親子好去處@望道號

27/07/2015 (34M9D) + (16M7D)

目的地：望道號 (尖沙咀碼頭)

係屋企食完午飯就出發 ........ 

我地揀左星期一去，諗住無咁多人，但估唔到上到船都係人山人海，我諗星期六、日一定迫爆！！

費用：$10 (3歲以下 或 65歲以上免費)

上到船，南瓜仔問我：「點解無開船！？」

佢又知道架船無開！？？哈！哈！

書店以英文書為主，價錢唔算平，大部份都係二、三線出版社，地方唔算大！

 

↑ 船上都有地方影下相！

 ↑ 因太多人，所以都係得少量既「戰利品」

地點：尖沙咀碼頭
 

之後就去左牛角食下午茶！！


↑ 南瓜仔話要自己燒，可能係自己燒，所以佢好鐘意食 .........

食完就返屋企啦！！

親子好去處@新都城 (Bomberman 大暴走)

26/07/2015 (34M7D) + (16M9D)

目的地：新都城 (Bomberman 大暴走)

早上仲係落住雨 (估唔到下午勁好天)，所以都係諗住室內玩！！

我地就食左午餐先 ......

只要電子消費 $500 以上，或登入佢地既網址，就可以免費玩Bomberman遊戲！！

↑ 南瓜妹一見到有波波玩，就不斷叫「波、波、波、波......」，但都我地玩時，南瓜妹又唔玩囉！！

再排隊玩其他遊戲，排隊時間唔算耐 (唔駛錢喎，可接受！)

每次玩完，職員都會讚下小朋友，南瓜仔真係以為自己好勁，其實只係職員俾佢玩幾次，先可以順利玩完！！

一共有4個遊戲，最後4個遊戲都順利過關，拎到小禮物！！(我相信係唔係都送禮物！)

之後返屋企午睡，再去母親大人屋企食晚飯！！

親子好去處@香港文化博物館(兒童探知館) + 沙田新城巿廣場(迷你兵團)

25/07/2015 (34M6D) + (16M4D)

目的地：香港文化博物館(兒童探知館)

呢幾日都落雨，所以唯有諗室入活動 .......

當然南瓜兄妹仲未識，或者要再等佢地大少少，佢地先會真正明白！！

↑ 唔知點解，小朋友咁鐘意睇魚！？當然佢兩個都唔例外 .......


↑ 米埔沼澤區

有個A小朋友 (大約7-8歲)，拎住哂所有「玩具牌」(只剩下1個)，之後B小朋友(大約2-3歲)同南瓜仔都想玩，此時，B既家長就叫B小朋友問A小朋友 ......

B小朋友：「唔該，可唔可以俾我玩！？」
A小朋友：「唔得，你要再禮貌D！」(唔肯放玩具牌)
B小朋友：「唔該，我地可唔可以一齊玩！？」
A小朋友：「唔得，你要再禮貌D！」

B 家長見 A小朋友唔肯俾，就再無叫B小朋友俾 .......

我忍不住：「小朋友，你可唔可以教我點樣先叫有「禮貌D」！？姨姨唔識，你教我啦！」
A小朋友：「我唔識！」
我：「吓！咁點解你覺得(B)小朋友無禮貌！？」
A小朋友： 「俾你地(B小朋友 + 南瓜仔)玩！」

現在小朋友真係以為自己大哂 ........

↑ 昔日農村生活

- 電腦遊戲 (南瓜兄妹唔識玩)


↑ 玩具展 (張地毯真係好靚！)

南瓜仔就全場跑來跑去，無時停，都唔明點解佢咁好精力！

去完兒童探知館，咁再去睇文化博物館睇下「武‧藝‧人生李小龍」，但佢地2個完全唔知乜東東，所以hd都話快點走，唔好嘈住人 ><！！

地址：新界沙田文林路1號

之後就去食下午茶 .......


目的地：沙田新城巿廣場 (迷你兵團)

hd 好怕去呢個商場，因為超多「自由行」，不過黎到沙田，無理由唔去睇下大熱既「迷你兵團」(minions)......

