19/12/2015 (39M)
食
都係唔飲湯、唔食菜 .......
不過食飯進步左好多，特別當我地話妹妹唔食飯時，佢就食得特別好！！
瞓
晚上，15分鐘內就會瞓著。
發展方面
對話：
hd 出左街，南瓜仔想玩車：「媽咪，可唔可以玩一陣車！？」( hd 收哂佢既車)
我：「爸爸會鬧架！」
南瓜仔：「爸爸返黎前收番埋，爸爸唔會知！」
吓！咁都得！？？？
我病到想到死 (咳左兩星期都未好，仲要把聲變哂，最慘係有一日抱住南瓜仔跌係地上，我雙腳及手肘都瘀哂，另一隻腳流哂血，條褲都爛埋，由於我手肘落地先，但南瓜仔個頭都有撞落地上，我已盡能力保護佢，好彩南瓜仔無乜事)，我好需要休息.....
我就同南瓜仔講：「媽媽好攰，你快點瞓！」
南瓜仔：「我要睇書！」
我：「你再係咁，媽媽會死！」
南瓜仔喊住講：「媽媽唔會死！」
我：「人，係會死架！」
南瓜仔：「 媽媽唔會死， xx 同 yy (我都唔記得佢講乜動物)先會死！」
我：「咁你早點瞓，俾媽咪休息，我就唔會咁快死！」
就係咁，南瓜仔就瞓啦！！
肌肉：
單腳跳4-5下 (南瓜仔真的似為自己好叻)
其他：
- 告別 BB 牙膏(可食用)，之前一直都係用 BB 牙膏 (hd 叫我轉左好耐)，我地都怕南瓜仔會蛀牙，所以轉用兒童牙膏 (含氟)，最初用就喊爆 .....
為左唔想南瓜仔刷牙變左 "苦差"，所以講明若食左甜既食物，就一定要用兒童牙膏。
最初幾日點到唔食甜食物，最後難忍甜食物 (雪糕、餅)，就開始接受現實用兒童牙膏.......
咁就成功左啦！！ (雖然要到38個多月先轉.....)
- 見到南瓜仔既同學食已經成個蘋果食，我仲係切緊(1/4)俾南瓜仔食 ><
回家後，我就俾左成果蘋果南瓜仔食，原來南瓜仔已經可以成個咁食，仲食得好乾淨，仲識得唔食入面既核！
- 另外，我仲俾全粒車厘子俾南瓜仔食，原來南瓜仔已經識得自已吐核，雖然食得好dirty，又食得唔乾淨，但我覺得好叻叻！！
是我，是我太保護南瓜仔，咩都唔俾佢試，攪到南瓜仔咁多野可以自己做到，但又唔俾佢試，都係我的錯！！
返學
家長日來到 (是日我帶了南瓜妹去旅行，所以由 hd 見！！)......
班主任對南瓜仔既評價都正面：
- 聰明
- 記性好
- 學習能力高
- 專注力高
亦有要改善既地方：
- 不太主動說話，只會表達需要。(呢個是最難改善，我地已安排南瓜仔上話劇班。)
- 用筆無力，班主任叫我地練多d，因為上到 K2 就會有好多字寫。
南瓜仔學校成績評核好簡單，只得數個評份：A+ (6個)、A- (1個)、B(4個)、B- (2個)。
重點要改善評核無咁好既地方 (即 B- )，
創意同
整潔， 整潔我估可能南瓜仔食飯食得 dirty，但創意係咩！？呢個都唔知點改善！？？？
情感方面
玩具又爭、食物又爭、抱又要爭，咩到要同要爭一餐，爭到我都覺得煩 .....
- 南瓜兄妹各有背囊，南瓜仔：「妹妹，我幫你拎背囊！」
南瓜妹：「唔好！」
南瓜仔堅持要幫妹妹拎，但南瓜妹又唔俾，之後佢兩個一齊喊 .......
好彩佢地兩個都係返全日，所以當佢兩個同時係屋企時，我或hd都會係屋企，若得工人姐姐一個，我都唔知會變成點！？？
不過，佢地又會幾好感情.......
- 出街時，南瓜妹行路好慢，但南瓜仔每次都會返轉頭搵番妹妹。
- 每天早上，我會買包俾南瓜仔食，南瓜仔都要買2個，南瓜仔：「一個我食，另一個買俾妹妹嘛！」
