19/11/2014 (26M)
有天，同隔壁太太傾計 .....
她：「佢由K2開始唔俾佢抱，話太核突！」
我：「嘩！咁叻仔呀！唔駛媽媽抱！弟弟(南瓜仔)仲要我抱呀！」(對住小朋友講)
她：「但我有時想抱下佢，佢都唔俾呢 .......」
她繼續：「當佢3歲時真係抱到手到痛埋，仲想佢快快唔駛我抱添！」
聽完呢番說話，我就覺得可以抱住小朋友時間真的不多，可以的話，抱多一點，愛多一點！！(自我安慰中，因日日早上都要抱南瓜仔返學！><)
食
除左煩之外，我無野可以形容，真係唔想理佢！！
大/小便
戒片：
- 洗白白前會去 VEE VEE
- 臨瞓前會去VEE VEE
其餘時間就等佢自己講，佢講就會同佢去，亦會間唔中問佢去唔去VEE VEE。
成功2次出街去VEE VEE (我無諗過南瓜仔出街會講去VEE VEE)
冬天將來臨，明年4月才正式戒片啦！！
瞓
夜上就10點左右就會瞓著！
每晚臨瞓前，佢要自己熄燈，之後就上床，幫我除眼鏡，再放係枱上，佢先安心去瞓！
發展
1) 說話：
表達能力越來越好，但有時真的不明白，明明無教過佢，佢又會識講 ......
南瓜仔：「我要食乳酪餅！」
我：「你要幾多粒！？」
南瓜仔：「我要好多好多好多乳酪餅！」 (以前只會答「FOUR」，邊到學「好多好多好多」呢！？)
係屋企，無端端拎電話打 .....
南瓜仔：「我要打俾爸爸！」
按電話制 (當然打唔出啦)
南瓜仔：「爸爸，買蘋果汁俾我飲！」
之後就收線！
我：「爸爸係邊呀！？」
南瓜仔：「爸爸返工」
我：「點解爸爸要返工呀！？」
南瓜仔：「要買藍莓俾我食！」 (笑死了！)
工人姐姐叫南瓜仔午睡.....
南瓜仔：「姐姐，Don't worry, XX (his name) go to sleep！」(我都唔知佢係邊度學！？)
最攪笑係佢自己作歌，用 "the wheels on the bus" 既曲 ...... (笑死我！！)
最常講：「我唔識 XXX」，咩都話唔識，我就話：「你試下啦，你做到架！」
有時要我協助先做到，有時自己做到，係佢唔想去試囉！！
識得講英文完整句子，例如：「I want XXXXX」，「I don't want 」，「 Can you help me? 」
2) 識得漱口刷牙 (20多個月試過唔得，就一直無試過)，係有次南瓜仔係學校跌到，口唇流血，老師話幫佢用水洗傷口，再叫佢吐番d水出來，我先知道原來南瓜仔已識得吐番水出來，之前我仲日日俾佢連牙膏吞落肚添！><
3) 可自行除開胸褸 (我無諗過佢識除，係佢勁唔想著褸，自己除出來)
4) 咩都要話事，有要自己揀著乜衫、揀著乜鞋，出街我都會俾佢自己揀，其實係好事定壞事！？俾唔俾佢自己決定呢！？
5) 食藥勁抗拒，用手按住個口，仲不停講：「我唔要食藥、我唔要食藥！」，軟功都係唔成功，最後要強行餵佢，你地有無辦法！？
返學
老師評語：
- 有同老師講野
- 有同同學仔玩/傾計 (唔知佢地傾乜呢！？)，識得講10多個同學仔名！
- 早上回到校，會自動自覺放書包、拎水樽/食物盒/毛巾，然後坐定定等上堂
- 外藉老師話南瓜仔好可愛，隔離班既老師好想帶南瓜仔去佢地既課室 (是否誇張左d呢！？)
- 識得唱好多歌啦，係學校教佢，因為我地都無唱過俾佢聽！(成日要估歌仔)
其他：
- 加入左同班同學既whatapps群組，太好啦，可以知道學校近況 (因為我無學校接放學，好多小道消息都唔知！)
- 返學校巴姨姨講，南瓜仔係校巴唱歌
- 放學校巴姨姨講，南瓜仔已知邊個坐位係佢，佢會講：「我要坐呢度！」
- 日日都係要抱佢返學，因為日日時間太趕，等佢行得黎校巴可能走左，再凍D都唔會點算。 而放學，我就要送完佢返屋企再返工，又係好趕，又會抱住佢囉....... (所以攪到佢越來越懶，唔肯行 >< )
其他
- 24磅
- 16隻牙(其實無睇有無生最後4隻牙！)
