南瓜妹@21個月

21/12/2015 (21M)

07:10  奶 (6安) + 包
07:15  刷牙 + 洗面 + 換片 + 換校服 
08:00  落樓 /上校巴
08:25  到校
17:00  放學
17:25  落校巴
17:30  換衫 / 洗手 / 遊戲時間
18:45  晚餐 + 水果
19:30 小休
19:50  洗白白
20:00  遊戲時間
20:30  奶 (6安)
21:00  瞓

食
湯、包係大愛。

呢排晚上唔多肯自己食飯，仲要用手食食，但老師又話佢學校食得好好，咁即係返到屋企 "蝦" 我啦！！

大便
1 -2次。

南瓜妹未屙poo poo 前已同我地講佢要去 poo poo，不過仲未肯上廁所，希望黎緊既聖誕假期可以成功帶南瓜妹上廁所！！

瞓
都唔知佢身上係唔係掛左個"鐘"，點解每天六點幾就醒！？可否假期瞓多一陣呢！？

天氣咁凍，真係好想瞓得多一陣，南瓜妹未到六點半已經係床叫"奶奶"，我同hd諗住南瓜妹叫多兩聲，就會再瞓番，但南瓜妹無瞓番 ......

六點七，hd 就抱了南瓜妹入大人房，諗住大家一齊瞓多一陣 ......

南瓜妹係大人床又無再叫奶奶，心想：「可以瞓多一陣！」

但未到七點，南瓜妹：「起身！起身！」(我繼續扮瞓)

南瓜妹不停咁叫 ，唯有張開眼，南瓜妹一見到我張開眼，仲拍我果身：「起身！」，之後係床頭枱拎左眼鏡俾我，仲要幫我帶埋，唉！無得瞓！！><

發展 
語言能力：

1) 對話，可以回答簡單問題 .....
我：「妹妹，我聽日買左杯俾你，你要咩公仔！？」
南瓜妹：「HELLO KITTY」
我：「你要買HELLO KITTY 杯呀！？」
南瓜妹：「係呀！HELLO KITTY！」
我：「點解我要買杯俾你！？」
南瓜妹：「杯杯跌左！」(工人姐姐同我講，南瓜妹跌爛左個杯！)
我：「杯杯跌爛左！？」
南瓜妹：「係呀！跌爛左！」

2) 識到眼、耳、口、鼻既中文字 (係上次去旅行，某家長話自己既女已經識到中文單字，再細問下先知學校有教，之後我返屋企問南瓜妹，原來南瓜妹都識睇中文字)，最攪笑我問南瓜妹其字中文字 (爸、媽)，南瓜妹答：「唔知！」
 
3) 自己數 1-10 

4) 講同學名 (係前2個月南瓜妹見到佢同既相片先會講得出同學名，今個月係同佢傾學校野時，佢主動講同學名出來) 

5) 可以唱到數首歌 (雖然部份既"字"食左落肚) 

活動能力：
- 出街多左自己行，呢個係我重點要南瓜妹要改善既地方。
- 出街一定要揹背囊。 

返學
南瓜妹都有家長日，今次係由我去 .......

班主任對南瓜妹既評價都好好，例如理解能力高、受同學歡迎、自理能力 OK、同老師對話等，不過作為家長，除了想聽好聽既說話外，我都想知需要改善或留意既地方，始終人無完美 .....

我問了班主任幾次這個問題 (係唔係有點變態呢！？點到要老師答！)，頭幾次問都話無，最後班主任就講，南瓜妹行路仲未好穩！！

南瓜妹學校都會自己行，但亦會叫老師抱 (我無諗過南瓜妹會叫老師抱！)，班主任一講，我就突然 "叮"一聲，南瓜妹真係未跑過喎 ，睇黎我要好好"訓練"南瓜妹先！！

其他

-  16隻牙
-  19.8磅(9kg) 
-  好有主見，著衫要自己揀、食包要食1個 (但係食唔哂！)，一唔啱心水就講：「唔啱！」/「唔係！」
-  最愛 HELLO KITTY

↑ 21個月！！由 hd 剪了前面既頭髮，勁 ugly ><