南瓜妹@PN大作戰(3) - 樂基幼兒學校

05/12/2015 (20M14D)

開始 in 心儀學校啦！！

撞正南瓜仔表演 (9:15 - 10:30)，我已經遲幾日先寄出報名表，希望會排去下午先面試 (面試10:30，但要做15分鐘到)，好彩南瓜仔最後表演 10:00 完成，hd 同南瓜妹可以睇完表演先去！！

而呢間學校，我揀左英普班，所以由 hd 負責帶南瓜妹面試！！

但今次面試既安排真係 .......

10:15 - 10:55： 要家長早15分鐘到 (即10:15，但 hd 10:10 已到)，但 hd 排係學校面口排到差不多 11:00 先有得入，排左足足40分鐘！！ (10:35 我已到學校門口，但我唔敢俾南瓜妹見到我，我怕佢會捉住我唔俾我走，因為學校話只可一家長面試，我同南瓜仔就係出面等)

10:55 - 11:10： 學校安排室外活動俾小朋友玩，但係只係玩左唔夠 15分鐘，就 call 左 hd去面試！ (hd 打電話俾我，話我同南瓜仔可以一齊入學校)

11:10 - 11:50：由大門外再登記，安排上課室，再上課室門外 "等"，咁又 40 分鐘。( 11:25 hd 打俾我話可以2個家長一齊見，而南瓜妹又扭計，叫我一齊面試！)

11:50 - 12:08：面試時間用左18分鐘。

全個面試程序有用113分鐘，等候時間係80分鐘 (係排住隊等80分鐘) ><

最令我覺得奇怪係 ......我地係 X39 號碼，但排我地後面係 X98 號碼，hd 話佢地英普班同英粵班分兩條隊 ！？？即係 X40 - X97 一早就 in 完！？？？

一個未夠2歲小朋友等咁耐，最後結果係咩！？？唔駛我講，大家都估到 .......

面試......

學校安排小組面試，8個小朋友連家長一同入去，但入到去又話唔見左我地份表，攪左一輪，又話搵到 ><

1) 要南瓜妹自己一個坐，家長坐後面，南瓜妹當然唔肯坐，要我抱啦，我就俾餅佢食，都叫肯自己坐定定！！

2) 老師俾一個玩具牌南瓜妹，南瓜妹都肯拎，係呢個時候，hd 想拎左南瓜妹既餅，天呀！！南瓜妹一定狂喊，點解要拎走佢既餅呀！？？最後南瓜妹都係拎住包餅，但之後就指令全部都唔願做 ........

3) 將俾個玩具牌爸爸或媽媽 (但未講之前南瓜妹已經唔肯拎玩具牌)

4) 幫洋娃娃洗面同梳頭，都做到一半！！

5) 問家長問題，問平時帶小朋友去邊同鐘意做乜！？(我諗呢一PART係考家長既普通話)

6) 之後就唱 goodbye song，南瓜妹當然唔啋佢地啦！！

未出門口，南瓜妹已經叫我抱，我都照抱 ..........

呢個學校好出名，面試者起碼幾千人，只能講南瓜妹同呢間學校無緣！！