食完下午茶後，就去影相「集郵」，佢地兩個已經進步左好多，雖然都好難影合照，但相對幾個月前已經好好多！！


↑ 基本上大部份人都會排隊等影相，只有少部份人會打尖(或者佢地唔知自己打左尖！？)，我地成日教南瓜仔唔可以咁做，我都唔明白，點解d家長唔教導小朋友，連自己家長都打尖，咁點教小朋友呢！？

之後就行左一陣街，不過真係好多人，我地又無購買意慾，所以好快就回家了！！

地址：沙田正街

南瓜妹@開學準備

話咁快南瓜妹就要返學，但屋企人俾左好多說話我聽，攪到我有少少唔開心！！

A：「咁細個就返學，原本唔白痴都變白痴！」
(咩理論！？？)

B：「咁細個就返學，無人陪好慘！」
(有老師/同學陪，唔通係屋企自己係PLAYMAT玩就叫有人陪！？？」)

C：「咁細個就返學，去陌生環境，係屋企咪好！」
(返多幾日學咪唔陌生！)

D：「咁細個就返學，咩都唔識，講野又唔得，得唔得架！？」
(好多小朋友返2歲班時都唔識講野，南瓜妹就係乜都唔識，所以咪要返學學，特別係自理能力！)

E：「咁細個就返學，將來讀書仲漫長，駛唔駛咁早讀咁辛苦！？」
(現在返學唔係要默書、考試，有幾辛苦！？)

作為父母，我只係想俾更好既生活給小朋友，南瓜妹係屋企只係得工人姐姐照顧，因南瓜仔自理能力太差，唔多唔少都係我地縱壞佢，我唔想重蹈覆轍，我亦希望南瓜仔見到妹妹都自己做，令到佢都自己做番！！(在職媽媽既苦腦)

其次，我唔想老人家辛苦，要長期照顧2個小朋友真的不容易，可以的話佢地應該享受生活，飲下茶、晨運、想見下孫就走黎同佢玩一陣！！

這間學校是可以星期六返半天，我暫不安排南瓜妹返，一來無校巴、二來我想佢有多D親子樂，總之我地一放假，南瓜妹就一齊放假(暑假除外)，始終小朋友最需要係父母！！

講左咁耐，講番正題先 .......

早前已去左家長講座，都係講學校既理念等等既野，同理要準備既野 .......

最煩係南瓜妹對腳太細，白波鞋都容易搵，只係無乜款揀，但起碼都買到！！

但買白色皮鞋真係不容易，連最大型既Dr Kong、千色店、aeon 全部都無佢 size，最後我要去到荃灣既 stride rite 先買到！！

↑ 1) 白皮鞋 stride rite，白波鞋 adidas

2) 白襪：著校裙就用有花邊白襪，運動裝就用南瓜仔二手！

3) 「名貼紙」：我去左快圖美，雖然係貴左少少 ($35@50張)，但都係用幾張，近近地有就算！！

4) 毛巾：之前朋友送
 
↑ 5) 當然仲有最重要既校服 (已經係加細碼，但都好大件 ><)

書包、食物盒、水樽都係由學校提供，返學第一日先派！！

親子好去處@調景嶺公共圖書館

目的地：調景嶺公共圖書館

南瓜仔正放暑假，hd 就放假陪佢，但呢排又成日落雨，最好當然係室內啦！！(可惜，hd 暫時不會1個帶2個出街，南瓜妹唯有留係屋企！)

呢間圖書館新開無耐，雖然圖書館面積唔算大，但勝左所有野都好新淨，特別係圖書 (有時見到圖書館既書，又舊又爛又臭，見到都唔想睇) ！

我地平時既習慣，係我係主力講中文書，而hd主力講英文書，等南瓜仔識得分 ......

可能我講書吸引力不大，又或者南瓜仔鐘意英文書多，所以好多時南瓜仔會講：「我要同爸爸睇書，唔同媽媽睇！」(臨瞓前除外) ><！


↑ 全部書都係新架，真係好吸引！！

南瓜仔有個習慣，就係臨瞓前一定要睇書，不過屋企大部份都係英文書(因淘寶平)，反而中文書就不多，所以hd主力借中文書！！

↑ 南瓜仔已經識得自助還書同借書！(途經調景嶺體育館 - 兒童遊戲室)

除了借書外，hd 仲會借兒童歌 CD，會係晚上會播俾佢地聽！！

地址：將軍澳翠嶺路4號

南瓜妹@16個月

21/07/2015 (16M)

為了配合返學既時間表，所以今個月亦作了更改，希望容易適應校園生活......

