親子好去處@【2016 聖誕】中環+金鐘+香港公園

【2016 聖誕】爸爸單拖系列：六

23/12/2016 (33M2D)

目的地：中環+金鐘+香港公園

是日，南瓜仔仲要返學，所以 hd 只係單拖帶妹妹去街 .......

其實 hd 單拖帶南瓜妹並不是什麼大事，只係 hd 要帶妹妹去洗手間 (上次7月，當然南瓜妹仲著緊尿片出街)

成日聽 hd 講男洗手間好 dirty，我想知hd 點同妹妹去 wee wee，平時我同妹妹出街去wee wee 就會變左 "清潔工人"，咁 hd 會點呢！？？

我問 hd 點同南瓜妹去wee wee：「咪帶佢去殘廁囉！」(點解唔帶男廁呢！？)

我：「咁你有無抹廁所！？」

hd(語帶不滿)：「緊係有啦，你都傻架！」

可能我太過多事！哈！哈！


首先去左中環同金鐘影下相，之後就去左香港公園，去得香港公園，當然要玩滑梯啦 ..........

↑ 好刺激喎！！！

不過南瓜妹沒有滑落黎 (預計之內 )


↑ 再去睇下鳥 .....

玩完，hd 就帶南瓜妹回家，再去接南瓜仔放學 (聖誕聯歡會，返半天)，之後 hd 帶左南瓜兄妹去食乳鴿！！

回家休息後，就黎我公司接我放工啦 ~~~~~~

南瓜兄妹@2016 聖誕聯歡會

又黎聖誕聯歡會啦 ......

南瓜妹

20/12/2016 (32M29D)

學校已安排左家長帶乜返學校，就係帶士多啤梨！可能老師知我唔識整食物！哈！哈！

南瓜妹見到哥哥寫聖誕咭，又話要送俾同學 ........

見佢咁想送，咪諗住送俾幾個熟既同學，點知佢越講越多，最後......決定全部送哂，唔駛煩！

南瓜妹當然唔識寫字啦，所以就同 hd 捉住佢手寫，自己蓋上自己既名，貼貼紙。

最難係點教南瓜妹俾同學！？所以我就print左佢同學仔既樣，貼上信封面.......

我回家後，問南瓜妹有無送！？南瓜妹答：「無！」

但d同學收到，應該係老師幫南瓜妹送俾同學 ><

收到學校既相，相中見到南瓜妹喊哂 ........ 再望清楚，我見到相中有聖誕老人，我就知道南瓜妹係怕左聖誕老人， 點解妹妹咁怕呢！？

南瓜妹：「媽咪，我以後唔返學，我驚見到聖誕老人！」


南瓜仔

PN：無送聖誕咭
K1：hd 半捉住佢手寫名，自己蓋上自己名印，教佢認同學名，最後應該送哂掛！？(最後無咭係書包囉！)

K2： 南瓜仔已經可以自己寫同學名(hd 係隔離串俾佢聽，怕佢寫錯人地名，宜家d小朋友既英文名.........真係好深！)同寫自己名(寫英文)，而佢送既同學越來越多，除左自己班外，仲話要送俾校巴上既同學、老師、校工、校車叔叔、校車ee ........仲有屋企人，咁就40多張！(我唔係俾跨班送，無理由自己過去隔班架，如果送埋起碼有50張 ><)

要寫信封面、咭內寫枱頭/自己名，一張咭3個名，40張就120個字，少d耐性都寫唔到！！

南瓜仔寫寫下：「乜咁多張架！？」

係你自己話要送，唔關我事喎 ~~~~~~不過南瓜仔最後都順利寫哂！！(唔記得影相添 ><)

已經唔駛再教佢認同學仔名，佢自己睇到個英文名就識讀出來，所以應該送得成。

回家後，都問南瓜仔有無送聖誕咭，南瓜仔：「D 話唔要！」

我：「咁張聖誕咭呢！？」
南瓜仔：「我俾左 B 同學！」
咁都得！？？

又有同學請左假，我問：「咁張咭呢！？」
南瓜仔：「我俾左 Mr benson (班主任)」
咁又啱喎.......

(P.S：南瓜仔唔係聖誕聯歡會果日送，係前幾日已送定 ......... 因為d 同學仔都陸續請假去旅去！)

23/12/2016 (51M4D)

由家長決定帶乜食物回校，我地就帶南瓜仔去超巿買，最後佢揀左樂天熊仔餅！(我主張獨立包裝，食唔哂可以帶番屋企，唔好浪費 ........ 雖然回到家，都應該被家長「收埋」)

南瓜仔返到屋企，當然有好多零食 / 禮物！！

現在既小朋友真幸福！！

南瓜妹@33個月

21/12/2016 (33M)

食
都係咁上下！！

呢d真係天生，點迫、點氹都無用 ><

瞓
午睡：13:30 - 15:00
晚上： 21:00 - 07:15
 
發展 
南瓜好既中文認字真係幾高 (容許我讚下南瓜妹！)

早前，學校已派發上學期既字咭，用人、口、門、手、樹、冬天 ........手套等字，第一次同南瓜妹玩，除左手套外，其他既字都認得哂，當時我覺得都唔奇，因為係可能係歲半班已經教左。

最近，我學校又派發另一些字咭，有警察、老師、醫生、輪船、汽車、飛機.........

我心諗，咁深既字點會識！？不過我都同南瓜妹玩下，第一次玩就教下佢，點知 ...... 南瓜妹又記得喎！？

都第二次玩(隔左幾個星期)，南瓜仔係隔離講，南瓜妹就拎d字咭，奇蹟又發生！！！！南瓜妹竟然識得哂，點解會識架！？？？？

我都不能解釋點解南瓜妹識，唔通係歲半班時教！？？但歲半班會教咁深既字！？？


返學
學校每星期都會係手冊評分，而南瓜妹一向都係4分(滿分)為主。

但某星期見到有3個3分(心都沉一沉，因為南瓜妹開學至今，都係未試過)，再下一個星期都係有3個3分......... 好明顯，南瓜妹係有野發生左！！

我就主動打俾老師問 .......

老師先同我講南瓜妹最近坐得唔定 (點解發生左兩個星期都唔同我講！？><)

另外，就係話南瓜妹太主動幫人，佢竟然幫同學仔去抺pat pat (完 wee wee 後)天呀！點解會咁架！？><

聽到老師咁講，唯有再叮嚀南瓜妹學校要坐定定，同埋 ....... 唔駛幫同學，同學識得自己做，若同學做唔到，老師會幫手！

好彩過多兩個星期後，南瓜妹變番正常，南瓜妹.......你要好好keep 住呀！

其他

-  17隻牙
-  24.2磅(11kg)

1220 結婚7周年

不經不覺咁就七年了 .........特別有了小朋友，時間過得仲快！！

都係提早慶祝！！

18/12/2016 (50M29D) + (32M27D)

早上，我就帶左南瓜仔去太古表演話劇，而 hd 就帶左南瓜妹學跳舞！！

南瓜妹完左後，hd 就帶左南瓜妹去左銅鑼灣，而我就等南瓜仔表演完就同佢會合 ........

呢班表演話劇既小朋友，已經一齊練習左十多堂，前一天我仲睇佢地彩排，南瓜仔又大個左，有哂動作、有哂對白、無怯場，只係細聲左少少 .......

表演完，南瓜仔笑住出黎講：「媽咪，我好大聲講呀！」

老師亦說：「well done！」

其實我俾南瓜仔學話劇，主要係希望佢大膽d！！

完左之後，本來應該搭地鐵，但我見到電車 .......突然問南瓜仔：「你想搭電車定地鐵！？」

南瓜仔：「電車！」

南瓜仔：「我未搭過電車嘛！」(其實佢好細個時搭過，只係佢唔記得)

其實搭搭下我有後悔，因為車程好左好多 ><

hd 揀左 Agnes B Le Pain Grille，但佢地既食物質素麻麻，而且又唔係太啱小朋友食，應該無下次 ><


↑ 小朋友只愛薯條！！

hd 原本話係銅纙灣行街，我就話回家休息吧，因為我都好累 ..........

而且晚上又要去表妹(姐)生日會，我都唔想小朋友玩得咁累！！


20/12/2016 (51M1D) + (32M29D)

 
↑ 今年，有花收啦！！(P.S：老公話過，只會係返工日子先會送花，佢話咁先有人知喎 =.=，所以上兩年都無得收花！)

原本 hd 話出街食飯，都係俾我拒絕左 (其實佢明知我會拒絕，點解又要問呢！？)，雖然南瓜妹已經放假，但南瓜仔繼續要返學 .....

都係留在家中打邊爐！！哈！哈！
 
對我來說，簡簡單單是最幸福 ~~~~~~

南瓜兄妹@聖誕表演

南瓜妹@聖誕表演

14/12/2016 (32M23D)

早前，老師話南瓜妹係學校跳舞跳得好好(仲要講到全班最好咁) ......

係屋企，又見南瓜妹無端端「表演」(仲要次次唱唔同歌，我都唔知邊首歌先係表演歌！？)

所以，我係有期望 .......

結果，南瓜妹當天係完全無郁過，仲要全班同學只有佢一個坐係地下 ><

老師有示意叫佢起身，南瓜妹完全無理老師 ><

我亦係外邊叫佢起身，佢都係無埋我 ><

差不多去到一半，老師用左1秒時間就抱左佢起身 ........ 雖然起完身後都係無郁過，但總好過自己一個坐係地下 ><

跳完之後，我地就去接南瓜妹，諗住同佢影下相，點知南瓜妹個樣好唔開心，仲突然彈左一句：「媽咪，我想返屋企！」

見佢個樣咁唔開心，仲好似想喊咁，我就帶佢走 (其實我想同 d 同學仔/老師影相，但南瓜妹都無心情，我都無為迫佢，仲有機會影相既)

係車上，hd 問南瓜妹點解唔跳舞！？南瓜妹：「我唔想表演，我想返屋企！」

我見佢好似唔開心(其實我都有點唔開心)，就話同佢影 hello kitty，又立刻開心番哂，呢個小妹妹又幾容易氹喎！哈！

我送完南瓜妹回家，食埋飯，我就返工 (我只請了2小時假)........

