..........

我用午膳時間去接妹妹放學 (呢個媽媽最後連午餐都無食，直至放工)，可惜佢唔肯同佢既同學仔影相，好彩佢肯同老師影相留念！


希望南瓜妹會鐘意新校、新同學。

南瓜仔@K2完結

14/07/2016 (4Y9M25D)

K2 完結啦，沒有唔捨得，因為仲有一年讀嘛！哈！哈！

南瓜仔亦沒有任何不捨得，仲話自己升班，唔會掛住K2班主任..........

(隔離班既同學唔捨得老師，係堂上大喊........老師都喊左出黎，之後老師又同番個家長講，個家長又喊，係唔係我「冷血」呢！？)

同上年生活模式一樣，所以都無乜問題。

仲係幼稚園階段，所以一般情況下，一星期會去1-2次公園 .........假日都會有玩樂。

南瓜仔遇上一位好班主任，都係呢句「好老師比好學校更重要」，而好老師係可遇不可求。

老師有沒有將小朋友放係心上，作為家長會見到的。

只係講學期尾，學校已經沒有安排家長日，班主任係 whatsapp group (班主任連電話都俾埋我地) 主動同我地講，會打電話俾我地 (唔係俾張成績表我地就算)，告知小朋友學校生活上、成績上既問題或改善地方，作為家長真係暖在心頭。


學習方面：同上年一樣一年三次考試，只係多左一星期兩次默書。

曾聽閒 K2 課程會較深、多、教得快，而南瓜仔適應到(或都不是傳閒中咁深)，所以都無乜大問題，只係比K2用多左時間溫書/做功課。

考試成績理想，對我來說已超額完成，但我心明考試做得好，唔代表他聰明，只係佢有努力付出。

希望南瓜仔會升上K3後會學業會繼續進步，亦繼續開開心心！！


而最大挑戰就係考小一，都係要平常心，唔會俾太大壓力俾南瓜仔，始終都係一個未足5歲既小朋友，而且深明做細B係比較難考。

2017 父親節

18/06/2017 (4Y8M30D + 3Y2M28D)

今年父親節，我再無幫手俾「驚喜」！

 ↑ 佢地已經唔係BB，已經知道咩叫父親節，唔駛我呢個媽媽幫手，自己既事，自己做嘛，所以禮物都係用番學校做既手工！(其實講咁多野，都係我係懶！哈！哈！)

第一個節目就係去探 hd 朋友既bb，估唔到南瓜兄妹勁鐘意bb，佢地開心到呢........ (佢地幻想我會生多一個 >< )

玩下玩下，就三點多！！

回程返家時，兩隻小南瓜好快瞓左！


↑ 晚上，老公揀左太興食晚飯！？？？佢揀架，佢話佢想去食，咁係父親節，佢想食乜就食乜！！

出奇地，南瓜仔好鐘意食义燒飯喎，差不多全碟飯都食哂，好叻仔！！(若有厭食既小朋友媽咪會明白，佢地肯食，已係超額完成)

食完飯就回家啦！！

2017 最佳公公

多謝公公一直照顧南瓜兄妹........

我唔係太信任工人姐姐(都唔想講詳情)，若不是公公幫手照顧，我都唔知會變成點！？？


早上，我會攪掂哂南瓜兄妹，之後就送南瓜仔上校巴。

而公公就負責送南瓜妹上校巴，之後公公就去表弟家。(我同妹妹住同區，但就不同屋苑)

到中午時，公公怕我/hd 接唔切南瓜妹，所以公公每天都會陪我一齊接南瓜妹，當接完南瓜妹後，公公又會去表妹(姐)家接放學。

4點左右，公公又黎接南瓜仔放學，直至我回家。


雖然不是好辛苦既工作，但係「好困身」工作，連一些私人時間都沒有，我好感謝公公多年黎既幫忙。

父親節臨近，我地一家人提早慶祝出街食飯，而我就諗了一份小禮物給他，作為少少既心意！！

↑ 公公有，又點少得婆婆呢！？

婆婆開心到呢 ~~~~~

hd 有無！？當然無啦，我唔想屋企多件野！哈！哈！

南瓜兄妹@【2017 端午節】

30/05/2017(4Y8M11D + 3Y2M9D)

近幾年，我地都去左游龍舟水，所以一早就約左表妹、表弟去 ........