07:30  奶 (8安) + 包
07:45  遊戲時間
11:30  粥
12:00  遊戲時間
14:00  小睡
16:00  遊戲時間 + 下午茶
18:30  粥
19:15  食大人飯 + 水果
20:00  洗白白
20:15  遊戲時間
21:15  奶 (8安)
21:30  小休
22:00  瞓

食
無食糊仔，轉左包俾佢！

食哂都係一時時，一時食得勁多，一時乜都唔食，睇佢心情！

大便
1 -2次。

瞓
自從南瓜仔放暑假，南瓜妹就唔肯瞓，一放落bb床就狂喊，試過喊到嘔 .......

但放落大人床就無事，但2個小朋友一齊放落大人床是不可能既事，都唔知可以點！？？

發展 
語言能力：
- 講到句子「我要抱抱」。
- 「睇peppa pig」(呢句說話應該係南瓜仔身上學 ><) 
- 數「數字」。

活動能力：
- 戒奶樽中，已成功用吸管飲到6安，但有時只係飲1安！！
- 行路穩左好多
- 行樓梯 (要拖住) 

學習能力：
南瓜妹返pg / 屋企教都係坐唔定，唔太專心，所以都學唔到野。

其他
-  9隻牙
-  18.5磅(8.4 KG)


- 南瓜妹有食手指習慣(只係臨瞓前食)，諗了一陣子，最後決定買「Bite-X 寶寶手指水」(塗上指甲)試下有無用，我同hd 都有試過味，真係好鬼苦 >< .....

頭一次用狂喊，仲嘔左3次(我真係好肉痛，但hd話堅持要俾佢用)，之後幾日就唔多食手指(仲會喊)，又願瞓 ....... 再過多幾日，佢已經唔再怕「手指水」！我都唔知點幫佢戒好，現在都係同佢貼膠布，但南瓜妹會自己除塊賿巾出來！！


 ↑ 16個月！！

南瓜仔有時會好鐘意妹妹，一時要拖住妹妹行、一時又要餵妹妹食野、一時又要錫佢。

但有時又話唔要妹妹，話妹妹拎佢既車(南瓜仔話屋企所有車都係佢)，叫我帶妹妹走！咁我就話：「送俾表哥好唔好！？」佢又會答：「唔得！」

親子好去處@尖沙咀

19/07/2015 (34M) + (15M30D)

目的地：尖沙咀

我地都係等佢地午睡後先出發 ........

↑ 今次去尖沙咀既最主要目的係去 Mr Potato head cafe - Izumi Curry，去到既時候(5點多)唔駛等位，咁就快快入坐先......

職員好好人，好主動俾d公仔我地影 ^^，可惜當我地好正常咁落餐時 .......

我：「唔該，我要呢個漢堡餐同牛肉薯餅餐」(唔記得餐食叫乜，係咁上下名)

職員：「唔好意思，三個漢堡餐都賣哂 .... 同埋熱香餅餐都賣哂！」

我：........

我：「咁我要牛肉薯餅餐同蛋糕餐」(唔記得餐食叫乜)

我：「 牛肉薯餅餐，就跟蘋果汁！」(之前問左南瓜仔，南瓜仔話要飲)

職員：「唔好意思，蘋果汁同橙汁都賣哂，你可以飲可樂或雀檸！」(南瓜仔聽到無得飲，就唔開心！」

我：「吓，又無哂！？？咁要雀檸啦！」

職員：「牛肉薯餅餐，跟燒汁定咖喱汁！？」

我：「燒汁！」

隔左一陣 .......

職員：「燒汁無哂，得番咖喱汁！」

我心諗，呢間係乜餐廳，乜都無！！！

我：「咁咖喱汁辣唔辣！？」

職員：「有少少辣，但我地可以分開上，但係原本燒汁有牛肉，咖喱汁就無牛肉！」

有無咁過份呀！？？無牛肉！？咁即係得叫個牛肉薯餅餐無牛肉！？咩餐廳呀！？？？

我：「咁我要炸豬扒餐，咖喱汁另上！」

佢地既食物質素麻麻，價錢又唔係平，我6點走人時出面已排哂隊，若果你要我排1小時以上，咩都無得食，我真我一定發脾氣！！

食完就去尖沙咀行下街 .......