返完工，返到屋企，我就同南瓜仔講：「今日妹妹無跳舞呀！」

南瓜仔：「吓！無跳！？」

我：「咁你記得星期六表演果日要跳喎！」

南瓜仔：「我緊係會跳啦！」

我再問南瓜妹點解唔跳，南瓜妹：「哥哥唔黎睇我表演，我咪唔跳囉！」(呢句九成九係講大話 =.=)

唉，真心有失望，有點唔開心 ........唯一安慰係原來南瓜妹真係表演幾首歌(因為係屋企都係「表演」幾首歌)，而我一心諗住只會表演一首歌，所以一直都覺得佢亂講，再一次證明我唔相信自己既女！哈！哈！

最攪笑係 .........完左表演後，南瓜妹都不斷係屋企「表演」(由於我睇過學校真實表演，所以我知道佢表演d乜)，都好既 ......起碼我知道南瓜妹不是「不能」，只係「不為」！期待 k1既表演啦！！

NET 係手冊寫：「XX really enjoyed singing during music time this week and participating during lessons! Keep it up 」

唔知老師係唔係怕我失望呢！？？所以咁寫俾我睇！？


南瓜仔@聖誕表演

16/12/2016 (50M27D)

今次已經係第5次表演 .......

南瓜仔：「我唔俾妹妹睇！」(南瓜仔仲嬲緊無得去睇妹妹表演，無法啦 ..... 你要返學嘛)

不過，我地當然帶埋妹妹去啦！！

呢個妹妹，明明學校表演郁都唔郁，咁啱其中一班既表演歌同佢一樣，係我大脾度跳舞喎 ><

輪到哥哥表演啦，學校安排左前坐俾家長攝錄，我己問定南瓜仔企係邊，所以我地可以對正佢！哈！哈！

好明顯，南瓜仔無跳舞天份，而且仲有點hea跳 feel =.="

不過都無所謂，見佢全程都係笑住咁跳，佢 enjoy 就得啦！！


跳完之後就到 K2大合演，仲拎住早前做俾佢既 shaker，但南瓜仔大部份時間望住個聖誕老人(由家長扮)

南瓜仔同南瓜妹一樣，之後都係屋企「表演」，最奇怪係南瓜仔係屋企跳就無 hea ......

點解我兩個小朋友都咁奇怪呢！？？

南瓜仔@試食CATALO

之前見到其他bloggers收到 CATALO 既試用產品 ......

今次竟然搵左南瓜仔試食喎，仲送左係餐具係佢地添！！

1) 兒童益鈣C®全效強健配方50粒

美國家得路兒童益鈣C®全效強健配方選用TruCal®純天然牛奶鈣，特別配合活性益生菌和天然針葉櫻桃果實精華，全面促進兒童健康成長。鈣對兒童由幼年到青年時期快速成長期間的骨骼發展非常重要，TruCal®純天然牛奶鈣含有天然礦物質，與人體骨骼及牙齒組織結構相近，極易於吸收，有助強化發育期兒童的骨骼和促進牙齒發育。結合2種兒童所需活性益生菌和天然纖維果寡醣(FOS)，可促進消化及免疫系統健康。針葉櫻桃以其豐富的天然維他命C見稱。與一般合成維他命C比較，針葉櫻桃更蘊含生物類黃酮和其他營養，易於被人體吸收，有助促進兒童免疫力，以及人體細胞、牙齦和肌肉健康，亦有助兒童吸收成長必需的鐵質和鈣質。兒童益鈣C®可直接咀嚼食用，特別加入天然藍莓味，美味又有益，無添加蔗糖，家長放心之選，小朋友必定喜愛。

http://www.catalo.com.hk/product-detail.php?id=148

睇番盒上寫：3-8歲，每天1粒；9歲或以上，每天1-3粒，餐後服用。

咁即係南瓜妹未食得！！

拎出黎俾南瓜仔試食，南瓜仔竟然話唔食喎！？？？而旁邊既南瓜妹就不斷話要食！！

見南瓜仔唔肯食，咁我自己食啦......

我：「r嘩！好好味喎！藍莓味喎~~~~」

南瓜仔一聽到，就變左樣，又話要食！！(呢個小朋友真麻煩！)


↑ 南瓜仔一食：「好味喎！」

南瓜妹仲係隔離不斷話要食，我話：「你3歲先食得，你等多3個月啦！」


↑ 第二天，南瓜仔主動話要食「藍莓糖」，我諗南瓜仔已愛上了！哈！哈！

話時話，有助強化發育期兒童的骨骼發育，會否有助增高呢！？？


2) 純天然鈣精華60粒

揉合海藻鈣及採自無污染海底的天然珊瑚鈣，天然微細份子結構，具活性及易被人體吸收，對身體亦不會造成負擔，全面補充身體所需，鞏固骨骼健康。純天然鈣精華能改善骨質密度，防止骨質流失，讓您全方位強化骨骼，安全質優。

http://www.catalo.com.hk/product-detail.php?id=130

呢個由我試食！

都幾啱我用，曾經聽人講過.......生完bb後，鈣質會大量流失，所以生完bb後，我都有keep住飲奶，但日日飲奶都幾悶，現在有呢個補充鈣既粉，咁我就可以飲下其他野啦！！

6-11 歲，每天1粒；12歲或以上，每天2粒，餐後服用。

建議食法：打開膠囊將粉加入各類食物中，如湯、奶、粥等。


 ↑ 我就試加入朱古力奶 ......基本上呢d粉無味，所以加入左去d朱古力奶味都無變！

2016 My Birthday

都係提早慶祝 ....... 小朋友要返學嘛！！

04/12/2016 (50M15D + 32M13D)

hd 揀左 Main St.Deli (朗廷酒店)食午餐，呢間出名食漢堡包 (佢話南瓜兄妹鐘意食喎 =.=，乜唔係我生日咩！？)

我就唔多鐘意呢度既環境，好似茶餐廳咁 ........

食物質素又麻麻，應該無下次！！

南瓜妹中左學校毒，去洗手間洗完手後，就同外國人講：「I wash my hands before I eat！」

攪到個外國人勁笑 .........

晚上，就去左母親大人屋企打邊爐 (兼同我慶祝埋生日！)


07/12/2016 (50M18D + 32M16D)

正日啦！！

hd 見我唔多 like 上次間餐廳 ，就話不如出街食多一次飯 ........

但我拒絕左，都係覺得留在家最中 (都一把年紀，對生日真係無乜特別感覺，只要一家人齊齊整整就得！)

hd 就安排左我最鐘意既打邊爐 ........最攪笑係 hd 封左封利是俾我呀，話無得出街食補償俾我喎，佢都傻傻地！！哈！哈！



↑ 當然唔少得既生日蛋糕啦！！

南瓜妹@K1大作戰(5) - 德望小學暨幼稚園

27/11/2016 (32M6D)

帶埋南瓜仔一齊去，南瓜仔就同hd 係學校門口等我！最估唔到南瓜妹無喊，係南瓜仔喊 ....... 話要一齊去面試 =_=

入到去，等叫編號，然後入等候室 ......

group in，六個小朋友坐前面，家長就後面填問卷！

雖然我填緊問卷，但都有偷望南瓜妹！

老師叫同學起身跳舞，但無小朋友起身，有小朋友有做動作，南瓜妹零反應！

由中文老師問三個小朋友問題 (另一邊就由英文老師問問題)，之後就調轉！

英文老師問乜就唔太清楚 (填問卷中)

中文老師叫南瓜妹係個袋抽野，南瓜妹抽中左本書，問：「乜黎！」
南瓜妹：「書！」
老師：「鐘唔鐘意睇書！？」
南瓜妹擰頭！
老師打開本書指住耳仔，問：「呢個係乜！」
南瓜妹再次擰頭！
老師：「咁你有無！？」
南瓜妹擰頭！
老師：「呢個係耳仔！」(死得！乜都唔識！哈！哈！)

之後老師問邊個要玩具！？

有4個小朋友舉手，南瓜妹無 ......

老師最後叫南瓜妹出來拎禮物，南瓜妹有拎，有講「謝謝﹗」


只能講同呢間學校無緣，都係呢一句：「可能南瓜妹鐘意原校！」(自我安慰中！哈！哈！)

親子好去處@慈善行

27/11/2016 (50M4D) + (32M6D)

每年，我同 hd 都會行慈善行 .........

但由南瓜仔出世後，就只係行開步，無行上山 (其實，年年我地都想行上去)

2012：南瓜仔啱啱出世(坐月中)
2013：有左南瓜妹，唔方便行
2014：南瓜妹出世8個月，唔會推架bb車上山囉
2015：南瓜仔話戲表演
2016：南瓜妹 in 學校

希望2017年可以行上山啦！！！

雖然只係行開步禮，但都可以俾佢知道係乜東東 ......