點知前一日，南瓜妹發燒，已經諗住唔去！！

到端午當天，南瓜仔又發埋燒，所以邊度都唔駛去 ><


留在家中有乜做！？咪留係屋企睇龍舟比賽囉！

今年，兩個小朋友互動又多左，佢地一齊估邊隊WIN，又扮划龍舟，十分攪笑！

當然唔少得就係食粽啦，應節嘛！


由於食左藥，所以都有睡意，午睡就睡左2小時！(我都一齊瞓埋)


晚上，見佢兩個都退哂燒，所以到樓下食夜餐，行一陣超巿就回家 ~~~~~~~

南瓜仔@2017 Variety Show

前言：

係3月收到學校通告，問小朋友有沒有興趣個人表演或親子表演！？

親子表演就唔好啦 ><

南瓜仔已學琴1年多，而且從未試過參加任何個人表演，所以希望俾南瓜仔試下 .......

我地就問左鋼琴老師既意見後，就揀左2首歌！ 

4月頭，就係單對單表演俾校長睇，估唔到又入到圍喎！？(其實當時仲未好熟，仲要睇住譜)

之後既日子好忙(去左旅行嘛)，所以都係3-4日練習一次，係臨表演前兩星期就隔日練習，再去表練前一星期，就日日練習！


20/05/2017 (4Y8M1D + 3Y2M29D) 

最初，我諗住著埋班際表演服做個人表演，但原來表演服係泳衣，無理由著住泳衣彈琴架！？

再問班主任安排，原來有足夠時間俾南瓜仔換衫，咁就當然唔著表演服啦！

學校安排好好，安排左特別座俾表演者家長，等我地可以睇得清楚啲！

首先係單人表演，南瓜仔排第四個 ........

↑ 到南瓜仔表演，南瓜仔完全沒有怯場(個禮堂應該有300人以上)，當佢表演完後，我忍唔住上前攬住佢，仲同佢講：「你表演得好好！」

唔好講笑，我真係覺得佢表演得好出色(雖然彈錯了兩個音)，但他只是一個4歲多既小朋友，亦只係學了一年多，係一個陌生環境、自己一個人表演，己經係超額完成。

南瓜仔不是音樂天才，只係佢肯練習，這是他肯付出既成果，不得不令我感動........(做阿媽係咁！哈！哈！)

單人表演後，就係親子表演，再係班際表演。

班際表演己是第六次，所以已經無咁緊張，但都好期待！！

我好欣賞學校既安排，每年都有兩次係台上表演。


↑ 今次班際表演，又進步左，更投入(上次係 hea跳)，表演係「The Little Mermaid - Under the Sea」，扮潛水員！

做父母，只見小朋友有進步就已好滿足，對嗎！？？

最攪笑係南瓜妹：「我仲要睇哥哥表演！」(唔通哥哥成為佢偶像！？)

到最後就係全 K2 + K1(半級)，一齊出演唱歌，咁就完左啦！！


表演完哂，問南瓜仔想食乜午餐，南瓜仔：「麥當奴！」

見佢表演得咁好，就奬勵下佢啦！！

南瓜兄妹@賣旗

20/05/2017 (4Y8M1D + 3Y2M29D) 

南瓜妹學校安排幫「防止虐待兒童會」賣旗，咁有意義既活動，我地當然參加啦 ^^

因為10:30係南瓜仔學校表演，所以我地就晨咁早去賣旗 ........

早上，天氣麻麻，所以我都揀左屋苑樓下有瓦遮頭既地方賣旗！

南瓜妹：

一開始，南瓜妹死攬住啲貼紙(旗)，佢話係老師俾佢，全部貼紙都係佢 ><

好不容易從佢手中拎走一板旗，唔知咩原因，賣賣下南瓜妹又主動貼旗係買旗者身上！？

見到佢主動咁做，已經覺得好叻叻啦！

南瓜仔：

一開始，只係肯貼旗，但又唔知點解，賣賣下又主動叫人賣旗喎！？

南瓜仔：「點解佢地唔買旗！？」

呢個就係我想佢去賣旗既原因之一，呢個世界唔會所有人都會聽佢講野，有些人會扮見唔到佢地。

亦有好心人事，見到小朋友賣旗，會主動買旗。

2017 母親節

17/05/2017 (4Y8M28D + 3Y2M26D) 

又係一年一度既母親節......