↑ 美麗華商場，係商場購物，可有免費飲品1杯


↑ 海運中心 (Where's Wally?)


↑ 海運中心 (Lego 展 - 「LCX 丹麥動感創意遊展覽，有2個展區)，佢地既Lego 好壯觀，而南瓜仔最鐘意當然係火車啦，車迷真係車迷，南瓜仔睇到唔想走，仲要跟住架火車行！！

再行下街，咁就返屋企啦！！

親子好去處@2015 香港玩具展

18/07/2015 (33M29D) + (15M27D)

是日早上，我要去南瓜妹既家長講座，南瓜仔又要學游水，所以都係屋企食午飯！！

但不知為何，自從南瓜仔放暑期，南瓜妹就唔肯瞓，一放落床就喊，好不容先氹到佢瞓 (可以係太累)！！

待南瓜兄妹起床已是四點了，就出發去 EMAX！！

目的地：EMAX (2015 香港玩具展)

十分後悔黎左呢度！！

排入停車場，等了好耐 ......

好啦，入到停車場後就排隊買票，點知話要隊1小時，同南瓜仔講明天再來，南瓜仔話唔好！！(因為一早同佢講入去睇車車同買車俾佢，南瓜仔仲係屋企揀定左要邊架車！)

咁應承左佢，又唔想佢失望，唯有排 ....... 但係烈日當空排，真係好辛苦！！

終於排到入去，足足排了45分鐘，入到會場已是人山人海！！

去到當然要睇下佢地既TOMY既大型車展，南瓜仔睇到好入神，我諗佢想買番屋企添 .......

之後排隊又黎過，佢地既安排簡直離哂譜，好彩我地醒目，兵分兩路 .....

1) 做TOMY會員證 - $60，有1架小巴送，買野有8折 (hd 同南瓜妹排)

2) 買TOMY玩具車 - 去到話買8架，有6架都話無貨，仲要排左1小時以上，佢地想點呀！？？我最後是但揀左4架車就算，唔通排左咁耐只買2架 .......(我同南瓜仔排)

3) 買TOMY停車場 - 佢地買玩具車同停車場係分開俾錢，咁即係我地又要排過另1條隊！！(我地隊到中途先知，所以hd 又同南瓜妹再排過)

買玩就快快走人去母親大人屋企食飯！！


↑ 第二朝，只係佢聽邊講：「可以玩停車場！」，唔駛1秒，即刻彈起身！！

南瓜仔@34個月

19/07/2015 (34M)

食
真係好煩，咩都唔鐘意食，我真係想知可以點！？？

今餐話食某樣食物，下一餐又會唔食，仲要所有菜都唔食，你地話死唔死！？？

瞓
暑假：午睡2小時 (出街除外)

晚上，21:30 上床後，約15分鐘就瞓著。

發展
自理能力
- 如廁：仲要大人幫忙去廁所 (但老師話佢學校自己做哂！)
- 懶到出汁，成日唔肯行。(一見到妹妹抱住，佢就話要抱！)

說話能力
- 越來越似大人講野
- 懂得反問

返學
老師評語係有好大進步！

親子好去處@警隊博物館 + 山頂

15/07/2015 (33M26D) + (15M24D)

今日我放假陪佢地玩！

南瓜仔同南瓜妹都會好主動拖住對方，每次見到佢地拖住，我個心都甜哂！

  

↑  早上我一拖二帶佢2個CLUB HOUSE玩 (貪夠近同埋地方唔大，一眼就望到佢地)！

玩完就返屋企，又同佢地玩一陣，之後就食午餐！！

係呢個時間hd就返屋企 (是日返半天)，待佢地食完後就出發去玩 ......

呢2隻豬仔，上車無耐就瞓左！！


目的地：警隊博物館 

點解會帶南瓜仔黎！？因為我地想佢認識警察 ......