去到會場，原本南瓜仔坐係椅上，突然去左圍欄邊，我見到佢望住樓下有個哥哥踢波，我就問：「你想去踢波！？」南瓜仔：「係呀！」咁我就帶佢落去啦！！

我就叫南瓜仔問哥哥可否一齊玩，南瓜仔又肯住動問哥哥！

最後當然一齊玩啦！！！


南瓜仔係場地跑來跑去(未出發就出哂汗)、又去睇醒獅、又去睇樂團表演！

而南瓜妹就係場地扮跑，南瓜妹，你幾時先正式跑呀！？？？

之後就開左一陣開步禮就去食早餐，再去學校面試啦

南瓜妹@K1大作戰(4) - 香港培正小學幼稚園

26/11/2016 (32M5D)

由於仲有好多時間，就去食早餐先 (hd 仲搵緊車位，無得食！)

食食下，南瓜妹不斷提住佢既同學(之前係無提過，係前兩日先開始提)，話要同佢一齊去玩波波池，仲話要現在就要去 ........

我諗住分散佢注意，所以就去買朱古力奶、糖、餅乾，但南瓜妹全部都話唔要 ><

因為時間就到，我就帶南瓜妹去學校.......

點知，仲大鑊 ...... 南瓜妹係學校門口，流哂眼淚話要搵佢同學！(點解可以咁誇張架！？？？真係一滴滴咁流出黎><)

我講乜都入唔到耳，最後我搵左一張呢個同學戴口罩既相，我：「佢病左呀！等佢好番先去得波波池！」
南瓜妹 ：「佢病左呀！？」
我：「係呀！佢要留係屋企休息！」
南瓜妹先正常番......
(不得不讚自己醒目！哈！哈！)

入到去，就等左一陣就同男童軍上等候室！

係等候室玩下玩具，再等老師叫名！

終於叫南瓜妹既名，而另一位老師好快咁就帶左南瓜妹走 ........ 我就係另一邊等！

等左唔夠5分鐘意就出來，無喊！

出到黎，好自然問南瓜妹做過乜(其實忍住話唔問，但最後都忍唔住問)，南瓜妹：「無呀！乜都無做過！」

哈！哈！哈！哈！哈！都係無機會，算了吧！

平常心！平常心！平常心！

南瓜妹@K1大作戰(3) - 香港真光中學(幼稚園)

26/11/2016 (32M5D)

都係由我「出戰」.......

這天下著微雨，好彩入去到學校後先落大雨，起碼唔駛咁狼狽！！

等了一陣就入了等候室，之後就面試 .......

老師：「你叫咩名！？」
南瓜妹細聲回答。

老師：「你今朝食乜早餐！？」
南瓜妹擰頭.....
老師：「你有無食奶！？」
南瓜妹再次擰頭.....
老師就問我，我就同南瓜妹講：「你今朝有無飲elsa 奶！？」
南瓜妹：「有！」

之後就俾左2隻碗、碟、杯、刀、匙
老師：「邊樣係有兩樣！？」
南瓜妹拎左1隻碟。
老師引導南瓜妹係2隻碗先啱......
老師：「邊個係拎黎食飯！？」
南瓜妹拎左杯 (死得！全部都錯....哈！哈！)

老師再將d碗、碟、杯，排次序。
南瓜妹終於做到！

最後送禮物，老師問：「你要乜顏色！？粉色！？黃色！？藍色！？綠色！？」
南瓜妹：「綠色！」

咁就完左啦！！

南瓜妹有自己泊椅 (又估唔到佢喎！)


雖然 in 得唔好，但我都有出黎「獎」佢食餅 ！

隨著自己既心情放鬆，亦可能南瓜妹鐘意原校，所以 in 得咁有「性格」！哈！哈！

都係平常心吧！！(雖然骨子裡都係想佢入龍校！><)

親子好去處@親子旅行(天水圍綠田園)

呢個「任務」都係由我去，hd 都請唔到假 .......

不過前幾日天氣轉冷，仲有雨添 ><

好彩，天功造美，天氣好都不得了....... 不過呢個媽媽就要拎住件校褸 + 外套(怕凍，帶左多無所謂，不過都係安全之上)

幾天前，就俾南瓜仔睇有乜玩，南瓜仔：「我要全部玩哂！」
我：「我無錢喎！」
南瓜仔：「你返工啦，返工就有錢......」
停左幾秒，南瓜仔走去搵hd：「爸爸，你要返工，咁你咪有錢，我咪可以玩2次！」
真係俾佢笑死！！哈！哈！

前一日，我俾個袋仔俾南瓜仔放錢，叫佢問爸爸拎錢，但hd講：「我已經俾左媽媽，你問媽媽拎！」=_=

是次旅行學校無包午餐！正！(上年南瓜仔只係食左兩啖就無食，掛住玩 ><)

雖然學校叫我地自行安排午餐盒，但我就無準備，因為上年既經驗話我知 ........ 小朋友有得玩就唔會餓，而且場地有魚蛋、燒賣、三文治、麵等熱食賣，所以只係帶左少量乾糧去就算！(前一天同南瓜仔去超巿買，仲俾佢任揀3款零食，南瓜仔又真係好認真咁揀 ........)
 

25/11/2016 (50M6D)

約左南瓜仔同學仔 M 媽咪一齊去學校集合，之後就出發去天水圍啦！！

係車上，老師有安排估謎語 (定係考家長！？)，上當年(K1)南瓜仔有舉手，但舉完無答。今年，大個仔了，除了舉手外(一路問我答案)，當老師叫佢回答時，仲大大聲回答問題！(好彩老師叫中佢，又好彩我識得答！)

去到綠田園，就開始玩，不是，不是，係燒錢！哈！哈！

約理同學仔M一齊去玩！！

- 兒童車 ($30/10分鐘)
- 水上單車 ($80/20分鐘) + 魚糧 $10
- 碰碰車 ($40/10分鐘)
- 卡通車 ($40/一個圈)

玩到呢度時，突然南瓜仔話要搵同學仔 L，乜都話唔玩，連雪糕都話唔食！(慳番！哈！)

咁走去搵下佢 .......

行過攤位遊戲，睇中左架車，話要去拋波 ($20/4個波)......

我：「你未必拋得中，拋唔中就無車！」
職員聽到我對話，就講：「拋唔中都有車！」
南瓜仔：「拋唔中，都有車！？」
職員：「係呀！」
南瓜仔再問：「拋唔中，都有車！？」
職員：「係呀！」
可能南瓜仔怕無車！哈！哈！
最後，南瓜仔都中左一個喎 ~~~~

玩完，仲係記住同學仔 L，又要去搵佢，好彩最後都搵到 (因為就走，大家都係門口集合！)

同 L 一齊上車，一齊坐 (去程時已經一齊坐)，但我深明佢地要午睡，南瓜仔：「我唔瞓！」，我當然唔俾啦，好不容易先放開佢兩個 .......

分開完後，南瓜仔就好自然咁瞓左啦！！YEAH ~~~~~~~

由於南瓜仔仲未食午餐(不過食零食都夠飽)，所以就約埋M一齊去食下午茶，之後就回家啦！！

「子母奶」的故事

一天，南瓜仔係商場見到子母奶廣告 (我屋企唔開電視)......

南瓜仔見到 Iron man、Spider-man、Captain America 就雙眼發光，我見佢咁想要，咁就買俾佢啦！！(慈母多敗兒........)

第一日 (19/11/2016)

1) 樓下百佳，無得買 Captain America (朱古力味)，南瓜仔好失望，仲喊埋出來，我就叫佢諗辦法解決 .......南瓜仔：「去第二間睇下有無！？」，見佢都識解決問題，就帶南瓜仔去第二間超巿。

2) 樓下惠康， 都係無得買 Captain America (朱古力味)，好彩有 Mickey mouse(朱古力味)，咁南瓜仔就揀左Mickey mouse。


第二次  (20/11/2016)

3) 樓下百佳，南瓜仔話想買 Spider-man (原味)，我：「唔係朱古力味！？你都要！？」南瓜仔堅定話要，咁都買左俾佢。(唔知點解，我覺得佢地唔會鐘意原味，又覺得原味健康d！)


第三次 (22/11/2016)

早上，妹妹有d痰，唔想俾奶粉佢飲，但佢又喊住要飲奶喎......咁咪拎左南瓜仔盒 Spider-man 俾妹妹飲 ......

呢個哥哥當然唔俾啦，我就話：「媽咪，一陣買番俾你啦！」

南瓜仔：「我想要 Iron man！」

咁我就送完南瓜仔上校巴，就去搵 ......

4) 樓下百佳，搵唔到 Iron man(原味)。

因為無得買，就返公司附近買 .....

5) 公司附近 Market place，有 Iron man (原味) 同 anna (朱古力味)，咁就哂兩款啦！(慈母上身，覺得妹妹一定見到 anna 奶會好開心)

接妹妹放學，帶埋 anna 奶俾妺妹，妹妹見到就雙眼發光，但佢有少許痰，我就話要好番先飲得 ....... 我又口多多講只可飲 elsa 奶。

點知 .....

妹妹：「我想要 Elsa 奶」
我：「咁你乖乖自己食飯，我就買俾你啦！」
妹妹：「好！」

咁我就去搵，點知樓下惠康都無得買，我再走去公司附近 Aeon， 都係無得喎！！(因早上已去左樓下百佳同公司附近既 Market place，都係無 elsa 奶，所以無再去)

我仲收到工人姐姐既whatsapp，話妹妹自己乖乖食飯哂飯！

我就搵左同事幫手搵下 (啱啱係佢 lunch time)，點知我同事搵左2間都搵唔到 ><

大約四點，南瓜仔打電話俾我：「媽咪，我想飲 mickey mouse 朱古力奶！」又唔知點解個電話俾左妹妹，妹妹：「媽咪，我自己食哂飯，你記得買 elsa 奶俾我！」

大鑊，都唔知可以去邊度搵！？？？(妹妹守承諾，我都要守承諾)

放工，就帶南瓜仔去左興趣班先，我再四圍再搵下 ......