小朋友學校當然又安排禮物俾我啦！

南瓜仔送上禮物：「媽咪，送俾你架！」

南瓜妹送上手鏈：「俾媽咪.....」，但隔左幾秒，南瓜妹：「條手鏈係我架，唔係俾你......」之後仲自己帶上自己手 =.=

另外，妹妹既畫班就教佢畫我！


正日，我既鼻敏感又發作，食了藥都係止唔到鼻水，仲攪到我好攰 ><

真心，我只想留在家中 ><

早上，係 hd 安排下，南瓜兄妹送了花俾我，哈！哈！

下午就去左元氣食火車壽司，不過當時既我已經得半條人命，最想係快快回家休息 ><

回家後，就瞓了兩小時 .......

可惜，我既鼻水都係唔停，原本想去婆婆家，最後都係沒有去，唔想傳染俾其他人！！


晚餐，我地只係18:15 到樓下用膳，已人山人海，好不容易搵到一間有位食飯，但咁容易搵位既餐廳，都唔估到唔好食 ><

算啦，好過要等幾小時位，有得食就算！！

回家後，都係快快休息，第二日都無返工 ><

親子遊世界@【2017 復活節】日本東京之旅 - day 7

19/04/2017 (4Y7M + 3Y29D)

最後一日，我地既旅程都係唔 hea！哈！哈！


↑ 今餐早餐可以坐定定咁食！！


皇居及二重橋

黎呢度，係落左車仲要行一大段路，雖然唔係夏天，但都幾曬 ........

↑ 南瓜仔已經行到全身都係汗 ><

都係無香港人，全部都係外國遊客，好明顯呢度唔係香港人會黎 ><


東京消防博物館

我深信無乜香港人會黎 =.=


↑ 黎係試下玩直升機，其實又乜好玩呢！？不過見到南瓜仔玩得開心，都叫值得！！

玩完就搭的士返酒店拎埋行李走人 .........



成田機場

要搭1小時火車，今次買左「指定座」，所以一定有位坐！！

兩隻小南瓜係火車上又瞓左啦！！

去到機場，我終於可以行街啦，雖然只得45分鐘，但好過無啦！！

價錢都無睇，因為點都要買手信，所以都唔理得咁多 ...........

而我都不忘買個手袋俾自己 (連藥房都無買野，買做袋可以令個人平衡啲)

估唔到去到機場係最燒錢！哈！哈！

係飛機上，南瓜仔全程都無瞓，係咁「煲卡通」，我都唔明，明明有人每天最多俾小朋友睇20分鐘卡通，為何係飛機上可以睇300分鐘呢！？？

我就同南瓜妹玩一陣，食埋飛機餐，就係瞓 zzzzzzz

大約瞓左1小時多，我就醒左，我就睇左一陣卡通，南瓜妹又醒埋，不過南瓜妹唔係鐘意睇卡通，攪到我都唔知同佢玩乜好！？好不容易先到香港 ........


香港機場

係香港等行李真係好慢，等呀等呀 ........

再搭的士回家，南瓜仔終於瞓左，而南瓜妹又話肚痛！？但問佢係唔係 poo poo又話唔係！？

回到家已是22:00，南瓜仔應該好攰，因為叫醒左佢沖涼、刷牙後，佢就好快就瞓左！

南瓜妹仲好精神，攪左佢 30分鐘先 ko 佢 ><

唔好以為我可以休息，我仲要執行李、分手信 (好彩啲衫係工人姐姐洗)，攪攪下已經零晨一點，第二日我仲要返工，我真係好攰呀！！

親子遊世界@【2017 復活節】日本東京之旅 - day 6

18/04/2017 (4Y6M30D + 3Y28D)

大人就 06:30 起床，小朋友就 07:00 起床 ......