我時常同南瓜仔講，若唔見左媽咪點算！？

南瓜仔：「搵警察叔叔！」

我：「咁警察叔叔問你媽咪電話呢！？」

南瓜仔：「9xxxxxxx」

我：「啱啦，咁警察叔叔就會搵到媽咪，媽咪就會搵番你架！但若果你拖實媽媽，咁咪唔會唔見左你囉！」

呢度有警察制服，我就同南瓜仔要搵著呢d衫既警察，唔好隨便搵陌生人！(南瓜仔好似好專心聽！)

不過南瓜仔最鐘意係睇舊警車模型，不過佢話係的士，我話係警車，南瓜仔話：「警察的士！」，我：「呢d係舊款警車，唔係的士呀！」(南瓜仔個樣好似唔相信)

我地仲介紹埋警犬俾南瓜仔知，不過佢地似無興趣！哈！哈！

↑ 館內不淮拍照，但外面都有地方可以影相！！

地址：香港山頂甘道27號
網址：http://www.police.gov.hk/ppp_tc/01_about_us/pm.html

之後就出發去下一個景點！！


目的地：山頂(山頂花園)

我一心以為山頂花園係有兒童遊樂場，原來係無喎，真係得個花園！


↑ 不過呢個花園又真係幾靚，呢度有一大遍草地，就同佢地玩左足球同吹泡泡，但由於天氣太熱，所以都係逗留左一會，就出發去下個景點！！


↑ 沿途經過


目的地：山頂(凌霄閣)

係我太累，要休息一下，我地去左阿甘蝦餐廳食下午茶，入左坐後，我就帶南瓜妹去換片，點知商場育嬰設備勁差，我要由三樓(L3)行落4層(P1)先有換片地方，但去到時先知係同傷殘洗手間一齊用，問題係我去到時係鎖左門，我係外面等左一陣，都無人出來，咁我咪叩門睇係有無人入面，又無人回應，最後我唯有上番餐廳！！(我起碼用左20分鐘時間，最後乜都無做過！)

係等食物時，南瓜妹表現出好想食野，職員好好人，請左個薯蓉俾南瓜妹食！！

↑ 開餐啦！！

臨走時，我去餐廳既洗手間，我見佢地既洗手間有地方可以俾南瓜妹企係度換片，所以我去完洗手間就帶南瓜妹企係度換片，換完之後 ..........

我發現男洗手間有換片板喎，點解女洗手間無？？？？男洗手間有！？？？

到南瓜仔去vee vee，南瓜仔係都要我帶佢去洗手間，無法，咁由我帶佢去，但我一個人就行左3轉洗手間 ><

臨走前，去左香港杜莎夫人蠟像館出面，與李小龍影番張相！！

之後就行去隔離既山頂廣場 ..........


目的地： 山頂(山頂廣場)


↑ 旅客諮詢中心 (舊式電車)，南瓜仔問：「點解無司機！？」

 
↑  去得山頂，當然要去埋獅子亭睇風景！！
 

↑ 最後上埋去 Green Terrace，睇多一次風景，咁就回家啦！！

地址：香港山頂山頂道118號

呢2隻豬仔上到車又左瞓過！！

同佢地出街，仲辛苦過返工好多 ~~~~~

南瓜仔@PN完結

13/07/2015 (33M24D)

話咁快就完結PN，咁就一年了！！

最後一日，係farewell party，因為返學時間提早左，而放學又提早埋，所以是日由hd接送返放學！！

Farewell party 由家長帶小食回校，再唱下歌、玩下咁！！(家長不能陪同)


↑ 送給老師既禮物，由我同南瓜仔一齊做架！


↑ 相簿冊，我地全班家長送俾老師既禮物，入面有整所有小朋友生活照、與老師合照同畢業相！

↑ 老師送給學生的禮物！



↑ 學校出了評估表 .....

第一學期：4個 Satisfactory，9個Still Developing，0個 Improving
第二學期：9個 Satisfactory，4個Still Developing，0個 Improving 
第三學期：11個 Satisfactory，1個Still Developing，0個 Improving

好好成績，不過hd話「幼稚園真識得比分」喎 .........

係日前，我打過電話俾班主任，因為hd好想南瓜仔做超大b，而我就不想，所以我就決定問下班主任既意見......

1) 好乖
2) 坐定定
3) 會睇清楚先會做，雖然係慢左少少，但全部都做到哂 (我估係指手工)
4) 主動同老師說話及表達意見
5) 可以自己一個人出來表演

咁我又問，南瓜仔同大b比較是否有明顯差別！？

班主任：「有些東西，XX (南瓜仔既名)比大b仲要做得更好。但用筆方便，可能就比大b有分別，但 XX 現在既能力，係達到佢呢個年齡既水平。」

班任任：「做超大b的確會有優勢，如果家長想佢無咁辛苦，做超大b的確有幫助！」

聽完班主任咁講，個心仲十五十六 .........