6) A屋苑百佳，無得買，我去問下職員，職員：「佢地(子母奶)一箱箱俾，每箱都同一款！」，唔怪得唔係間間有，要睇彩數！

7) 樓下惠康/百佳，我"幻想"可能會添貨，最後當然無添啦 ......

8) B屋苑佳寶，都係無得買。

9) B屋苑百佳，搵到啦！搵到啦！到仲有好多排 elsa (原味)........ C9心態，咁難先搵到，當然要買2排啦！！

之後就接埋南瓜仔放學，就回家！！

呢個南瓜仔拎住排奶，不斷講：「我要俾妹妹！」

工人姐姐一開門：「妹妹、妹妹，你快d黎睇下啦！」

妹妹又跑出黎 ........

一見到哥哥手中既 elsa 奶，開心到呢 (非筆墨可以形容)


總結：就係咁，我係呢一星期買左六排子母奶，行左9次超巿！！

南瓜妹@K1大作戰(2) - 九龍真光中學(幼稚園部)

九龍真光中學(幼稚園部)係2017年先開始復辦，有40%可直升小學部。

19/11/2016 (31M29D)

臨出門口，已同南瓜妹講記得大聲d答老師問題，南瓜妹仲答：「得！」

入到面試室.....

1) 有一張高枱、 幾張矮椅子俾小朋玩玩具，家長坐另一邊。

唔...... 南瓜妹完全唔夠高，所以企係身玩，但老師叫佢地坐低玩！？點玩呢？

2) 見老師

- 老師問：你叫咩名
南瓜妹：XXX (輕聲)
老師再問： 你叫咩名
南瓜妹：XXX(輕聲)
老師聽到。

- 老師問：你仲係邊！？
南瓜妹無答
我就係隔離問南瓜妹一次
南瓜妹：XXX(輕聲)
老師聽唔到，再問：你仲係邊！？
南瓜妹：XXX(輕聲)
老師又係聽唔到 ><

 - 老師問：你搭咩車黎！？
南瓜妹：搭爸爸車(輕聲)
老師再問：你搭咩車黎！？你唔識答呀？？
南瓜妹： 搭爸爸車(輕聲)
老師： 你搭咩車黎！？
我真係忍唔住...... ：「佢答左你，佢答爸爸車車」

之後放了支鉛筆、橙、蘋果係枱面，問南瓜妹返學用乜！？
(其實老師有無諗過，PN 係唔會用鉛筆，係用臘筆呢！？呢條問題怪怪地)
南瓜妹拎左橙。

老師：之後用英文答好唔好
南瓜妹：唔好 (大聲)
老師：用英文啦
南瓜妹：唔好 (仲語帶不滿)
最後老師都係用英文發問 ........
(咁你就唔好問小朋友「好唔好啦！？」，講左唔好 ，仲要問.......不過直接講「我將會用英文問」 ><)

以下是用英文發問：
老師拎左個 bear 公仔：What is it！？
南瓜妹：Bear (細細聲)
老師：Fish or Bear！？
南瓜妹： Bear (細細聲)
老師：Fish or Bear！？
南瓜妹再無答佢 .......
我就同老師講，佢答左 bear 啦！

最後送貼紙。
南瓜妹講：「唔該！」(應該係講謝謝)

出到黎，我就同南瓜妹講：「點解你咁細聲！？」
南瓜妹無理我。
我就講：「今次表現都不錯，不過下次再大聲d仲好喎！」
南瓜妹：「咁我下次大聲d」

雖然 in 得不太好，不過都係隨緣啦！！

南瓜妹@K1大作戰(1) - 民生書院幼稚園

12/11/2016 (31M22D)

學校一早有份問卷填，呢個工作就交左俾 hd 做 ~~~~~ 

因為 hd 要去另一間學校聽簡介會，所以就由我陪南瓜妹去 .......

早左30分鐘到，所以無得入門口，同南瓜妹外面等 (好彩唔凍咋)！

入到去都好順利，南瓜妹都乖乖玩玩具，但唔夠1分鐘就叫左南瓜妹去排隊！！(好彩，上當年玩到南瓜仔無哂心機)

今次係 NET in，當我見到時真係有點「怕」，我怕南瓜妹唔鐘意 NET >< .......

1) NET 就拎左一舊積本問乜色，南瓜妹無反應 ....... NET 就教 red，之後南瓜妹竟然係講出其他顏色 (黃、綠、橙、粉紅.....雖然講得好細聲，但 NET 都聽到，仲讚南瓜妹添)，但去到黑同白就講唔到 (明明南瓜妹係識！？)，NET又教南瓜妹點講喎，而南瓜妹又肯跟住讀！

2) 問英文字母，第一個係A字，南瓜妹無答，NET 就教 A，南瓜妹又肯住讀 ........之後 NET 指B 字，南瓜妹讀到，指 E字，南瓜妹讀左 C (好明顯係未認到英文字母！哈！哈！)

3) 問數字，南瓜妹都係無出聲，但 NET 同南瓜妹一齊數 one, two .......，南瓜妹又跟住一齊數！

 4) 問圖畫，有隻熊貓，南瓜妹答熊貓(滴汗)，NET 叫佢答英文，南瓜妹無反應，NET 就教佢 panda，南瓜妹又照讀，再問南瓜妹熊貓做緊乜，南瓜妹都係啞左，NET 又教佢 eating........ 之後NET指圖中既女仔同爸爸，南瓜妹都答到 girl 同 daddy！

問完就送禮物俾南瓜妹，南瓜妹有講 thank you 同自己泊椅子！

出到黎，我問南瓜妹：「點解你咁細聲！？不過你都好叻叻，答到老師問題 .......」
南瓜妹無理我！
行行下，南瓜妹同我講：「媽咪，我下次會大聲d」

呢個妹妹，又真係幾可愛！！


雖然 in 得一般，全程都係好細聲(好彩個 NET 有心機，都聽到南瓜妹回答問題)，加上南瓜妹真係未認到英文字母同數字，其實都叫做得不錯！！

南瓜妹，你要再加油呀 ~~~~~~

南瓜妹@32個月

21/11/2016 (32M)

食
唉......又退步番！呢個小朋友想點呢！？

瞓
午睡：13:30 - 15:00
晚上： 21:00 - 07:15
 
發展 
- 懂得畫圓形、畫人像，喜歡連線、油顏色，睇黎要帶南瓜妹學下畫畫先 (啱啱學跳舞，唔想咁細個就學咁多野，過多幾個月先)

- 向前跳 (終於唔係原地跳了)，但跑步/行路仲有待改善。

好笑既對話：
放學回家，同南瓜妹去wee wee，我問：「今日你有無同姐姐(學校校工)去wee wee！？」
南瓜妹：「無呀！我扮去wee wee，之後我自己抹pat pat ，再去洗手囉 .......(停左一秒)，我今日唔記得用bubble添！」
我：「咁你現在用番啦！」
南瓜妹去完wee wee後，就自己用bubble：「洗乾淨先，唔係就變左劉德華！」
真係笑死我.....「變左劉德華」，我又講下點解南瓜妹咁講，因為南瓜仔唔知係邊度學，成日講：「醫生話你無刷牙，第時變左劉德華！」，我已經講左n次叫佢咁講唔啱，咩叫「變左劉德華！？」九唔搭八 ....... 


返學
家長日，老師評語：
- 上課專心、主動
- 主動幫同學 (例子：自己書包未揹好，見到同學揹唔到，就會幫左同學先，再自己揹書包)
- 協助排隊，會叫男仔一行，女仔一行  (呢d唔駛南瓜妹啦，老師會做 ><)
- 學校既勞作(我估)，老師話放左係枱面，南瓜妹會自動自覺做，唔駛老師幫手，做得最快又做得到！
- 對唱歌、跳舞十分投入，仲會大聲地唱歌，老師仲話佢係全班最投入。(突然有d私心，會不會黎緊學校聖誕企前排中間呢！？我係唔係諗多左......哈！哈！)

不過我好快就明白點解南瓜妹做到以上既野，因為南瓜妹已讀了一年全日制學校，一早就適應校園生活 ....... 唔，咁佢做到亦好正常喎！

都有改善既地方 ......

中文老師：講多d完齊句子。
- 唔 ........ 南瓜妹講既野已經好完齊，唯有再努力！哈！

英文老師：仲未完全聽得明英文。
- 呢個係我一早就知既問題，因為南瓜妹係一個全廣東話語境長大，南瓜妹有待進步！！

而作為媽媽，我係覺得南瓜妹唔夠專心，好多時只做了少少就話唔做。

再分享下：

因為學校(由家長代表 whatsApp我地)要求小朋友帶冬季後備衫，咁我係星期日放入書包前同南瓜妹講：「記得明天俾李老師！」
第二日(星期一)我仲見書包有個膠袋，仲同南瓜妹講：「你唔記得俾李老師呀！？」
**南瓜妹：「俾左啦！李老師放番入書包！」
我心諗，九唔搭八，亂講 ><

星期二，接完妹妹放學，仲見到個膠袋仲係書包度，我就同南瓜妹講：「你唔記得俾李老師！」
南瓜妹：「俾左啦！」
我：「你要記得俾李老師嘛！」
#南瓜妹：「老師話唔駛帶！」
我心諗 .....又九唔搭八！！><

到星期三，接到老師既電話，老師話已經拎左套冬季衫，亦放了夏季套衫係書包，其實都唔係乜野，點解會打電話俾我呢！？？
返到屋企，我打開南瓜妹書包，個膠袋原來係放左夏季既後備衫喎！？？？

係唔係星期一已經拎左冬季衫出來，老師放在夏季衫入原本既膠袋！？所以老師先打來俾我呢！？(因為已退回夏季衫，我又日日放係書包 ><)
南瓜妹之前講：**「俾左啦！之後李老師放哂入書包！」同 #「老師話唔駛帶！」，是否係真！？

我最終都唔知答案，不過我就會下次小心d，信多d小朋友，再check清楚！！

另一件事：
- 南瓜妹同我講學校調左位 + 同邊2個同學坐，我有少許唔信 (學校既相係無調位)，但南瓜妹講到次層層：「XX(新調位同學名)，佢攪我枱面既相，我唔俾佢攪！」，過多幾日，學校再有相睇，原來南瓜妹真係調左位，佢仲講得啱同邊2個新同學坐，真心覺得南瓜妹幾叻！！ 

其他

-  17隻牙
-  24.2磅(11kg)

南瓜仔@健康院(4歲驗眼)

係南瓜仔四歲當天，我已打去健康院 ....... 佢地最遲先book到10月尾，但我想book 11月中，因為這天是南瓜仔學校假期，跟住我就計埋時間再打去改期，結果！？成功！yeah ~~~~

我都知健康院驗眼「流流地」，我都諗住若果有乜問題先轉去私家睇！


14/11/2016 (49M26D)

我排第一個，所以唔駛點等就到我地！

入到去，視光師就問下南瓜仔叫乜名、幾多歲，南瓜仔都好合作有答問題.....