hd 話 日本既disney land 同香港迪士尼差不多，所以佢揀左 disney sea！

估唔到早上好多人返工，我地要揀1小時火車，再轉另1架火車再搭1小時先到！

第一程無買「指定座」(即係自由座)，大獲啦，無位坐 ><

南瓜兄妹係車上已瞓左，好彩有個日本人女人叫我坐係座位既arm度 (我絕對明白，無理由叫人讓座，1小時喎)，搭左20分鐘，突然有個後生既日本人讓座俾我地，我真係萬分感謝他，我真的無力再抱住南瓜仔，我都好快咁多謝佢讓座俾我，原本hd叫我抱住南瓜仔一齊坐，但我話俾南瓜兄妹一齊座，咁我地四個就最舒服！(好彩南瓜兄妹都細粒，兩個坐一個位都叫ok)

過左呢程車，下程車就有位坐啦 ...........

呢日係最舒服既一日，因為得一個「景點」，而且我地仲租埋bb車俾佢兩個坐 (1000 yen 租)，所以這天.........真。舒。服。


tokyo disney sea

入場券係香港買定 ($1430，兩大一小)，因為怕去到要排隊.......但去到時，根本唔駛排隊買！哈！哈！

我地算好彩，是但唔係太多人，好多野都唔駛點排隊！YEAH ~~~~~

去左woody 拎 fastpass，嘩！我晨早九點幾拎，都拎到 16:55 ><

之後就出發去玩啦 ..........

↑ 玩左唔同既機動遊戲！

午餐：


↑ 佢地園內既食物都唔叫貴，食物味道又不錯！

食完午餐，係時候午睡，佢地瞓左 ........ 就係我行街既時候，雖然最後只得45分鐘，但我已足夠我去買手信！！

又去玩唔到機動遊戲！

南瓜仔要去玩過山車，但南瓜妹唔夠高，所以就陪佢玩轉轉杯，南瓜妹一路玩一路問：「我一陣再同哥哥玩！」，但阿女，你知唔知道你阿媽已經轉到想嘔呀！？？

唔好講笑，玩完我真係要休息一下！

hd 見到我時：「點解你口唇白哂！？」(當然啦，轉到暈嘛)

再同小朋友再玩過 ..........


晚餐：


↑ 都係園內食！！

食完就睇埋煙花，但當時南瓜妹已有睡意，我就推佢去商場，等佢快點瞓 .........

由於食完煙花好多人一齊走，我就係搭了一程火車後，係附近超巿行下，再搭火車返酒店。

都係叫南瓜仔唔好瞓，不停咁同佢傾計，好不容易先返到酒店！！

不過就係咁，佢地返到酒店後又好快咁瞓著！


我又要執行李啦，其實我日日都執行李， hd問：「點解你日日都執！？」

其實點解唔駛呢！？又要分開大人細路既 dirty，我又拎定明天既衫，又要諗下點先可以放多啲野係行李度，執下執下都要30分鐘！

親子遊世界@【2017 復活節】日本東京之旅 - day 5

17/04/2017 (4Y6M29D + 3Y27D)

大人就06:30 起床，小朋友就07:00 起床 ......

原本睇相撲，但最終無得睇，改左去去中央巿場！！


東京都中央巿場

晨咁早就黎，我真係好想試佢地既刺身，但無奈 ....... 拖住兩個小朋友係食唔到 ><

但就食左玉子，又真係幾好味！！

最好味係桃味雪糕，值得推介 ~~~~~~

當然不忘買下手信！(但其實啲野都幾重 ><)


淺草(著和服)

租和服係一早網上book(淺草愛和服)，我就無興趣著和服 (唔好問點解，我真係唔鐘意)

南瓜仔一早就話要著綠色既和服，可惜沒有佢既SIZE，唯有轉著藍色！！

南瓜妹就著粉紅 + 綠色，但呢套唔似傳統和服，傳統和服又係無南瓜妹既SIZE........