親子好去處@亞洲國際博覽館 + 香港國際機場

12/07/2015 (33M23D) + (15M21D)

目的地：亞洲國際博覽館 (探索大自然遊學園 x 動物農莊 2015)

因早上我要返工 (星期日仲要返工><)，所以我地兩點先出發去博覽館.....

入場費：3歲以下 $40，成人 $70，即係一家四口就 $220！

約埋表哥一齊去，但我地約係入面等，唔想浪費時間「等來等去」，我地去到時已經人山人海，部份遊戲仲話要等90分鐘 ><

我地行程好緊密 ........

1) 南瓜仔/南瓜妹：影馬仔，南瓜仔勁驚，唔敢行去


↑ 2) 南瓜仔/南瓜妹：餵羊仔，佢兩個唔多肯停定定影相，更唔想餵
3) 南瓜仔：吹氣滑梯  /  南瓜妹：排隊拎免費既kinder出奇蛋
4) 南瓜仔/南瓜妹：睇巧虎表演唱歌 + 影相，南瓜仔/妹睇得好投入


↑ 5) 南瓜仔：吹氣越野場，玩得勁開心

↑ 6) 南瓜仔：跳彈床，又係玩得好開心！
7) 南瓜仔/南瓜妹：細型波波池，南瓜妹玩到唔想走，一離開就喊！


↑ 8) 南瓜仔/南瓜妹：Playright - 氣球室，到南瓜仔玩到唔想走，一走就喊！
9) 南瓜仔/南瓜妹：Playright - 車軚+停車場，南瓜仔就走圍走，但走走下又會返去下南瓜妹！其中玩車軚度，佢地玩緊hide and seek！哈！哈！
10) 南瓜仔/南瓜妹：Playright - 騎馬仔 (排隊時就安排佢地換片同VEE VEE)，當玩完馬馬後南瓜仔唔小心整跌南瓜妹，南瓜妹就馬上喊！


↑ 11) 南瓜仔/南瓜妹：吹氣滑梯，條滑梯好短咋，所以南瓜妹都玩得！


↑ 12) 南瓜仔 + 表哥：大型波波池 (南瓜妹瞓左)
13) 南瓜仔 + 表哥：吹氣迷宮 (南瓜妹瞓左)

原本hd想南瓜仔玩下沙、砌磚，但南瓜仔唔肯玩喎！(我見個個bloggers都有無，得南瓜仔無玩！)

咁就玩左4小時，hd 仲安排入去機場睇飛機 ........


目的地：香港國際機場 (航空探知館 +機場展望台)

我地就搭機鐵去機場，呢2位小朋友不知幾高興，好似無搭過車咁！ (南瓜妹俾南瓜仔既笑聲嘈醒)！


↑ 去到就快快搵機場展望台睇飛機，上到去已有好多「機友」影相，我地睇左十多架飛機降落。


↑ 再落番去航空探知館影下相！

最後當然係食晚飯啦，南瓜仔一定好肚餓，因為佢成碟通粉食哂，相反南瓜妹就食得好少 (因為今日成日話要食餅，應該食到好飽)！！

返到屋企已經十點半，仲要幫佢地沖涼 + 食奶，攪到十一點半佢地先上床休息！！

親子好去處@日出公園 + 東港城 (龍珠Z - 《盛夏 - 最強對最強》)

11/07/2015 (33M22D) +(15M20D)

目的地：日出公園

是日我帶了南瓜妹去playgroup，而hd就帶了南瓜仔去日出公園......

南瓜仔只係拎住個波玩已經好滿足，可惜當天無乜小朋友，唯有自己同自己玩啦！！

↑ 環境優美，應該會再帶南瓜仔/妹再來！！

之後就接埋南瓜妹放學(最後一堂pg)，就回家休息了！


目的地：東港城(龍珠Z - 《盛夏 - 最強對最強》)

待南瓜仔/妹休息玩，我地就出發 .......

我兒時好鐘意睇「龍珠」(都有睇「美少女戰士)，到未生南瓜仔前仲追緊明珠台既「龍珠改」，是次既主題太啱我，所以我一定要去睇.......