南瓜仔全程表現得好好，好淡定，做足指令！

1) 問英文字母 (共4張，每張有4個英文字母)，首先南瓜仔戴上眼鏡，其中一隻眼用黑色鏡片遮住。南瓜仔驗完左眼就右眼，兩隻眼好順利地講到頭3張，第4張就讀唔到。

視光師解釋：第1張(英文字母最大隻)係小學用，睇到就合格；第2張係4歲用，睇到就合格(南瓜仔就合格)；第3張睇到就超額完成；而第4張(英文字母最細隻)係大人用，睇到先合格，所以南瓜仔睇唔到好正常！

視光師仲話，第1張 (英文字母最大隻)，去到小一時，超過四成人睇唔到 ><

2) 關燈，用著一個七彩色既球 (好似 disco 咁)，一路叫南瓜仔講顏色，又用d 野同南瓜仔check 眼。

3) 用好似電筒既野 check 眼

其實check乜我都唔太清楚，但感覺上都幾認真，唔似太流.......

最後視光師話南瓜仔對眼有100分，無近視、無散光、無斜視、無色盲。yeah！！

有100度遠視(初生若有300度遠視)，視光師補充，若遠視用完就會變近視，所以要好好保護雙眼！

我再問：「咁幾時就用完100度遠視！？」

視光師：「每個人都不同！」

視光師：「小一會再安排驗眼，學校會派通告.......若呢段期間有乜問題，隨時打黎再book度睇！」

驗完眼就去度高、磅重 .......唉！！

高度：92.2cm
體重：13.8kg

成個月都無高到，唉.........

原本要見姑娘，但我話已經有政府醫院跟進，所以就去見姑娘啦！！


之後我就約左南瓜仔同學一齊去公園玩，一玩就玩左2.5小時，我仲諗住入秋無咁多蚊，結果我被蚊咬左32口 >< (好彩南瓜仔無事)

呢一日又係南瓜妹既學校假期，但我見佢有兩聲咳就無帶佢出去 ........ 不過我個心都不太舒服，留下妹妹係屋企 ><

所以待佢地午睡完，我再帶南瓜兄妹出街！！

南瓜仔@升小苦惱

原本我心儀 A 學校，因為夠傳統、升中亦十分亮麗，但唯功課多量多 .......但都覺得適合南瓜仔。

隨著表哥升了小一後 (已考入私小，大抽獎中左第一志願，最後揀左津小)，我既心態就開始轉變。

1) 一天，我問表哥：「你平時有幾多樣功課！？」

表哥：「8樣！」

我：「咁假日呢！？」

表哥：「14樣！」

家姐補充：「14樣入面包埋改正，若無改正咪少1樣功課.......」

2) 颱風當天，家姐傳來whatsapp，係表哥既手冊，手冊上有22樣功課(Crazy！！)

3) 家庭聚會(逢星期日)改了 18:00 - 20:00，因為第二日要晨早 06:30 起床(家姐要05:50起床)，已經係家姐車佢返學 (唔係跨網學校，返 07:40，係少數學校要返咁早)，若搭校車就要 05:45 起床 (06:30 上校巴)，crazy！

4) 不斷有評估/默書，仲有「突擊評估/默書」(家姐話好彩幼稚園時已有默書，否則仲難適應)

5) 功課好深 (我個人覺得)

6) 學校要求「一體一藝」(家姐話已經咁多功課、又要默書/評估，仲要俾時間小朋友學「一體一藝」)

7) 網上功課 / 睇新聞做報告 / 閱讀報告

一個只得六歲既小朋友，放完學已是四點多，仲有做功課/溫書 ........ 仲有要食飯、沖涼，哪來有時間去玩！？去休息呢！？

我深明升小後同幼稚園會有分別，但比我想像更「恐佈」........

我知道係香港讀書係辛苦，所以對於南瓜仔報私小/直資有所改變，希望入到一間口啤不錯，而功課量不多既小學 (係不多，並不代表無)！

而津校，我都係會揀 hd 或 我間母校，而呢兩間學校口啤都不錯，但都係多功課 ><。得「15分」真係無可能到入儀學校，係一個保守既情況下(仲要係龍年)，我真係唔會去博 ......

2016年hd 生日

唔 ...... 由我同hd拍拖至上年，我地都係正日慶祝，但現在有小朋友，小朋友要返學，唯有提早慶祝啦！！(我係一個唔鐘意"提早慶祝"既人，但都要面對現實！><)


30/10/2016 (49M11D) + (31M9D)

我一早就 book 左自助山 lunch buffet  (點解食午餐！？因為小朋友第二日要返學嘛！食晚餐就要趕住回家，而且仲平d添！)，聽聞佢地既自助餐好好食 ..........

自助山，係位於62樓，未去到，南瓜兄妹已經有「驚喜」，就係搭超快既玻璃升降機 (即係可以望到風景)，搭到佢地嘩嘩聲！！

待坐好後，就有第二個 「驚喜」，就係餐廳會「轉」，當我地入座時仲未轉架，但座座下就轉，突然轉既第一下，佢兩個不知幾開心！！哈！哈！

加再上我好早就book，所以坐係窗邊位，仲睇到我地結婚既馬場添，個景真係無敵！！


↑ 而食物既質素亦十分好！

唔怪得咁難 book 啦 ~~~~~~

食食下，南瓜仔突然講：「媽咪，我肚痛！」
我就問佢乜事！？南瓜仔只講：「媽咪，抱抱..........」
咁我就好自然抱佢啦，我再問：「係唔係想屙 poo poo！？」(平時南瓜仔去poo poo 就去 poo poo ，不會講肚痛！)
南瓜仔：「係呀！我要 poo poo！」
但當時 hd 出左去拎食物，我就好心急.........好彩唔夠1分鐘見到 hd，我都顧唔到咁多，就少許大聲同 hd講要帶南瓜仔去洗手間！
好彩南瓜仔去完洗手間就話唔痛！

不過，之後又發生......
正當 hd 出去拎食物時，南瓜妹：「我要 poo poo！」
又黎！？
今次 hd 無咁快出現 (佢既手提電話係枱面)，南瓜妹就等待唔耐煩，開始喊話要去 poo poo.......
當時我諗，點做好呢！？留下南瓜仔！？叫職員幫手睇住南瓜仔！？點算呀！？？？
好彩，我老遠見到 hd，我再次不顧環境，抱住南瓜妹就有少許大聲同 hd 講：「我同妹妹 poo poo！」咁就跑左去洗手間.......
最後都順順利利！！

呢兩個小朋友，點解唔等埋爸爸拎完食物先講去 poo poo 呢！？？


食完就回家休息 .......

晚上，去母親大人屋企食晚飯，現在為左就表哥(啱啱升小一，現在要提早瞓覺，最遲8點就要走人，所以大家一齊提早食飯)，所以食完飯回到家都係八點半左右！

但我既午餐真係好飽，再放唔落任何野了！><


31/10/2016 (49M12D) + (31M10D)

正日生日，雖然己經慶祝左，但我都約左 hd 一齊食 lunch (安排左公公接南瓜妹放學)

↑ 晚上，生日蛋糕是不可少！

而今年既蛋糕係南瓜仔揀，更係南瓜仔自己幫忙落order，同服務員既對話....

南瓜仔：「唔該我要呢個蛋糕 (指住個蛋糕款)！」
服務員： 「咁你幾時要！？」
南瓜仔：「.......」(唔識答，我係耳邊教佢)，「31號，下星期一」
服務員：「 幾多磅！？」
南瓜仔：「1磅！」(我又係南瓜仔耳邊講)
服務員：「貴姓！？」
南瓜仔：「XXX」(串左俾服務員知)
服務員：「幾多號電話！？」
南瓜仔：「9XXXXXXX」(我既電話)

其實以上對話好簡單，但媽咪都覺得佢又大個仔左！


↑ 仲有生日咭！！

南瓜仔又大個左，全張咭都係南瓜仔自己寫/畫，我只係教佢「daddy happy birthday」咁串，其他野就俾佢自由發揮，畫左d乜！？大家估下啦！！

但南瓜仔畫完一面，又話要畫埋後面 ><，我就由得佢！！

攪啱完南瓜仔就諗住輪到南瓜妹，因為南瓜妹一定要我協助，點知南瓜仔又要畫囉！？？明明已畫好生日咭 ........