沿途，實在有太多人讚美南瓜兄妹，個個人都話佢地可愛，仲要同佢地影相添！哈！哈！

南瓜妹：「媽咪，點解你唔著和服！？」

我：「你有無見過有人著住和服抱小朋友！？」

南瓜妹：「係喎！」

我：「咁你駛唔駛我抱！？」

南瓜妹：「咁你唔好著 ..........」

我 =.=

我地行下淺草，影下相，就去食午餐、食雪糕！


午餐：

文子燒，我就唔多欣賞啦，但老公話要試下喎！！


最後去換和服啦，但最不幸既事發生 ><，就係我同南瓜妹去洗手間時，唔小心夾到佢手指，流哂血 ........

南瓜妹應該好痛、好痛、好痛，因為我話請佢食糖，佢都話唔食 ><

職員俾了膠布我地，但南瓜妹都係不停叫住好痛，啲眼淚未停過，內疚既媽咪：「對唔住，媽咪下次會小心啲，媽咪抱住你，你唔好喊啦！」(一個無力既媽媽就全程抱住佢，直至佢瞓著為止)


日本科學館

原本係係豐田megaweb，但去到時無開，老公就轉去科學館(都係佢做足功課，點解話轉就可以轉！？)


估唔到南瓜仔咁有興趣，特別係迪士尼美術展，雖然全部都係日本，但對南瓜仔來說，有公仔睇就得！！

再轉去下一站，因為落位微雨，所以就搭的士去 ~~~~~~


legoland

可能係平日，基本上無人，所以都唔駛點排隊玩！

我地首先聽3D電影(日文)，原本南瓜妹睇得開心，但睇睇下就驚，之後就係咁攬住我！！

再去上 workshop (教砌 lego)，但都係全程係日文，好彩有埋電視教點砌，唔係南瓜仔應該唔明佢做乜！！哈！哈！

之後又去玩，不幸既事又發生，就係南瓜仔玩玩就跌低左，個咀流血 ><

不過南瓜仔有得玩，好快就忘記痛楚，又好快投入去玩！！

今次就無買任何野，因為價錢同香港差不多，無謂拎餐死，對嗎！？


晚飯：

今餐係南瓜仔話要去食麥當奴 ........ ><


因為有車仔換，南瓜仔已經講左兩日，所以走唔甩！哈！哈！

仲俾我地見到有超巿，都係買左士多啤梨同蘋果汁俾小朋友！


走既時候已經落住雨，好彩我地一家四口都著住有帽既風褸 ~~~~

去到新宿，啲雨無停過，仲越落越大，但我不忘要買膠布俾南瓜妹，買唔到都唔知點算 ><

我用左1分鐘行藥房，就買左膠布就走人 (7日之旅，我只係行左1分鐘藥房，我諗我係唯一一個香港女人去行咁「長」時間)

返到酒店就快快同佢兩個沖涼，再同南瓜妹換膠布，見到南瓜妹既傷口，我肉都赤埋，都係我唔小心，先有咁既意外 ><

親子遊世界@【2017 復活節】日本東京之旅 - day 4

16/04/2017 (4Y6M28D + 3Y26D)

我想無乜人好似 hd 咁編行程，hd 覺得旅行就要認識下當地文化，所以行程唔似一般「親子遊」！哈！哈！

早上，都係去左便利店買早餐食 .........


明治神宮

黎呢度少啲腳力都唔得(南瓜仔已好叻，自己行足全程)，因為落左火車後要行一大段路先到(30分鐘以上)，沿路無香港人，反而外國人都多！！

 ↑ 呢度環境真係好優美。

行左入去，都要行番出黎，又係30分鐘 ><

又搭火車去下一個目的地............


上野動物園

我終於見到日本既小朋友，呢幾日我都無見過！！

見到有BB車租，就問南瓜妹要不要坐！？南瓜妹當然話好啦 ........

南瓜仔聽到，都話要坐，我都估到，所以我一早就決定唔帶 BB車，佢兩個都係爭住坐！！

有 BB車 ，大人細路都都舒服好多！！(起碼我背包可以放係BB車上)


↑ 我唔會推介俾朋友，可能係我地唔好彩，啲動物大全部都無出黎，但唔知佢地想點！？=.=

南瓜仔：「點解隻馬騮唔開心，係唔係啲香蕉俾烏鴉搶走左！？」

我心諗，當然啦 ....... 無自由嘛，所以我真心唔太鐘意動物園，更唔鐘意馬戲團。

其實仲有另一邊既動物園，但我地無去........因為呢一邊都令我地失望！


上野東照宮


↑ 呢度係路過，咁就影下相啦！


上野公園

離開左東照宮，hd 就抱住南瓜妹，而南瓜妹好快就瞓左，南瓜仔好明顯有睡意..........