↑ 我真係好鐘意架！！

今次約埋表妹一齊去，因為有佢幫手睇住小朋友，我可以叫hd幫我影相嘛！！哈！哈！

睇完就去母親大人屋企晚飯！！

計劃@2015 暑假

南瓜仔返埋今日 (13/7/2015 ) 就放暑假啦 ~~~~~~

南瓜仔會放34天(即五星期)假期，原本我唔想南瓜仔「無無聊聊」留係屋企，我就周圍去睇下畫畫班、英文班、數學班 .......

正當我搵緊時，睇了唔同報章 (一名k3家長報了11個興趣班><) / 文章 / 英華校長簡介會 (推介)，亦係fd 睇了幾個朋友既分享，令我有所反思，對於一個未足3歲既小朋友，暑假應該多去玩樂 .......

所以我只係幫南瓜仔報左游水班 (題外話，南瓜仔第二堂由hd帶，今次比上一次好！)

↑ 南瓜妹上埋最後一堂Playgroup，因南瓜妹8月會返全日，留返星期六做親子時間！！

南瓜妹8月頭開學，南瓜仔8月中開學，我應該要好好利用既暑假，同佢地親子樂！

所以我會同hd會輪住(亦會夾埋一齊)放假陪住南瓜仔/妹(我同hd既工作較適合7-8月放假)，若放唔到假先叫公公幫手睇住！

原本有諗過外遊，最後都決定放棄，希望明年既復活節或暑假帶佢地去啦 .......

雖然外遊唔到，但香港有好多地方都未帶過南瓜仔/妹去！！

1. 迪欣湖
2. 山頂
3. 馬灣 - 約表哥/表妹一齊去
4. 愉景灣
5. 石澳
6. 大嶼山 (昂坪360)
7  長洲
8. 迪士尼
9. 天際SKY 100 觀景台
10. 荔園 Super Summer (26/6 - 3/9/2015) - 約表哥/表妹一齊去
11. 九龍灣國際展貿中心 (Hello Kitty展覽 - 6/8 - 23/8/2015)

南瓜仔未到3歲(仲係免費)，我係唔係應該帶多d去要俾入場費既地方！？

你地仲有乜好建議！？

親子好去處@賈炳達道公園 + 九龍寨城公園

05/07/2015 (33M16D) + (15M14D)

目的地：賈炳達道公園 + 九龍寨城公園

是日行程好豐富，下午去完荃灣，黃昏就去約會blog友.....

由於表姐既生日會四點先完，我地去到又「謎路」(我拎住燒腩仔既blog 問保安員路！哈！哈！)，我地左去九龍寨城公園，但我地應該去賈炳達道公園既兒童遊樂場玩，所以去到時已差不多五點多 (我地約四點)！！><

↑  九龍寨城公園


↑ 賈炳達道公園

我地去到時，龍 BB、燒腩仔、肚B、一仔，已經玩左成個鐘了，幾個小朋友不停咁走、走、走，睇到我眼到花埋！！

由於南瓜妹太細，hd 怕佢有危險，所以抱埋佢一邊同佢玩 .........

玩完就去食晚餐，食到七七八八，幾個小朋友就坐埋一齊玩車車，呢班「車迷」不知幾開心，咁又放哂佢地既電！！

P.S：我地下次活動係8月2日，有興趣可以留言俾我地架！！^^

親子好去處@荃灣(如心化石公園 + Mcqueen 車 + 生日會)

05/07/2015 (33M16D) + (15M14D)

是日表姐生日，所以就去左荃灣！！

目的地：荃新天地

原本只係去愉景新城，但見到小豆子既 blog有 Mcqueen 車玩，既然去開荃灣，就不如去埋玩！！


↑ 原本仲要hd抱住，南瓜仔一見到Mcqueen 車，兩眼發光，立刻落地飛奔過去！！ 


目的地：如心化石公園 (如心廣場)

只係路過，無心去的！！


↑ 嘩！呢個公園無野睇 (對小朋友來說)，南瓜仔係零興趣，真係得幾舊“化石”，所以只係逗留左一陣就走人！！(佢地有導賞團，但係時間上夾唔到)

之後就出發表姐既生日會啦 ~~~~~


目的地：偷景新城 (麥當奴生日會)