咁好啦，唯有俾埋南瓜仔畫 ><



↑ 最後，係我送俾 hd 既生日禮物，雖然不貴重，但好過無啦！！(P.S：佢自己揀架！)


題外話：不得不承應，年紀都係大左 ......

- 呢餐自助餐，我足足飽足2日。
- 係一個完全無改善生活模式下，我竟然重左8磅 ><。唯一既原因係我新陳代謝慢左，我係想肥，但唔係肥係肚腩囉 ><

南瓜兄妹@2016 角色日

南瓜仔
2013年(PG)：南瓜仔 
2014年(PN)：超人
2015年(K1)：mickey mouse

南瓜妹
2015(PG)：minnie

扮咩好呢！？ 我就覺得最重要係輕便，上年果套多太配件，我相信去洗手間都唔方便。

又問一問主角想扮乜！？主角(南瓜仔)就話扮巴斯光年，咁就扮佢啦！

另一主角又點！？我地無問佢......哈！哈！最後 hd 幫佢揀左美少女戰士既小兔！

不過今年就唔係同一日扮 ><


27/10/2016 (31M6D)

南瓜妹就扮小兔，呢套衫夠簡單，good！

應該無同人撞衫 .....

南瓜妹學校有老師幫佢地畫面，我仲估佢一定唔肯俾老師畫，點知老公放學時見到塊面畫左喎！？？

我回家後就問妹妹：「邊個幫你畫面！？」
妹妹：「李老師！」
我：「咁你有無喊住話唔畫！？」
妹妹：「緊係無啦！」

突然間，覺得妹妹又大個左！！


28/10/2016 (49M9D)

南瓜仔呢套衫又好簡單，我估好大機會撞衫，哈！哈！

原本我諗住俾支巴斯光年搶帶回學校
南瓜仔：「Mr Benson 話俾帶玩具！？」
我：「 Mr Benson 又無咁講！」
南瓜仔：「咁我唔帶，返學唔學可以帶玩具！」

呢一刻，我又覺得哥哥又大個左！！


雖然佢地既衫都係著過一次咁大把，但都係一個美好回憶 (講緊我)！哈！哈！

南瓜妹@31個月

21/10/2016 (31M)

食
突然進步左！？？可以食到8-9成，點解呢！？我都唔知 ......

南瓜妹，你要繼續努力，你仲有好大進步空間架！(雖然食到8-9成，但我俾佢既份量唔多)

另外，我 cut 左南瓜妹既夜奶，因為佢越飲越少，由7安變左2-3安，加上我又唔覺飲左夜奶會肥 (同南瓜仔都一齊cut，又係越飲越少，飲左4年)，不過早上都 keep 住飲奶，因為早上係可以飲哂，即係仲有需求。

瞓
午睡：13:30 - 15:00
晚上： 21:00 - 07:15
 
發展 
- 我一直覺得南瓜妹大肌肉發展麻麻，咁我就帶多左南瓜妹去公園玩.....

但我發現，南瓜妹做攀爬既動作係無問題，佢既問題係行路、跑步、跳躍等，所以我要對正下藥，我應該同南瓜妹跑多d，而南瓜妹亦開始學跳舞，希望有幫助。

- 之前仲著緊戒片底底(即係厚身底底，萬一瀨wee wee都唔會太濕，但見南瓜妹都無瀨過，咁即係唔駛再著咁厚身啦，係時候換番正常底底，但估唔到南瓜妹著92 碼既底褲仔 (H&M)都跌落黎........ 唯有再四周圍搵底底，原來要搵80碼既底底唔容易，大部份都係100碼起 (aeon, 千色店, 街巿都無)，如要80碼就得包片底底，好不容易先係 mides 先搵到 ><

mides 職員仲笑住講：「嘩！咁細個就戒左片，我地得好少2歲碼(即80碼)既底褲仔(即係入得好少貨)」，職員又解釋，大部份小朋友都會買3歲碼，原因係佢地都會有個肥嘟嘟既肚腩仔，所以著3歲碼會舒服d，可惜 ...... 南瓜妹只有細細既肚腩仔，唯有著2歲碼！！

- 某天，南瓜妹突然同我講：「I want drink water.」...... 
呢句說話係好普通既說話，但南瓜妹基本上唔識英文，但佢係邊度學！？係學校！？定係跟哥哥學！？(唔知點解，南瓜仔有時無啦啦會同妹妹講英文！)定係跟工人姐姐學！？


返學
今個月無收過老師既電話，都唔知南瓜妹既進展係點，應該要等到家長日先知！

好彩，南瓜妹係一個愛分享既小朋友.......

好多時都係南瓜妹主動分享學校事俾我知，雖然唔肯定係真定假 (但我個人覺得應該有d係真，南瓜妹無必要講大話，最多都係將d事情講 d唔講d姐！哈！哈！)

加上南瓜妹有個"醒目"媽媽，每天放學都有媽媽接放學，有d媽媽會影下相分享俾我地睇(其實學校職員話唔俾)，其中一次我見到 C 同學著左街褲，當時我心諗應該係瀨左 wee wee .....

南瓜妹又咁啱同我講：「媽咪，今日 C(同學) 瀨左 wee wee！」，嗱 ...... 我估無錯，無理由無端端著左街褲架！？

而南瓜妹最愛分享邊個無返學，最勁係有一次班上有 1/3 無返學(係whatsapp group 已知)，南瓜妹都能講得出邊個無返，有時會諗點解佢咁 "八"架！？有無專心上堂！？

南瓜妹就無乜講學校學左乜 (唱歌除外)，不過都係 PN，我就不會太緊張，我無跟過佢學校學乜，雖然佢地校長話大部份小朋友都識哂 a-z (sorry，我既女係唔識，哈！哈) 

鐘唔鐘意返學！？

唔.........應該唔係太鐘意，但又唔係抗拒，因為佢從來無講過唔返學，但有天落雨，南瓜妹好開心：「媽咪，落雨呀！唔駛返學！」

但都鐘意同學同班主任，因為佢成日話要約 C 同學、Y 同學同李老師去波波池玩。

其他

-  16隻牙
-  23.1磅(10.5kg)

南瓜仔@高度跟進(3) - 醫院

11/10/2016 (48M23D)

由於覆診既時間係 11:45，所以早上我照安排南瓜仔返學，去到 11:00 就到學校接佢放學(但我10點就要係屋企出發)，然後再去醫院！！

第一次 K2 接南瓜仔放學，第一次見佢成日提既蓮姐(校工ee)，蓮姐仲同我講南瓜仔日日都同佢講早晨 / BYE BYE  ......

雖然一早同南瓜仔講會接佢放學，但南瓜仔見到我時都十分興奮，小朋友就是咁簡單！

************************

之後就去醫院 ......

度高：92.2cm (4個月 + 3.1cm)
體重：13.95kg

06/06/2016 (44M17D)：89.1cm (3個月 + 1.3cm )
15/03/2016 (41M25D)：87.8cm (0.5個月+ 0.9cm)
23/02/2016 (41M04D)：86.9cm

即由02/2016至今，7個月多，高了5.3cm  (**上網睇資料，按年約高 7cm 為正常)

明顯地，南瓜仔最近3個月高得快左，可能食多左飯 + 學跆拳道掛！？或是暑假帶多左佢出街玩呢！？

若果 ，南瓜仔 keep 住咁高，5歲就可以達到 3%，希望可以達標。

都唔駛等好耐就見到醫生 ......

醫生：「雖然都係偏矮，但都係跟住生長線，KEEP 住有高，睇番你同你先生都係唔高既人(我得154cm)，所以暫時都唔睇到有乜大問題，現在可能性有兩個，(1) 遲發育 (2) 遺傳。」

我：「我中四先黎 M 架！」(真係好遲先黎 ><)

醫生：「咁你真係好遲發育喎！」

我：「係呀！所以我中四五都有再高架！」

醫生：「通常都係跟爸爸 (我無問點解！？)，可能佢跟左你啦！」

醫生：「今日安排照下x-ray，照下骨齡，睇下佢係唔係真係遲發育 .......」

我：「咁我幾時知結果！？」

醫生：「都唔急，下次覆診先睇報告！」(下次覆診係下年4月 ><)


睇完醫生就去照 x 光 .......

入到去，醫生A(定係護士！？)想俾照 X 光既袍我，但醫生B就問南瓜仔：「你可唔可以自己一個人照呀！？」

南瓜仔：「可以！」

醫生B：「咁媽咪就係玻璃窗後面望住你啦！」

南瓜仔：「好！」

咁我就去左另一間房睇住南瓜仔照 X 光，見到醫生A教南瓜仔點放手仔係 X 光機上，南瓜仔又乖乖聽醫生指示，之後醫生C就按制照 X 光，一 take 過 ......

呢個媽媽心中就覺得南瓜仔又大個左啦！！


咩叫照骨齡！？當然我唔知係乜，返屋企上網睇資料 ......

簡單黎講，假設1個12歲小朋友，照完骨齡係 10歲，即係佢係遲發育，可以再高。

但由於南瓜仔只有4歲，照出來最多遲幾個月，但不會遲1年以上，所以照骨齡通常係俾10歲左右為最佳。

************************

其實我又唔係好擔心，又或講無得擔心，遺傳就無法，我同hd都係細粒既人，我可以做係叫南瓜仔食多d野，安排佢做d運動(學游水/學跆拳道/周未去公園玩)，將來係 150cm 定 180cm  就要睇佢自己啦 ~~~~~

不得不提，現時衛生署既身高是沿用 n 年前既數據，已經不合時而，只係一直都無去改，隨著小朋友既營養越來越好， 小朋友既高度越來越高，就好似南瓜妹既同學，全班高過佢都不足為奇，但有幾個同學足足高佢一個頭，即係一個2.5歲既小朋友有100cm以上 ........