但我見hd走既方向唔係火車站！？咁佢去邊呢！？我明明見到火車站，但點解hd 問警察路呢！？不過我都估佢係有另一個目的地 ><

hd 行行行 (真係行左好耐)，我就拖住南瓜仔係後面行，又要上幾十級樓梯，終於到啦 ........


↑ 嗱！我唔識佢，我都唔知係乜 ><

唔知大家明唔明白我既心情呢！？？？？？

離開之後就去搭火車 ...........

南瓜兄妹又係火車上瞓！！我就抱住南瓜妹，hd 就抱住南瓜仔 ........ 好不容易先有位坐><


sanrio puroland

南瓜妹至愛既 hello kitty，不過入場費都幾貴，兩大兩小過一萬 YEN ><


↑ 終於可以休息下 (我講緊我)，我地就食埋午餐，靚就好靚，南瓜仔仲揀左藍色咖喱添 ><，味道都不錯，價錢都不貴 .......

入面都好多人，個個都扮哂唔同既卡通人物，我本人就唔係好鐘意 ><


↑ 又玩下火車睇 sanrio 既公仔、睇表演、 入 hello kitty 館，仲見到「真 hello kitty」、買下手信，咁就好快就2小時，若係 sanrio fans 真係不能錯過！！

離開之後，hd 就要打電話去 book 睇相撲喎，佢就走左去商場打電話 (唔知點解我地手提打唔到！？)，我就同南瓜兄妹扭蛋！！


pokemon center mega tokyo

睇完南瓜妹至愛，點少得南瓜仔呢！？？

我係話反對去，但 hd 問南瓜仔去唔去，南瓜仔話要去，所以 hd 就決定黎，但黎呢度，真係可以用千辛萬苦來形容！！

兩個小朋友係火車度已瞓，我地仲要無坐位 ><

我地 19:31 落火車，由火車站去到目的地要行 8分鐘，但閉館係 20:00。

難題一：呢度老公未黎過，唔係火車站上蓋(就好似由灣仔港鐵站去合和中心) ，所以 hd 手拎電話睇地圖，另一路行一路要問人路。(怕行錯路)
難題二：南瓜兄妹都瞓左，我就要叫醒南瓜仔，因為我無法抱住南瓜妹行去目的地！

臨落火車時，我已叫醒南瓜仔，當然叫醒時有點不願意，但我同佢講：「你係唔係要去睇比卡超！？」南瓜仔就變得好精神，我就拖住南瓜仔急步行，期間南瓜仔有問：「仲有幾耐呀！？」

時間一分一秒咁過，已經係 19:42 ....... (其實我有擔心趕唔切)

終於到了目的地商場既樓下，目標在前，南瓜仔就好快好快咁行，見到啦！見到啦！


↑ 南瓜仔無比既高興，此時，抱住南瓜妹都醒左 (其實 hd 最辛苦，仲要抱住南瓜妹行，又要問路，有拎住個電話睇地圖)

睇到南瓜仔咁開心，咁辛苦黎都好值得！！

咁辛苦先黎到，點到買一大袋野啦，唔買都對唔住自己，係唔係！？

 P.S：要放棄其實係好容易，就係因為 hd 既堅持，仲有南瓜仔既努力 (佢唔肯行係去唔到)，最後終於黎到，南瓜仔去到既開心樣，永遠留我在心中 ......... 


晚飯


↑ 都係是但搵一個餐廳，其實我真係好累好餓，食物質素都不錯呀！！

食完之後，又經過超巿，又買下士多啤梨俾小朋友食！


回程時，千叮萬囑叫佢地唔係火車瞓，因為前幾日都係火車瞓左，返到酒店都好精神 .........

結果，今次沖完涼無耐，就好快瞓著，我又可以早點休息！哈！哈！