去荃灣主要目的是去表姐既生日會！！

我對上一次去麥當奴生日會應該係20多年前了，哈！哈！


↑ 佢地有職員姐姐安排玩遊戲，但南瓜仔/妹都係無興趣，坐住個位唔肯郁！><

不過佢地好似好趕客咁，明明book到4點，但3點半左右就話 last order，之後仲講：「記得拎左自己個人物品」，駛唔駛咁早講定呢！？

南瓜仔@暑期游水班

04/07/2015 (33M15D)

南瓜仔一向都好細粒，所以我想佢學下游水，等佢可以高一點！！

由於南瓜仔未到3歲，樓下會所因保險問題，唔收佢學，咁啱龍 BB媽又想龍BB學，所以我地就都請左私人教練 (1對2) 係屋苑樓下學游水！！

龍BB 好叻仔，全程不知玩得幾開心，但南瓜仔就樹熊上身，全程不停咁喊要「媽媽」，又話唔鐘意哥哥 (即教練)，又話要即刻返屋企，仲話唔鐘意游水 ........

有一刻我想過放棄(做乜要迫佢學！？咁細個就迫佢)，不過我又諗就咁放棄，南瓜仔未「得逞」！？只係喊兩喊就唔駛去學！？

下次是否由hd帶呢！？我呢個媽咪太心軟，正所謂「慈母多敗兒」，呢句說話好啱我用！！><

希望佢游多幾堂會好鐘意啦！！

親子好去處@環保大道寵物公園

04/07/2015 (33M15D)

目的地：環保大道寵物公園

是日我同南瓜妹上PG，hd 就帶南瓜仔去環保大道寵物公園 ........

平時係屋苑見到狗仔，佢都會好開心，但只會遠觀而不敢近望！！

當hd接我同南瓜妹放學後，我問hd玩成點！？hd 話南瓜仔無論大狗定細狗都話驚，樹熊上身 .......

我問南瓜仔：「點解你驚！？」

南瓜仔：「D 狗會 "LUM" 我，我咪驚囉！」

我：「咁貓猫呢！？」(南瓜仔成日講好鐘意貓)

南瓜仔：「貓唔會 "LUM" 我，所以我唔驚！」

↑ 呢度環境都幾靚，若鐘意小動物，呢度真係不錯既地方！！

地址：將軍澳環保大道

南瓜仔@PN 畢業禮

03/07/2015 (33M14D)

眨下眼，南瓜仔PN 畢業了，可惜今次hd未能出席 ........

由於今次地點好遠又要好早到，所以約左 M 家長一齊打的去，我仲係前幾日同南瓜仔講定：「我地約埋M一齊搭的士去畢業禮！」

但南瓜仔日日同我講：「唔係約左 M 搭的士！？點解搭校巴架！？」

真係攪笑！！

講番正題先 ......

去到就入到大禮堂，職員就安排左畢業袍俾小朋友著，但南瓜仔勁抗拒，點到唔肯著，攪到我都唔知點算好，係呢個時候，NET 老師見到，就幫南瓜仔著，南瓜仔又肯乖乖咁著上身，呢隻仔明蝦媽咪 ><！

畢業禮開始，首先係授憑，一個個學生上台拎，南瓜仔好乖做足哂「程序」，雙手拎畢業證書，向校長鞠躬，最後企定定影相！

↑ 之後就安排表演，今次南瓜仔表演得好好，又係做足全程，可惜我離開台太遠，短片錄得好差，唯有等學校安排既大會錄影既碟啦......

表演完就有少許時間俾學生同家長私人合照，但對我來說時間太長，南瓜仔不停咁跑、跑、跑，佢完全無理過我添，好不容易先等到午膳，但食得一陣又同學仔再跑、跑、跑 ><！！

有樣野佢地學校安排得好好，就係我地食野時間，老師及職員都四周圍同家長傾計，又同小朋友玩 (小朋友一有得玩就唔食野)，待我地走左之後，佢地先午膳！！

班主任同我講，南瓜仔真係好乖，係學校坐定定，唔會周圍走，而且仲進步左好多，多左同老師傾計，而今日既表演，佢最初係無乜反應，但去到呢幾日，南瓜仔表現得好好，班主任仲叫佢一個人出黎表演俾同學仔睇添！ (真係估唔到！)