相關文章： 

南瓜仔@矮小症！？
南瓜仔@高度跟進(1) - 健康院
南瓜仔@高度跟進(2) - 醫院

南瓜妹@K1大作戰 (序)

又黎大作戰啦 ><

有了南瓜仔既經驗，我再不會考10多間，明明收左都唔會讀，但又去報名/面試 ，浪費自己同南瓜仔既時間........

而南瓜妹目標好明確 -- 龍校 (其實都唔係叫"龍校"，間間都唔係100%直升) ><

真心唔想「小學大作戰」 (諗起南瓜仔要大作戰就怕怕，仲有一年時間咋)

針，沒有兩頭利。 

有朋友分享，龍幼教既野較淺 (係較淺，但都唔容易)，若原校唔收，又唔夠競爭力，咁點算！？？ 雖然唔係100%直升，但我就覺得只要小朋友乖巧、跟到學校學習進度，要直升亦非難事(相對考小學，始終每間小學都有唔到準則，要乎合佢地既要求，咪仲難)。

南瓜妹係大b + 女仔 + 能力不錯，但係就永遠唔鐘意面試，每次面試都係不合作 ，呢個問題真的不容易解決 ><

南瓜妹，希望你乖乖地合作，加油呀！！


而南瓜妹入到咩學校，對於南瓜仔就係好大既關鍵........

自行分配
- 南瓜妹入到港島區龍校，南瓜仔就會填 hd 既母校
- 南瓜妹九龍區龍校，南瓜就會填我既母校

若到時真係收左，亦考唔到直資或私小，就會搬家！

統一派位
若自行分配唔中，又無直資收咁點！？咁都係睇下南瓜妹點先，有可能搬去南瓜妹收左既龍校既地區，若無龍校收的話，唯有原區揀 ........

直資/私小
呢個真係好難，考得入已經好叻，仲要就埋南瓜妹更不是易事，所以呢個問題就等南瓜妹真係有龍校收先諗，現在諗乜都無用！哈！哈！

但諗諗下，若搬左就唔方便公公黎照顧南瓜兄妹！？咁點呢！？

我，係唔係諗得太多呢！？？？

南瓜妹@30個月

21/09/2016 (30M)

食
真係煩到想死，我可以點呢！？放棄吧！？？

瞓
午睡：13:30 - 15:00
晚上： 21:00 - 07:15
 
發展 
大腿肌仲係發展得麻麻，所以決定下個月俾南瓜妹學跳舞，希望有改善。


返學
開學初期，收過3次電話，最初都係講南瓜妹wee wee 既情況 (返了3小時學後，肯學校 vee vee，連尿片都退番俾我)，之後就收過2次，基本上無乜大問題，只係聽唔明英文指令.....
南瓜妹又成日叫我放手要放大腿(學校教)、又扮老師 (南瓜妹指住本書：「 跟住我講，『爸爸媽媽返屋企』，跟住我講啦，『爸爸媽媽返屋企』(我又真係要跟佢講)，啱啦！」)、又要跟住佢唱歌。

會分享校園生活俾我知 ......

1) 開學頭幾日，南瓜妹都話自己 vee vee 完，自己抹 pat pat (但之後就話ee幫佢抹)
2) 食咩茶點，仲會講埋食完後自己將碗放入(餐)車
3) 邊個同學瀨 wee (咁啱果家長講自己小朋友瀨 wee，我唔會傻到問人地媽咪)
4) 邊個同學無返 (又咁啱果家長係 group 講佢小朋友病左)
5) 講到1x個同學名 (咁先講到 (3) 同 (4))，若有提示下 (即我講「陳??」，南瓜妹會講到「陳大明」)，只係差3個講唔出。
6) 唱咩歌 
7) 同我講：「有同學拎左我燈籠，所以我喊，但李老師幫我拎番」

老師寫左1句評語：「This week can has been a good helper to her classmates and would help them follow the teacher's instructions! Keep it up.」

又過番回家接放學 (午餐時間)，唔知大家仲記唔記得南瓜仔出世至 PN 完，我都日日返屋企 (0-2歲：餵水果 / 陪玩，2-3歲 (PN)：接放學)呢！？係直至上年南瓜兄妹讀全日制，我才沒有午膳回家 .......

現在南瓜妹返半日，廿四孝既媽咪/爸爸都係決定回家接佢放學 (我同hd輪住接， 咁大家會舒服d)，返屋企後就同南瓜妹換校服、洗手、食飯，我就返工！！  

雖然得好短時間，但我好珍惜。

其他

-  16隻牙
-  23.1磅(10.5kg) 
- 全班最矮就係佢 ><

【2016 中秋節】

一年一度既中秋又到啦 ~~~~~~

南瓜兄妹各自都要帶燈籠返學校，原本諗住用返上年既燈籠 ........

但係我又帶南瓜妹去睇燈籠 (內心係想買新燈籠)，帶左南瓜妹去舖頭睇，一時又話要 hello kitty，一時又話要 mickey mouse，一時又話要 dory ><

但當佢見完 peppa pig 後，就話要 peppa pig，其他都唔要，仲要不斷咁講 (我要俾冷靜期佢，所以無即時買)，睇黎南瓜妹真係要 peppa pig ^^

買俾南瓜妹，又點唔可以買俾南瓜仔呢！？

南瓜仔最初話要飛機燈籠，但又諗諗下：「媽咪，我都係唔要飛機燈籠，佢有轆，會好重，我會拎唔到，我都係要 dory！」

好，我又係冷靜期俾南瓜仔 .......

終於帶佢地去買，南瓜妹當然拎左 peppa pig，而南瓜仔最後揀左 toy story 燈籠，因為佢試過拎，唔重，所以就揀左佢！！


14/09/2016 (47M26D) + (29M24D)

去到中秋節前幾日，天文台就話會打風，星期二(13/9/2016)早上收到妹妹既家長whatsapp group話會改期，改係早一天舉行 .......

咁哥哥呢！？唔知會不會改期，但為免南瓜仔失望，所以我星期二(13/9/2016)就帶俾南瓜仔帶燈籠 + 月餅返學校 .......點知，放學就收到班主任電話，話會改期明天(星期三)，早知就唔駛咁心急帶啦！！

結果：南瓜兄妹既學校都係早一日慶祝中秋！！

 
↑ 妹妹學校有華服日，所以買左件華服俾佢，哥哥就無啦，男裝都唔靚！！


15/09/2016 (47M27D) + (29M25D)

當大家仲以為會打風時，當天天氣不知幾好，太好啦！天功造美 ........

是日，老公提早放工，所以去左學校接南瓜仔 ......

而南瓜兄妹就等埋我放工，就去接表妹一齊去婆婆家！！

食完飯就同表哥/表妹(姐)/表弟一齊落公園玩 .......


↑ 最好笑係南瓜妹，著住條長裙去玩滑梯！哈！哈！

同上年一樣，佢地落街唔係賞月，亦沒有玩燈籠，係掛住玩公園 ><

玩完就返婆婆家食月餅！！


16/09/2016 (47M28D) + (29M28D)

下午，就同 6299 一家飲茶，之後就去公園玩！！

晚上，就去追月 .....


↑ 落左樓下玩，仲見到個圓圓既月亮添 ^^

佢地都係無玩燈籠，係掛住玩公園><

玩玩下，南瓜妹突然話要屙 poo poo，咁無法啦，大家就一齊回家啦！！

南瓜仔@慶祝4歲生日

我一心諗住去會所攪生日會 (都係只邀請屋企人)，點知臨 book 前一個月打去問，原來撞正會所攪「中秋節晚會」，再早一星期或遲一星期都無得 book ><

唉 ...... 當時南瓜仔仲係我身邊，當佢知道無得 book 時 (因一早就同佢講會係會所攪生日會)，佢既反應係...........

南瓜仔：「媽咪，唔緊要啦，係屋企攪囉！」

呢一刻，覺得南瓜仔大個左好多！！

不過，我最後無係屋企攪生日會，因為屋企太細，所以都係出街食餐飯就算！^^

為左方便屋企人，就揀左提前一日慶祝........


18/09/2016 (47M30D)

揀左 Ruby Tuesday，因為有薯條食囉！！

又為左表哥 (啱啱升小一，仲未好適應，要早點回家)，所以18:00就開始食，19:10食蛋糕，19:30 bye bye，所以時間上好緊迫 ><

↑都係 hea 攪，但 hd 都整左個「汽球蛋糕」俾佢，仲有兩兄妹幫手添！！


↑ 生日，又點少得生日蛋糕呢！？呢個蛋糕係南瓜仔自己揀，但指明要有玩具，啱哂佢 ^^，仲有生日禮物添 ......

臨瞓前，同南瓜仔傾計，我就同佢講：「你知唔知4年前既今日，媽咪好痛好痛同好痛呀！？」

南瓜仔：「我又點知姐，我都未出世！」

咁又係喎！佢又點知呢 .......哈！哈！


19/09/2016 (48M)

正日生日，無特別慶祝！！


↑ 只買左個蛋糕俾南瓜仔，而呢個蛋糕係南瓜妹揀 ^^


媽咪祝你「快高長大」、「健健康康」、「開開心心」！！

南瓜仔@48個月

19/09/2016 (48M)

4歲啦！！

個子矮小，仲係好 bb 樣，一點也不覺4歲！哈！哈！

已經有自己既性格，有自己既思想，唔再可以呃你......

作為媽媽，最希望你健健康康、快快樂樂。


食
食野進步了不少，仲係有偏食(唔係菜)，可以食得哂全碗飯，不用大人餵食，但就"提"住要食飯囉！！


瞓
返學有午睡！

晚上，越來越夜瞓，由9點半變到現在10點半，甚至11點半先瞓，攞命 ><


發展
- 可以用花灑沖涼 (46個月)，雖然係遲左d，但對一個怕水既小朋友已經進步了不少，而南瓜仔會自己調水用花灑，自己塗沐浴露 (洗頭仲未得)，希望 K3 可以自己完成哂！

- 已經再無抱 (有時太攰，hd 先會抱)


學習
升左 K2 後，功課就多左(k1 係學校做哂)，南瓜仔係唔習慣，但現在應該接受左！(我都知道辛苦，但係香港讀書無法啦......)

同班主任傾過電話，大致上沒有問題，都係提番家長黎緊既課程會越來越深、亦越來越快。 (呢個唔係單一南瓜仔學校，係無論學券定非學券，都真係深左好多 ><)

K2 係好重要一年，大部份直資/私小會係 K2 (6月)開始 - K3(11月)，除了學術，仲有德育、閱讀習慣、自信心等等等等既野 ......

現實又講俾我知，龍年 + 細 b + 男仔 + 無背景 (唔係名校畢業/非專業人士) + 內向 +不是資優生，真係要考到真係不容易。

都係一句，平常心，係香港唔會無書讀，而且我深信無論咩小學，只要小朋友努力讀書，一定會升到好中學。(不過內心都係想入到一間好既小學)


其他
間唔中 (定係時常呢！？)同南瓜妹爭野，亦好鐘意 "報串" (妹妹一做錯野就四圍講)，不過我都知道南瓜仔是錫妹妹的，出街會主動拖住妹妹。

親子好去處@黃金海岸 + 公眾嬉水泳池

11/09/2016 (47M23D) + (29M21D)

目的地：黃金海岸 ((WE 華充氣嘉年華)

原本諗住尋日(星期六)去，點知全日都落住雨，唯有留在家中 .......

好彩第二日天氣好好，可以去玩啦！！

事前已經知道無野啱南瓜妹玩，無法，未夠高！

而南瓜仔有 90cm以上，可以玩大部份遊戲 ........

- 賽車維修站 ($50)，南瓜仔仲未識控制，要hd幫手

- 宇宙觀星船 ($50)，玩在一陣就話唔玩 ><

- 懸浮射擊($10)，由見到就話要玩，但其實佢係玩唔到

- 流沙 ($50)，當然玩到，但唔值囉

- 手工($50)，呢個係最正，可以有2個相架，南瓜兄妹各一，仲可以帶埋返屋企！

之後食完午餐，就回家 ......

南瓜兄妹就係車上瞓左！

返到屋企後，就同南瓜兄妹去游水 (係唔係好癲！？但南瓜妹已經了好多次要同南瓜仔游水，見天氣咁好，無理由唔去！？)

原本我諗住樓下會所玩，但 hd 話要去公眾嬉水池玩喎！？佢話咁先叫玩！？？？算吧！佢話去咪去 .....


目的地： 公眾嬉水泳池

南瓜兄妹入到去雙眼已發光，仲估唔到南瓜妹夠膽玩滑梯，仲玩左20次以上，咪話唔攰 ......

南瓜仔當然又玩啦，玩到完全無視我！

差不多完左1小時，就回家沖涼，再出發去母親大人屋企食飯 .....


呢個行程，我就好攰啦 .........

南瓜妹@厭食

若有睇開我既blog，大家都知南瓜兄妹係超級厭食 ........

南瓜仔：2個月就厭奶，之後轉糊仔、粥、飯都係唔多食，日日都係打扙咁，餐餐食成個鐘。不過只從 K1 轉左全日制後，南瓜仔就進步左，起碼唔駛餵食，而且大部份時間都食得哂 (唔係好大碗)，只係要我地不斷 "提醒"佢要食飯！！

南瓜妹：嘔奶嘔到6個月，之後食野都係麻麻地 (都食包、湯、水果)，但都可以接受 ...... 可惜越大就越唔食野(連包、湯、水果都係食得少少，就連奶都好多時飲唔哂)，餐餐都係食得幾啖，最勁試過一啖都唔肯食(午餐)，諗住晚餐佢會餓，點知都係食得唔多，南瓜妹係乜構造！？？點解可以食得咁少！？？？？

食飯又煩，一陣又話要用大人匙、一陣又話要用筷子、一陣又話要水，煩到呢 ........ 我都會配合佢，但佢唔配合我呢，都係唔食！

所以現在主力係解決南瓜妹既厭食！！

作為家長當然會試下唔同方法令小朋友食野，獎有獎過 (獎貼紙、去公園、零食、買玩具)、罰有罰過(罵、罰企、唔俾玩玩具)、睇手機送飯、問佢地想食乜，就煮乜。

食材方面，乜都試過......粥、粉、麵、飯、包、薯條，通通都試過哂，失敗！

hd 就試過用心思令南瓜妹食多 d ......

↑ 兩個小朋友一見到當然 "爭" 住食啦.....

南瓜仔就成功左，唔駛提都食哂所有野！yeah ~~~

可惜南瓜妹就失敗，南瓜妹只係"爭"住，但無食落肚 ><

妹妹呀！妹妹呀！你點先肯食野呀！？？

親子好去處@【2016 暑假】完結

暑假已經結束啦 (唔.....其實南瓜兄妹15/8已開學！哈！哈！)，去過咩地方玩！？

澳門三天遊(大潭山郊野公園滑草場、 童夢天地、澳門科學館、大三巴、華納滿 fun 童樂園)、迪士尼、科學館、美荷樓、書展、愉景灣、西貢、黃泥涌水塘公園、香港動漫電玩節、園圃街雀鳥公園、金管局、慈山寺、賣旗、樹屋田莊、遊學園、冒險樂園、各大商場(將軍澳中心、moko、IFC、九龍城廣場)、會所等等.......

可以帶到佢地去咁多地方玩，真係少 d 精力都唔得！！


特別係南瓜爸，因為我好多時都要返工 (hd 就放假)，所以多數都係 hd 一拖二帶佢地出街，又沒有用推車、又沒有人幫手，仲要帶佢地去咁遠 .......或都你地會問：「咁工人呢！？」

我同 hd 都係唔鐘意帶埋工人出街既人，點解！？有工人姐姐幫忙會好d，但始終覺得帶小朋友出街係父母做既事，所以由南瓜仔出世去今，只係帶過1次工人姐姐出街(而這次係因為 hd 唔得閒，而我亦沒有 hd 咁勇)！！


當我覺得小朋友可以日日去玩，係一件開心事時 .......

我身邊既朋友就話我：「仲乜日日帶小朋友出街！？唔駛去咁多架！」、「你唔攰，小朋友都攰啦......」、「日日咁玩，返學一定唔習慣啦！」、「咁曬(指陽光)，好心你唔好帶佢地出街啦，睇下你(即係我)，黑成咁！」 .......

不過我無理我 d 朋友 ^^，現階段我想帶南瓜兄妹出街玩多d！哈！哈！


除左出街玩，南瓜仔都 keep 住上恆常興趣班，除左游水唔係佢揀外 (最初佢話唔學，好彩之後都話鐘意)， 其餘都係佢自己話要學。

而暑期都有額外上多1個興趣班.......

南瓜妹呢！？無安排任何興趣班，不過我內心想佢學芭蕾舞 (這是我小時候既夢理)，不過真係太細，等南瓜妹再大少少先學啦！！


最後，南瓜仔當然有(學校)功課啦，不過只係得十幾頁紙，3日已經做哂！(最攪笑南瓜仔同學，臨開學前一日先知有功課做)。

南瓜妹係無功課。

親子好去處@Play Academy + 樹屋田莊 + 表哥生日會

28/08/2016 (47M9D)+(29M7D)

是日早上，我同hd分別帶小朋友去唔到地方玩 ........

目的地：Play Academy (遊學園)

我就約左南瓜妹舊同學去玩，點解唔帶南瓜仔！？因這個場都不太適合南瓜仔玩了(呢個場啱南瓜妹既年紀多d，咁當然帶佢去玩佢會照玩)，所以 hd 帶南瓜仔去其他地方啦！！

南瓜妹暫時只講到2個新同學既名，其他都講唔出，相信都要一段長時間先會講到大部份同學名！

而南瓜妹並無忘記舊同學，佢地既全名南瓜妹一一記住 .........

每當1個同學出現 (我地約左入面等)，南瓜妹就好開心，大大聲叫同學既全名！！

見到班小朋友玩得咁開心，自己都開心！！

我地玩到12點就走人，我要安排南瓜妹午睡後，再去表哥生日會！


目的地：樹屋田莊

是日，開放日！

hd 同南瓜仔已經好早出發，但要排2小時以上先玩到樹屋！？？？

hd：「我排得好前，但前面有1個家長幫5個小朋友排，個個都係咁 ........... 無法，得我1個排，唔可以兵分兩路..........」(我都明白，若我一大班人去玩，我都會咁安排)


hd 話南瓜仔完全唔怕玩樹屋，佢仲以為南瓜仔會喊添！！

玩到兩點半就走人啦，南瓜仔就係車上瞓 ........


目的地：表哥生日會

待南瓜妹午睡完後，我就出發去表哥生日會 ......

而南瓜仔同hd 隨後先到！！


表哥6歲，所以黎參加既小朋友應該咁上下年紀，家姐安排左1個大型既吹氣滑梯，嘩 ....... 佢地玩得好癲(我明既，我相信南瓜仔過多2年後都係咁)，南瓜仔仲可以玩 (我係附近睇住)，南瓜妹真係完全唔適合，所以只係襯無乜人時快快玩幾次。

玩完就去食晚餐，就快快回家休息！！